କେନ୍ଦୁଝର ଜିଲ୍ଲାର ଖଣିଜ ଅଞ୍ଚଳରେ ଦୀର୍ଘ ଦିନ ଧରି ସ୍ୱାସ୍ଥ୍ୟ ସେବା କ୍ଷେତ୍ରରେ ଚାଲି ଆସୁଥିବା ସମସ୍ୟାକୁ ଦୂର କରିବା ଉଦ୍ଦେଶ୍ୟ ନେଇ କେନ୍ଦୁଝର ସାଂସଦ ଅନନ୍ତ ନାୟକ କେନ୍ଦ୍ର ଶ୍ରମ ଓ ନିଯୁକ୍ତି ମନ୍ତ୍ରୀ ଡ. ମନସୁଖ ମାଣ୍ଡଭିୟଙ୍କୁ ନୂଆଦିଲ୍ଲୀ ଠାରେ ସାକ୍ଷାତ କରିଛନ୍ତି । ଏହି ଅବସରରେ ଶ୍ରୀ ନାୟକ କେନ୍ଦୁଝର ଜିଲ୍ଲାର ଯୋଡ଼ା ଠାରେ ଥିବା ଇଏସଆଇ ହସ୍ପିଟାଲକୁ ସୁପର ସ୍ପେସାଲିଟି ହସ୍ପିଟାଲର ମାନ୍ୟତା ପ୍ରଦାନ କରିବାକୁ ଦାବି କରି ଏକ ପତ୍ର ପ୍ରଦାନ କରିଛନ୍ତି । ଶ୍ରୀ ନାୟକ ତାଙ୍କ ପତ୍ରରେ ଉଲ୍ଲେଖ କରିଛନ୍ତି ଯେ ଯୋଡା- ବଡ଼ବିଲ ଖଣି ଅଞ୍ଚଳ ଦେଶର ସବୁଠାରୁ ବଡ ଲୌହ ଓର ଉତ୍ପାଦକ ଅଞ୍ଚଳ ମଧ୍ୟରେ ଅନ୍ୟତମ । ତେଣୁ ଏହି ଅଞ୍ଚଳରେ ଉନ୍ନତମାନର ଚିକିତ୍ସା ସୁବିଧା ପ୍ରଦାନ କରିଯିବାର ଆବଶ୍ୟକତା ରହିଛି । ଶ୍ରୀ ନାୟକ ଆଗକୁ ତାଙ୍କ ପତ୍ରରେ କହିଛନ୍ତି ଯେ କେନ୍ଦୁଝର ଭାରତର ଲୌହ ଖଣିଜ ଉତ୍ପାଦନରେ ପାଖାପାଖି ୩୦ ପ୍ରତିଶତ ଯୋଗଦାନ ଦେଇଥାଏ । ଏଠାରେ ୩୭ଟି ଖନନ ପ୍ରକଳ୍ପ ଚାଲୁ ରହିଛି ଓ ପାଖାପାଖି ଏକ ଲକ୍ଷରୁ ଉର୍ଦ୍ଧ୍ବ ଲୋକ ପ୍ରତ୍ୟକ୍ଷ ଓ ପରୋକ୍ଷ ଭାବେ ଏହି ଖନନ କାର୍ଯ୍ୟ ଉପରେ ନିର୍ଭରଶୀଳ। ଏହା ସତ୍ତ୍ବେ ଏହି ଅଞ୍ଚଳରେ ଗୁଣବତ୍ତାପୂର୍ଣ୍ଣ ସ୍ୱାସ୍ଥ୍ୟ ସେବାର ଅଭାବ ରହିଛି। 

ଶ୍ରୀ ନାୟକ କହିଛନ୍ତି ଯେ ଖଣି ଅଞ୍ଚଳରେ ବ୍ୟାପକ ଖଣି ଓ ପରିବହନ କାର୍ଯ୍ୟକଳାପ ବେଳେ ପ୍ରତିଦିନ ସଡକ ଦୁର୍ଘଟଣା ଘଟୁଛି, ଯାହାର ଫଳରେ ପ୍ରାୟତଃ ଚିକିତ୍ସା ସମ୍ବନ୍ଧୀୟ ଜରୁରୀକାଳୀନ ପରିସ୍ଥିତି ସୃଷ୍ଟି ହେଉଛି । କିନ୍ତୁ ଦୁର୍ଭାଗ୍ୟର ବିଷୟ ଯେ ଏହି ଅଞ୍ଚଳର ଚିକିତ୍ସା ଭିତ୍ତିଭୂମି ଲୋକମାନଙ୍କର ଆବଶ୍ୟକତା ପୂରଣ କରିପାରୁନାହିଁ। ଯୋଡା ଓ ବଡବିଲ୍ ଖଣି ଅଞ୍ଚଳରୁ ସବୁଠାରୁ ନିକଟତମ ବଡ଼ ଚିକିତ୍ସା ସୁବିଧା କେନ୍ଦୁଝର ଜିଲ୍ଲା ମୁଖ୍ୟାଳୟ ହସ୍ପିଟାଲ୍ ପ୍ରାୟ ୯୦ କି.ମି. ଦୂରରେ ଅବସ୍ଥିତ। ତେଣୁ ସେମାନଙ୍କୁ ସଠିକ ସମୟରେ ଜରୁରୀକାଳୀନ ଚିକିତ୍ସା ମିଳିପାରୁ ନାହିଁ । ସେ ପତ୍ରରେ ଲେଖିଛନ୍ତି ଯେ ଯୋଡ଼ାରେ ଶିଳ୍ପାଞ୍ଚଳରେ କାର୍ଯ୍ୟ କରୁଥିବା ଶ୍ରମିକ ଓ ସ୍ଥାନୀୟ ଲୋକ ମାନଙ୍କ ପାଇଁ ଏକ ଇଏସଆଇ ହସ୍ପିଟାଲ ରହିଛି ।

ଏହି ଇଏସଆଇ ହସ୍ପିଟାଲରେ କର୍ମଚାରୀ ଓ ସମ୍ବଳର ଘୋର ଅଭାବ ରହିଛି। ଏଠାରେ ୫୧ ସ୍ୱୀକୃତ ପଦ ଥିବା ବେଳେ ମାତ୍ର ୮ଟି ପଦ ପୂରଣ ହୋଇଛି । ଶ୍ରୀ ନାୟକ ତାଙ୍କ ପତ୍ରରେ ଲେଖିଛନ୍ତି ଯେ ଯଶସ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ କିଛି ଦିନ ତଳେ ବିଭିନ୍ନ ଶିଳ୍ପାଞ୍ଚଳରେ ଶହେଟି ସୁପର ସ୍ପେସିଆଲିଟି ହସ୍ପିଟାଲ ପ୍ରତିଷ୍ଠା କରିବାକୁ ଘୋଷଣା କରିଛନ୍ତି । ଯୋଡା ସ୍ଥିତ ଇଏସଆଇ ହସ୍ପିଟାଲକୁ ପ୍ରଧାନମନ୍ତ୍ରୀଙ୍କ ଦ୍ୱାରା ଘୋଷିତ ଏହି ଯୋଜନାରେ ସାମିଲ କରିବାକୁ ଶ୍ରୀ ନାୟକ ଅନୁରୋଧ କରିଛନ୍ତି । ସେ କହିଛନ୍ତି ଯେ ଏହି ଇଏସଆଇ ହସ୍ପିଟାଲକୁ ସୁପର ସ୍ପେସାଲିଟି ହସ୍ପିଟାଲରେ ଅପଗ୍ରେଡ କରା ଗଲେ ଏହି ଜନଜାତି ବହୁଳ ଅଞ୍ଚଳରେ ସ୍ୱାସ୍ଥ୍ୟସେବା ମଜଭୁତ ହେବା ସହିତ ହଜାର ହଜାର ସଂଖ୍ୟାରେ କାମ କରୁଥିବା ଶ୍ରମିକ ଓ ସ୍ଥାନୀୟ ଲୋକମାନଙ୍କୁ ଠିକ ସମୟରେ ଗୁଣବତ୍ତାପୂର୍ଣ୍ଣ ଚିକିତ୍ସା ମିଳି ପାରିବ । ଶ୍ରୀ ନାୟକ ଏହି ପ୍ରସଙ୍ଗରେ ନେଇ ଡ. ମାଣ୍ଡଭିୟଙ୍କୁ ବ୍ୟକ୍ତିଗତ ଭାବେ ହସ୍ତକ୍ଷେପ କରିବା ପାଇଁ ଅନୁରୋଧ କରିବା ସହ କେନ୍ଦୁଝରର ଲୋକମାନଙ୍କ ସ୍ୱାର୍ଥ ଦୃଷ୍ଟିରୁ ଖୁବ ଶୀଘ୍ର ସକାରାତ୍ମକ ପ୍ରତିକ୍ରିୟା ମିଳିବ ବୋଲି ଆଶା ପ୍ରକାଶ କରିଛନ୍ତି।