କୋରାପୁଟ କୋଟିଆକୁ ନେଇ ଦୀର୍ଘ ଦିନ ଧରି ବିବାଦ ଲାଗିରହିଛି । ଗତ ୨୪ ବର୍ଷର ସରକାରଙ୍କ ଉଦାସୀନ ମନୋଭାବ ଯୋଗୁଁ ସୀମା ବିବାଦ ତୁଟିପାରି ନାହିଁ । ଏବେ ନୂଆ ସରକାର ଆରମ୍ଭ କରିଛନ୍ତି ପ୍ରୟାସ । କୋଟିଆ ବିବାଦ ତୁଟାଇବା ପାଇଁ ସରକାର ଅଣ୍ଟା ଭିଡ଼ିଛନ୍ତି ।

ସରକାରଙ୍କ ପକ୍ଷରୁ କୁହାଯାଇଛି କୋଟିଆ ପାଇଁ ତିଆରି ହେବ ସ୍ୱତନ୍ତ୍ର ରୋଡ ମ୍ୟାପ୍ । ସୁପ୍ରିମକୋର୍ଟରେ ହାରିଥିବା ମାମଲାକୁ ପୁନଃ ଜୀବିତ କରାଯିବ । ବୈଠକରେ ସମସ୍ତ ବିଭାଗକୁ ଏଭଳି ନିର୍ଦ୍ଦେଶ ଦେଇଛନ୍ତି ରାଜସ୍ବ ମନ୍ତ୍ରୀ । ମାସେ ମଧ୍ୟରେ ନିଜ ନିଜ ବିଭାଗର ରୋଡମ୍ୟାପ ଦେବାକୁ ନିର୍ଦ୍ଦେଶ ରହିଛି । ସବୁ ବିଭାଗ ସଚିବ ମାନଙ୍କୁ ନିର୍ଦ୍ଦେଶ ଦିଆଯାଇଛି ଜିଲ୍ଲାପାଳଙ୍କ ସହ ଆଲୋଚନ କରି ନିଜ ବିଭାଗର ଯୋଜନା ଏବଂ ରୋଡମ୍ୟାପ ଦେବେ ।

ଆର୍ଥିକ, ସାମାଜିକ, ସଂସ୍କୃତିକ ବିକାଶ ପାଇଁ ଯୋଜନା ହାତକୁ ନିଆଯିବ । ରାସ୍ତା ଘାଟ ସହ ଭିତ୍ତିଭୂମିର ବିକାଶ, ଚାଷୀଙ୍କ ପାଇଁ ମାର୍କେଟର ସୁବିଧା, ଯୁବକଙ୍କ ପାଇଁ ରୋଜଗାର ଭଳି ରୋଡ ମ୍ୟାପ ତିଆରି ହେବ । ଲୋକଙ୍କ ପାଖରେ ସବୁ ସୁବିଧା କେମିତି ପହଂଚିବ ସେନେଇ ଗୁରୁତ୍ୱ ଦିଆଯିବ କହିଛନ୍ତି ରାଜସ୍ବ ମନ୍ତ୍ରୀ ସୁରେଶ ପୁଜାରୀ ।

ସେ ଆହୁରି କହିଛନ୍ତି, କୋଟିଆ ଓଡ଼ିଶାର ଅଭିଛେଦ୍ୟ ଅଙ୍ଗ । ଏହାକୁ ନେଇ ସାଲିସ ହେବନି । ଏହା ୧୦୦ ବର୍ଷର ସମସ୍ୟା । ଓଡ଼ିଶା ଏବଂ ଆନ୍ଧ୍ର ଭିତରେ ବିବାଦ ଲାଗି ରହିଛି । ମାଲି ମୋକଦ୍ଦମା ମଧ୍ୟ ଚାଲିଥିଲା । କିନ୍ତୁ ଠିକ ଭାବେ ପରିଚାଳନା ନହେବା କାରଣରୁ ଓଡିଶା କ୍ଷତିଗ୍ରସ୍ତ ହେଲା । ଠିକ ଭାବେ ତଥ୍ୟ ରଖି ପାରିଲାନି ପୂର୍ବ ସରକାର ।

ଆଜି ବିକଶିତ କୋଟିଆ ପାଇଁ ରାଜସ୍ବ ମନ୍ତ୍ରୀଙ୍କ ଅଧ୍ୟକ୍ଷତାରେ ଗଠନ ହୋଇଥିବା କମିଟିର ବସିଥିଲା ପ୍ରଥମ ବୈଠକ । ଯେଉଁଥିରେ କମିଟିର ସଦସ୍ୟ ଥିବା ଏକାଧିକ ବିଭାଗର ସଚିବ, କୋରପୁଟ ଜିଲ୍ଲପାଳ, ଏସପି ଏବଂ ପୂର୍ବତନ ଜିଲ୍ଲାପାଳ ମଧ୍ୟ ଉପସ୍ଥିତ ଥିଲେ ।