ଭୁବନେଶ୍ଵର: ଖୋଲୁଛି କିଟ୍‌ର ଭାନୁମତୀ ପେଡ଼ି । ପଦାକୁ ଆସୁଛି ଗୋଟିଏ ପରେ ଗୋଟିଏ କେଳେଙ୍କାରୀ । ଅଭିଯୋଗ, ଶହ ଶହ ଏକର ଜଙ୍ଗଲ ଜମି ମାଡ଼ି ବସି ଅଚ୍ୟୁତ ଚଳାଇଥିଲେ ସାମ୍ରାଜ୍ୟ । ସାଂସଦ ଥିବା ସମୟରେ କନ୍ଧମାଳରେ ବି କରିଥିଲେ ଜମି ଜବରଦଖଲ । ବିଜେଡି ପୃଷ୍ଠପୋଷକତାରେ ସାମନ୍ତ ଚଳାଇଥିଲେ କି ମନମାନୀ ?

ନେପାଳୀ ଛାତ୍ରୀଙ୍କ ଆତ୍ମହତ୍ୟା ପ୍ରସଙ୍ଗରେ ଏବେ ବିବାଦରେ କିଟ୍ ଏବଂ କିଟ୍ ପ୍ରତିଷ୍ଠାତା ଅଚ୍ୟୁତ ସାମନ୍ତ । ଅଚ୍ୟୁତଙ୍କ ନାଁରେ ରହିଛି ଜମି କେଳେଙ୍କାରୀର ସଙ୍ଗୀନ ଅଭିଯୋଗ । ବେଆଇନ ଭାବେ ଜଙ୍ଗଲ ଜମି ମାଡ଼ି ବସିଛନ୍ତି କିଟ୍ କର୍ତ୍ତୃପକ୍ଷ । ବିଜେଡି ପୃଷ୍ଠୋପୋଷକତାରେ ଅଚ୍ୟୁତ ଚଲାଇଥିଲେ କି କେଳେଙ୍କାରୀ ? ଅଚ୍ୟୁତ ସାମନ୍ତ କେଉଁ ଦଳର ସାଂସଦ ଥିଲେ ଏବଂ ତାଙ୍କୁ କିଏ କୋଳରେ ବସାଇଥିଲେ ବୋଲି ପଚାରିଛନ୍ତି ବିଜେପି ବିଧାୟକ ଟଙ୍କଧର ତ୍ରିପାଠୀ ।

କେଳେଙ୍କାରୀ ନମ୍ବର-୧

ଭୁବନେଶ୍ଵରରେ ଥିବା କଳିଙ୍ଗ ଇନଷ୍ଟିଚ୍ୟୁଟ୍ ଅଫ ସୋସିଆଲ ସାଇନ୍ସ ବା କିସ୍‌କୁ ଜଙ୍ଗଲ ଜମି ଆବଣ୍ଟନ ମାମଲାରେ କଡ଼ା ଆଭିମୁଖ୍ୟ ପୋଷଣ କରିଥିଲେ କେନ୍ଦ୍ର ସରକାର । କିସକୁ ଦିଆ ଯାଇଥିବା ୪ ହେକ୍ଟର ଜଙ୍ଗଲ ଜମିର କିସମ ପରିବର୍ତ୍ତନ ଉପରେ ରୋକ ଲଗାଇଥିଲେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରାଳୟ । ଚନ୍ଦକା ବନ୍ୟଜନ୍ତୁ ଡିଭିଜନ ଅଧୀନରେ ଥିବା ୪.୦୩୨ହେକ୍ଟର ଜଙ୍ଗଲ ଜମିର କିସମ ପରିବର୍ତ୍ତନ ପ୍ରକ୍ରିୟାରେ ସ୍ପଷ୍ଟୀକରଣ ନ ମିଳିବା ପର୍ଯ୍ୟନ୍ତ କୌଣସି ପଦକ୍ଷେପ ନ ନେବାକୁ ଖୋର୍ଦ୍ଧା ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ କେନ୍ଦ୍ର ସରକାର । ମୁଖ୍ୟ ସଚିବଙ୍କୁ ଆବଶ୍ୟକ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଥିଲେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ ।

କେଳେଙ୍କାରୀ ନମ୍ବର- ୨

ଅଭିଯୋଗ ହୋଇଛି ଯେ, ଶହ ଶହ ଏକର ଜଙ୍ଗଲ ଜମି ମାଡ଼ି ବସି ଅଚ୍ୟୁତ ସାମନ୍ତ ଚଳାଇଥିଲେ ମାଫିଆ ରାଜ୍ । କେବେ ଜଙ୍ଗଲ ଜମି ଅଧିଗ୍ରହଣ କରିଛନ୍ତି ତ ଆଉ କେବେ ବିନା BDA ଅନୁମତିରେ ଜଙ୍ଗଲ ଜମିରେ ନିର୍ମାଣ କରିଛନ୍ତି ମଲ୍ଟି ଷ୍ଟୋରେଜ ବିଲ୍ଡିଂ । ସୂଚନା ଅଧିକାର ଆଇନ୍ ବଳରେ KIIT କେଳେଙ୍କାରୀର ଅନେକ ଗୁମର ଖୋଲିଥିବା ବେଳେ ଅଚ୍ୟୁତ ସାମନ୍ତଙ୍କ କେଲେଙ୍କାରୀ ଅନେକ ଚିଠା ହସ୍ତଗତ ହୋଇଛି ।

କେଳେଙ୍କାରୀ ନମ୍ବର- ୩

ଏମିତିକି ଅନେକ ଜଙ୍ଗଲ ଜମି ହାତେଇଥିବା KIIT,KISSର ପ୍ରତିଷ୍ଠାତା ଅଚ୍ୟୁତ ସାମନ୍ତ ପରବର୍ତ୍ତୀ ସମୟରେ ପୂର୍ବ BJD ରାଜ୍ୟ ସରକାରଙ୍କ ଅଫିସରଙ୍କୁ ହାତ କରି ଶହ ଶହ ଏକର ଜମିକୁ GA, PG ଓ IDCOକୁ ହାତ କରି ହାତେଇ ନେଇଥିବା ଅଭିଯୋଗ ହୋଇଛି । କିଟ କ୍ୟାମ୍ପସରେ ବିଭିନ୍ନ ସମୟରେ ମାନବାଧିକାର ଉଲ୍ଲଂଘନର ଅଭିଯୋଗମାନ ମଧ୍ୟ ଆସିଛି ।