କିଡନୀ ରୋଗରେ ମାଲକାନଗିରି ଜିଲ୍ଲା କାଲିମେଳା ବ୍ଲକ କୋମେଟଲା ପଞ୍ଚାୟତ ଏମ୍ ପି ଭି-୩୩ ଗାଁ । କିଡନୀ ରୋଗ ଭୟରେ ଆତଙ୍କିତ ଲୋକେ । ଗାଁରେ ଫେଲ୍ ମାରିଛି ବସୁଧା ଯୋଜନା । ନଳକୂପର ଦୂଷିତ ପାଣି ପିଇ ବିଭିନ୍ନ ରୋଗର ଶିକାର ହେଉଥିବା ଅଭିଯୋଗ ଆଣିଛନ୍ତି ଗ୍ରାମବାସୀ ।

ଆମେ କହୁଛୁ ମାଲକାନଗିରି ଜିଲ୍ଲା କାଲିମେଳା ବ୍ଲକ କୋମେଟଲା ପଞ୍ଚାୟତ ଏମ୍ ପି ଭି-୩୩ ଗାଁର କଥା । ଗାଁରେ ବସବାସ କରନ୍ତି ୨୦୦ରୁ ଉର୍ଦ୍ଧ ପରିବାର । ହେଲେ ବିକାଶ ଏମାନଙ୍କ ପାଇଁ ସାତ ସପନ । ଦୈନନ୍ଦିନ ଜୀବନ କାଟିବାକୁ ନା ଅଛି ସ୍ବାସ୍ଥ୍ୟ ସେବା, ନା ପିଇବାକୁ ମିଳୁଛି ବିଶୁଦ୍ଧ ପାଣି । ଗାଁର ମୁଖ୍ୟ ସମସ୍ୟା ହେଲା କିଡ଼ନୀ ରୋଗ l ଦୀର୍ଘ ବର୍ଷ ଧରି ଏହି ରୋଗ କାୟା ବିସ୍ତାର କରି ଅନେକ ଲୋକର ଜୀବନ ନେଲାଣି । ୫ ବର୍ଷରେ ୩୦ରୁ ଉର୍ଦ୍ଧ କିଡ଼ନୀ ରୋଗ ମୃତ୍ୟୁ ମୁଖରେ ପଡିଥିବା ବେଳେ ଗତ ଅଗଷ୍ଟ ଓ ସେପ୍ଟେମ୍ବର ମାସରେ ୩ ଜଣଙ୍କ ମୃତ୍ୟ ହୋଇଛି । ଆଜିବି ୨୦ରୁ ଉର୍ଦ୍ଧ ଲୋକ କିଡ଼ନୀ ରୋଗରେ ଆକ୍ରାନ୍ତ ହୋଇ ଜୀବନ ମରଣ ସହ ସଂଘର୍ଷ କରୁଛନ୍ତି ।

ଗାଁରେ ୯ ଟି ନଳକୂପ ରହିଥିବା ବେଳେ ସେଥିରୁ ୪ଟି ଅଚଳ ହୋଇ ପଡ଼ି ରହିଛି । ଅନ୍ୟ ନଳକୂପରୁ ଆଇରନ୍ ସହ ଗୋଳିଆ ପାଣି ବାହାରୁଛି । ଅନ୍ୟ କୌଣସି ଉପାୟ ନପାଇ ଲୋକେ ବାଧ୍ୟ ହୋଇ ସେହି ପାଣି ପିଉଥିବାରୁ ବିଭିନ୍ନ ରୋଗର ଶିକାର ହେଉଥିବା ଅଭିଯୋଗ କରିଛନ୍ତି । ଗାଁରେ ବସୁଧା ଯୋଜନା ପାଲଟିଛି ଧୋକା । ଏଠାରେ ପ୍ରକଳ୍ପ କରାଯାଇଥିଲେ ମଧ୍ୟ ନିମ୍ନମାନର କାମ ଯୋଗୁଁ ପାନୀୟ ପ୍ରକଳ୍ପ ଆଜି ଯାଏଁ କାର୍ଯ୍ୟକ୍ଷମ ହୋଇ ପାରିନାହିଁ l ଏଠାରେ ଯନ୍ତ୍ରୀ ଓ ଠିକାଦାରଙ୍କ ମିଲତ ଭଗତରେ ଅର୍ଥ ଆତ୍ମସାତ୍ ହୋଇଥିବା ଅଭିଯୋଗ ହୋଇଛି ।

ଏମ୍. ପି. ଭି. ୩୩ ଗ୍ରାମ ଭଳି ଅନେକ ଦୁର୍ଗମ ଗାଆଁର ଗ୍ରାମବାସୀ ଆଜି ବି ଅଭିଶପ୍ତ ଜୀବନ ବିତାଉଛନ୍ତି । କେବଳ ପାଣି ପରୀକ୍ଷା ନାଁରେ ବର୍ଷ ବର୍ଷ ଧରି ସମୟ ଗଡି ଚାଲିଛି । ହେଲେ ସମାଧାନର ରାସ୍ତା ଏପର୍ଯ୍ୟନ୍ତ ବାହାରି ପାରିନାହିଁ l ତେବେ କେବେ ହେଉଛି ପାଣି ସମସ୍ୟାର ସମାଧାନ ତାକୁ ହିଁ ଅପେକ୍ଷା ।