କନ୍ଧମାଳ ଜିଲ୍ଲା କ-ନୂଆଗାଁ ବ୍ଲକ ଗୁଡରୀ ପଡ଼ି ଗାଁରୁ ଆସିଛି ଅଭାବନୀୟ ଦୃଶ୍ୟ । ମୁରଡ଼ି ଗାଁର ନନ୍ଦିନୀ ପ୍ରଧାନ ନାମକ ଜଣେ ମହିଳାଙ୍କ ପ୍ରସବ ବେଦନା ହେବାରୁ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । କିନ୍ତୁ ଗାଁକୁ ପକ୍କା ସଡକ ନଥିବାରୁ ଗାଡ଼ି ଯାଇ ପାରିନଥିଲା । ବାଧ୍ୟ ହୋଇ ଗ୍ରାମବାସୀଙ୍କ ସହାୟତାରେ ଷ୍ଟ୍ରେଚରରେ ବୁହା ହେଲେ ମହିଳା । ବରାନଇରେ ଜୀବନକୁ ବାଜିରେ ଲଗାଇ ହେଲେ ନଦୀପାର। ଖାଲି ଆଜିର ନୁହେଁ । ୩ଟି ଗାଁ ପାଇଁ ବିପଦ ସାଜିଛି କାଡ଼ିପେନୁ ନଦୀ। ଗୁଞ୍ଜିବାଡ଼ି ପଂଚାୟତର ଗୁଡରୀ ପଡ଼ି , ବାଣ୍ଡେସ ପଦର, ଶୁଗାମାହା ଏ ତିନୋଟି ଗାଁକୁ ଆଜି ପର୍ଯ୍ୟନ୍ତ ଖଣ୍ଡିଏ ପକ୍କା ରାସ୍ତା ସଂଯୋଗ ହୋଇ ନାହିଁ।

ପ୍ରତିଦିନ ରାସ୍ତା ଓ ପୋଲ ସମସ୍ୟା ପାଇଁ ଲୋକେ ଜୀବନକୁ ବାଜିରେ ଲଗାଇ କରନ୍ତି ଜଳ ଯାତ୍ରା। ଆଜି ପର୍ଯ୍ୟନ୍ତ ଗାଁକୁ ପକ୍କା ରାସ୍ତା ନଥିବାରୁ ହନ୍ତସନ୍ତ ହେଉଛନ୍ତି ଗ୍ରାମବାସୀ । ଏନେଇ ବାରମ୍ବାର ଅଭିଯୋଗ ପରେବି ହେଉନି ସମସ୍ୟାର ସମାଧାନ ଫଳରେ ଭରା ନଦୀରେ ବାଜିରେ ଲାଗୁଛି ଜୀବନ ଓ ଜୀବିକା । ବାଲିଗୁଡ଼ା ନିର୍ବାଚନ ମଣ୍ଡଳୀର ଦୁଇ ଦୁଇ ଥର ର ବିଜେଡ଼ି ବିଧାୟକଙ୍କ ନିଜ ବ୍ଲକର ବିକଳ ଚିତ୍ର। ନଦୀ ସେପଟେ ନିଜର ପରିବାର ତଥା ଜୀବନ ଓ ନଦୀ ଏପଟେ ଜୀବିକା। ଯେଉଁଥି ପାଇଁ ନିତିଦିନ ଏ ତିନି ଗାଁ ଲୋକେ ଜୀବନକୁ ବାଜି ଲଗାଇ ନଦୀ ଅତିକ୍ରମ କରୁଛନ୍ତି।