ଜଗତସିଂହପୁର: ପୋଲିସକୁ ବାନ୍ଧିଲା ପୋଲିସ । ବନ୍ଧା ହେଲେ କୁଜଙ୍ଗ ଥାନା ବାବୁ । ବିବାହର ପ୍ରତିଶ୍ରୁତି ଦେଇ ଶାରିରୀକ ସମ୍ପର୍କ ରଖି ପ୍ରତାରଣା କରିବା ଅଭିଯୋଗରେ କୁଜଙ୍ଗ ଥାନା ଅଧିକାରୀଙ୍କୁ ଗିରଫ କରିଛି ପୋଲିସ । କୁଜଙ୍ଗ ଥାନା ଅଧିକାରୀ ତପନ କୁମାର ନାହାକ ଗିରଫ ହୋଇଥିବା ବେଳେ ତାଙ୍କୁ ନିଲମ୍ବିତ କରିଛନ୍ତି ପୋଲିସ ଡିଜି ।

ତପନ ନାହାକଙ୍କ ବିରୋଧରେ ବିଏନଏସ୍ ଦଫା ୬୮, ୬୯ ଲଗାଇଛି ପୋଲିସ । ସୂଚନା ଅନୁସାରେ, ତପନ କୁମାର ନାହକ ଜଗତସିଂହପୁର ସଦର ଥାନାର ଅତିରିକ୍ତ ଥାନା ଅଧିକାରୀ ଥିବା ସମୟରେ ଜଣେ ମହିଳା ହୋମ୍ ଗାର୍ଡଙ୍କ ସହ ସମ୍ପର୍କ ଗଢ଼ି ଉଠିଥିଲା । ପରେ ନିଜ କ୍ଷମତାର ଅପ ବ୍ୟବହାର କରି ତପନ ବିବାହର ପ୍ରତିଶ୍ରୁତି ଦେଇ ଶାରିରୀକ ସମ୍ପର୍କ ରଖିଥିଲେ । ଆଉ ପରେ କରିଥିଲେ ପ୍ରତାରଣା ।

ଏନେଇ ମହିଳା ହୋମଗାର୍ଡ ଜଣଙ୍କ ଜଗତସିଂହପୁର ଏସ୍‌ପିଙ୍କ ଦ୍ଵାରସ୍ଥ ହୋଇଥିଲେ । ଏହା ପରେ ଜଗତସିଂହପୁର ପୋଲିସର ୯ ଜଣିଆ ଟିମ୍ ଛାନଭିନ୍ କରିଥିଲା । ପୀଡ଼ିତାଙ୍କ ଏତଲା ପରେ କୁଜଙ୍ଗ ଥାନା ଛାଡ଼ି ତପନ ନାହାକ ଫେରାର୍ ହୋଇ ଯାଉଥିବା ବେଳେ ଖୋର୍ଦ୍ଧା ନିକଟରେ ମାଡ଼ି ବସିଥିଲା ପୋଲିସ ।

ଗିରଫ ତପନଙ୍କୁ ଆଜି ସଦର ଥାନା ପୋଲିସ ଜଗତସିଂହପୁର କୋର୍ଟରେ ହାଜର କରିଛି । ଏହା ପୂର୍ବରୁ ତପନ କନ୍ଧମାଳ ଜିଲ୍ଲା ଫିରିଙ୍ଗିଆ ଥାନାରେ ଥିବା ବେଳେ ତାଙ୍କୁ ନିଲମ୍ବିତ କରାଯାଇଥିଲା । ଏବେ ପୁଣି ଥରେ ସେ ହୋମଗାର୍ଡଙ୍କୁ ବିବାହ ପ୍ରତିଶ୍ରୁତି ଦେଇ ପ୍ରତାରଣା ଅଭିଯୋଗରେ ଗିରଫ ହେବା ସହ ନିଲମ୍ବିତ ହୋଇଛନ୍ତି ।

Argus News | argus news | -Argusnews Home: Odisha Latest News, Breaking News, Trending News, Live TV and more