ଗୋଟିଏ ଅନୁଷ୍ଠାନ, ମାଗଣା ରେ ଟ୍ରେନିଂ । ଏକାଥରେ ପାଇଲେ ୧୦୭ ଜଣ ଚାକିରି । ବ୍ରହ୍ମପୁର ଫିଜିକାଲ ଏକାଡେମୀର ମୁଖ୍ୟ ସୀମାଞ୍ଚଳ ବାରିକଙ୍କ ଠାରୁ ମାଗଣା ଶାରୀରିକ ତାଲିମ ନେଇ ଏକାଥରକେ ଶତାଧିକ ଛାତ୍ରଛାତ୍ରୀ ପାଇଲେ ପାରା ମିଲିଟାରୀରେ ନିଯୁକ୍ତି । ନିଯୁକ୍ତି ପାଇଥିବା ସମସ୍ତ ଛାତ୍ରଛାତ୍ରୀଙ୍କୁ ଏକାଡେମୀ ପକ୍ଷରୁ ସାର୍ଟିଫିକେଟ, ପୁଷ୍ପମାଲ୍ୟ ଓ ଉପଢ଼ୌକନ ଦେଇ ସମ୍ବର୍ଦ୍ଧିତ କରାଯାଇଥିଲା ।

ଏକାଠି ପଢୁଥିଲେ, ଏକାଠି ଶାରୀରିକ ଶିକ୍ଷା ନେଲେ ଆଉ ଏବେ ଏକାଠି ପାଇଲେ ନିଯୁକ୍ତି । ଏମକେସିଜି ମେଡିକାଲର ଖେଳ ପଡ଼ିଆରେ ବ୍ରହ୍ମପୁର ଫିଜିକାଲ ଏକାଡେମୀ ପକ୍ଷରୁ ମାଗଣାରେ ତାଲିମ ନେଉଥିବା ୧୦୭ ଜଣ ଛାତ୍ରଛାତ୍ରୀ ଏସଏସସି -ଜିଡି ତଥା ପାରା ମିଲିଟାରୀରେ ନିଯୁକ୍ତି ପାଇଛନ୍ତି ।

ନିଯୁକ୍ତି ପାଇବା ପରେ ୯୦ ଜଣ ଛାତ୍ରଛାତ୍ରୀ ମେଡିକାଲ କଲେଜ ଖେଳ ପଡ଼ିଆରେ ପହଞ୍ଚିଥିଲେ । ପାରା ମିଲିଟାରୀରେ ନିଯୁକ୍ତି ପାଇଥିବା ୯୦ ଜଣ ଛାତ୍ରଛାତ୍ରୀଙ୍କୁ ଏକାଡେମୀ ପକ୍ଷରୁ ସାର୍ଟିଫିକେଟ, ପୁଷ୍ପମାଲ୍ୟ ଓ ଉପଢ଼ୌକନ ଦେଇ ସମ୍ବର୍ଦ୍ଧିତ କରାଯାଇଥିଲା ।

କଟକ ଜିଲ୍ଲାର ବାଗଧରିଆ ଗାଁର ସଙ୍ଗୀତା ପ୍ରିୟଦର୍ଶନୀ । ଦୌଡ଼ ହେଉନଥିବା ଯୋଗୁଁ ସେ ଚିନ୍ତାରେ ଥିଲେ । ଦୁଇ ମାସ ଧରି ତାଲିମ ସହ ନିୟମିତ ଦୌଡ଼ କରିବା ଯୋଗୁଁ ସଫଳ ହୋଇପାରିଲେ। ନିଜ ଗାଁର ପ୍ରଥମ ଝିଅ ଭାବେ ପାରା ମିଲିଟାରୀରେ ଯୋଗ ଦେଇ ବେଶ ଖୁସି । ରାୟଗଡ଼ା ଜିଲ୍ଲା ଗୁଣୁପୁର ଗାଁର ସୋନାଲୀ ମଲ୍ଲିଫୁଲ । ପାରା ମିଲିଟାରୀ ପାଇଁ ପ୍ରଥମ ଲିଖିତ ପରୀକ୍ଷା ଦେବା ସମୟରେ ଦୁର୍ଘଟଣା ଘଟି ଗୋଡ଼ ଭାଙ୍ଗି ଯାଇଥିଲା । କିନ୍ତୁ ମନରେ ସେନା ବାହିନୀ ହେବାର ଦୃଢ଼ ଇଚ୍ଛାଶକ୍ତି ଥିବା ଯୋଗୁଁ ପୁଣି ଦୁଇ ମାସ ପରେ ଆଉ ଥରେ ପାରା ମିଲିଟାରୀ ଲିଖିତ ପରୀକ୍ଷା ଦେବା ସହ ଉତ୍ତୀର୍ଣ୍ଣ ହୋଇଥିଲେ ।

ନିଜ ପିଲା ମାନଙ୍କର ଏଭଳି ସଫଳତାକୁ ଦେଖି ଗର୍ବରେ ଛାତି କୁଣ୍ଡେମୋଟ ହୋଇଯାଉଥିବା କହିଛନ୍ତି ଅଭିଭାବକ ମାନେ । ସୀମାଞ୍ଚଳ ବାରିକଙ୍କ ଏଭଳି ମାଗଣାରେ ଶାରୀରିକ ତାଲିମ ଦେବା ଯୋଗୁଁ ଗତ ୫ ବର୍ଷ ମଧ୍ୟରେ ୬ ହଜାରରୁ ଅଧିକ ଛାତ୍ରଛାତ୍ରୀ ସେନାବାହିନୀରେ ନିଯୁକ୍ତି ପାଇପାରିଛନ୍ତି ।