ବିଜେଡିରେ ପୁଣି କେଁ, ବିଜେଡି ବିଧାୟକ କଲିକେଶ ସିଂଦେଓଙ୍କୁ ସମାଲୋଚନା କରିଛନ୍ତି ଦଳର ରାଜ୍ୟସଭା ସଂସଦ ଦେବାଶିଷ ସାମନ୍ତରାୟ। ଏକା ପାରିବେନି କଳିକେଶ । ବିଜେଡି ନେତୃତ୍ବ ପ୍ରସଙ୍ଗରେ ଏଭଳି ମନ୍ତବ୍ୟ ଦେଇଛନ୍ତି ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ। କଳିକେଶ ସିଂଦେଓ ବିଜେଡିରେ ନେତୃତ୍ୱ ନିଅନ୍ତୁ ବୋଲି ଦିବ୍ୟ ଶଙ୍କର ମିଶ୍ର କଥାକୁ ସେ ସମର୍ଥନ ଜଣାଇଛନ୍ତି । ସେ ଜଣେ ଯୁଵ ଦକ୍ଷ ନେତା, ତାଙ୍କ ପରିବାର ସହ ନବୀନ ପଟ୍ଟନାୟକଙ୍କ ପରିବାର ସହ ବହୁତ ଭଲ ସମ୍ପର୍କ। ସେ ନବୀନଙ୍କୁ ଭେଟିବା ନୁଆ କଥା ନୁହେଁ । ହେଲେ କଳିକେଶ ଏକୁଟିଆ ନେତୃତ୍ୱ ନେଇପାରିବେ ନାହିଁ । ବର୍ତ୍ତମାନ ସମୟ ସମସ୍ତଙ୍କୁ ସାଙ୍ଗରେ ନେଇକି ଯିବାର ଅଛି। କିଛି ନେତାଙ୍କୁ ବର୍ତ୍ତମାନ ଅଣଦେଖା କରାଯାଉଛି ସେମାନଙ୍କୁ ସାଙ୍ଗରେ ନେଇ କାମ କଲେ ଦଳ ଆଗକୁ ବଢିବ ଏବଂ ପଞ୍ଚାୟତ ନିର୍ବାଚନରେ ଭଲ କରିବ। ସମସ୍ତ ଙ୍କୁ ଏକାଠି ନେଇ କାମ ନ କଲେ ଦଳ ପାଇଁ କ୍ଷତି ହେବ ବୋଲି କହିଛନ୍ତି ଦେବାଶିଷ ।

ବିଜେଡିରେ ଏବେ ଗୋଷ୍ଠୀ ବିବାଦ ଜଳ ଜଳ । ଆଣ୍ଟି ପାଣ୍ଡିଆନ ଗୋଷ୍ଠୀ ଗୋଟିଏ ପରେ ଗୋଟିଏ ମେଳି କରି ପ୍ରୋ ପାଣ୍ଡିଆନ ଗୋଷ୍ଠୀଙ୍କୁ ଦେଉଛନ୍ତି ଖୋଲା ଚ୍ୟାଲେଞ୍ଜ । ଏଭଳି ସ୍ଥିତିରେ ଦଳରେ ନୂଆ ନେତାଙ୍କୁ ଦାୟିତ୍ୱ ଦେବା ପାଇଁ ବି ଖୋଲା ଖୋଲି କହିଲେଣି ଲତିକାଙ୍କ ପରି ନେତ୍ରୀ । ଗତ ନିର୍ବାଚନରେ କଣ୍ଟାବାଞ୍ଜିରୁ ନବୀନ ନିଜେ ହାରି ଯାଇଥିବା ବେଳେ ପଶ୍ଚିମ ଓଡ଼ିଶାରେ ସଂଗଠନ ଦୁର୍ବଳ ହେଉଛି । ଏଭଳି ସ୍ଥିତିରେ ଏୟୁ ସିଂ ଦେଓଙ୍କ ସହ ଆଲୋଚନା ପରେ କଳିକେଶଙ୍କ ସହ ନବୀନଙ୍କ ବୈଠକ ଦଳୀୟ ସଂଗଠନରେ ନୂଆ ସମୀକରଣ ଆଡ଼କୁ ଇସାରା କରୁଛି ।

ସୂତ୍ର ଅନୁସାରେ ସିଂହଦେଓଙ୍କୁ ଏକ ଗୁରୁତ୍ୱପୂର୍ଣ୍ଣ ସାଂଗଠନିକ ଦାୟିତ୍ୱ ଦିଆଯାଇପାରେ, ଯାହା ଦଳର ଆଞ୍ଚଳିକ ପ୍ରତିନିଧିତ୍ୱକୁ ସନ୍ତୁଳିତ କରିବ । ରାଜନୈତିକ ଆଲୋଚନାରେ ତାଙ୍କ ନାଁ ଗତ ସପ୍ତାହ ଧରି ବେଶ ଚର୍ଚ୍ଚାରେ ରହିଛି । ରାଜନୈତିକ ବିଶାରଦମାନେ ମତ ରଖିଛନ୍ତି ଯେ ତାଙ୍କ ଅଭିଜ୍ଞତା, ତୃଣମୂଳ ସ୍ତରର ସଂଯୋଗ ଏବଂ ବିଭିନ୍ନ ନିର୍ବାଚନମଣ୍ଡଳୀରେ ସମର୍ଥନ ସଂଗ୍ରହ କରିବାର କ୍ଷମତା ଦଳକୁ ବେଶ ସହାୟ ହୋଇପାରେ ।

ବବିଙ୍କ ପାଇଁ ଦଳରେ ତିଆରି କରାଯାଇଥିଲା ସଂଗଠନ ସମ୍ପାଦକ ପଦ । ଦାୟିତ୍ୱରେ ଥିବା ବେଳେ ବବିଙ୍କର ବି ଥିଲା ଦଳରେ ବେଶ ଦବଦବା । ଏବେ ସେ ପଦବୀ ଖାଲି ପଡ଼ିଛି । କଳିକେଶଙ୍କୁ ସଂଗଠନ ଦାୟିତ୍ୱ ଦିଆଯିବା ଚର୍ଚ୍ଚା ଭିତରେ ପ୍ରଶ୍ନ ବିଦ୍ରୋହୀଙ୍କ ଭିତରେ କୁହଳୁଥିବା ଅସନ୍ତୋଷର ନିଆଁ ପଡ଼ିବ ତ ଥଣ୍ତା ?
ଏଥିସହ ପଢ଼ନ୍ତୁ: ଅଧିକାରୀଙ୍କୁ ମନ୍ତ୍ରୀ ରବି ନାରାୟଣ ନାୟକଙ୍କ ଚେତାବନୀ, କାମ ନ କଲେ ସିଧା ନିଲମ୍ବନ