ଅର୍ଗସ ବ୍ୟୁରୋ: ଜିନ୍ନତ୍ ପାଇଁ ନାକେଦମ ବନବିଭାଗ । ବାରମ୍ବାର ସ୍ଥାନ ପରିବର୍ତ୍ତନ କରୁଛି ବାଘୁଣୀ ଜିନ୍ନତ୍ । ଏକ ସପ୍ତାହ ଧରି ପଶ୍ଚିମବଙ୍ଗର ପୁରୁଳିଆ ଜିଲ୍ଲା ବାନ୍ଦଓ୍ବାନ ଅନ୍ତର୍ଗତ ରାଇକା ପାହାଡରେ ରହିବା ପରେ ୨୭ତାରିଖ ରାତିରେ ସ୍ଥାନ ପରିବର୍ତ୍ତନ କରି ବାନ୍ଦଓ୍ବାନ ଠାରୁ ୧୫ କି.ମି ଦୂର' ମାନବଜାର ୨ନମ୍ବର ବ୍ଲକ ଡାଙ୍ଗାରଡି ବିଟ ନିକଟସ୍ଥ ସୁନସୁନିଆ ପାହାଡକୁ ଯାଇଥିଲା ।

ହେଲେ ପୁଣିଥରେ ଗତକାଲି ରାତିରେ ପୁରୁଳିଆ ଜିଲ୍ଲା ଛାଡି ବାଙ୍କୁରା ଜିଲ୍ଲାକୁ ପ୍ରବେଶ କରିଛି ଜିନ୍ନତ୍ । ଏବେ ବାଙ୍କୁରା ଜିଲ୍ଲାର ରାଣୀବାଗ ଥାନା ଅନ୍ତର୍ଗତ କଂସାବତୀ ଜଳଭଣ୍ଡାର ନିକଟ ଜଙ୍ଗଲରେ ଜିନ୍ନତ୍ ଅବସ୍ଥିତି ନେଇ ବନବିଭାଗ ଟ୍ରାକିଂରୁ ଜଣାପଡିଛି । ବାଘୁଣୀ କୁ ନେଇ ବାରୁଣିଆ , ଗୋପାଳପୁର , ଗୋସେଇଡିହି ଆଦି ଅଞ୍ଚଳରେ ମାଇକ ଯୋଗେ ଲୋକଙ୍କୁ ସତର୍କ ରହିବା ପାଇଁ ସୂଚନା ଦିଆଯାଇଛି । ଆଜକୁ ଦୀର୍ଘ ୨୧ ଦିନ ଧରି ଜୀନ୍ନତ୍ ଶିମିଳିପାଳ ଛାଡ଼ି ବାହାର ରାଜ୍ୟକୁ ଚାଲିଯାଇଥିବା ବେଳେ ଜୀନ୍ନତ୍ କୁ ପୁଣି ଶିମିଳିପାଳ ଫେରାଇ ଆଣିବା ପାଇଁ ବନବିଭାଗର ନିଦ ହଜିଗଲାଣି।