ଭୁବନେଶ୍ଵର: କେତେବେଳେ ପରଦାରେ ଭାଇ ତ ଆଉ କେବେ ସ୍ଵାମୀ ପୁଣି ଆଉ କେବେ ବାପାର ନିଖୁଣ ଅଭିନୟ । ପ୍ରତିଟି ଚରିତ୍ରରେ ନିଜକୁ ହଜାଇ ଦେଉଥିଲେ ସେ । ୭୦ ଦଶକରୁ ସିଲଭର୍ ସ୍କ୍ରିନ୍‌ରେ ରାଜ କରୁଥିଲେ । ଆଉ ଆଜି ସେ ସ୍ଵର ନିରବି ଯାଇଛି । ଦିଲ୍ଲୀର ଏକ ଘରୋଇ ହସ୍ପିଟାଲ୍‌ରେ ବିଳମ୍ବିତ ରାତିରେ ଉତ୍ତମ ମହାନ୍ତି ଆଖି ବୁଜିଥିଲେ ।

ଆଜି ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହ ସତ୍ୟନଗର ଶ୍ମଶାନରେ ଉତ୍ତମ ମହାନ୍ତିଙ୍କ ଶେଷକୃତ୍ୟ ସମ୍ପନ୍ନ ହୋଇଛି । ପୁଅ ବାବୁସାନ ମହାନ୍ତି, ଉତ୍ତମଙ୍କୁ ମୁଖାଗ୍ନି ଦେଇଛନ୍ତି । ଉତ୍ତମଙ୍କ ଦେହାନ୍ତରେ ଗୋଟିଏ ଯୁଗର ଅନ୍ତ ହୋଇଥିବା ବେଳେ ଝୁରୁଛନ୍ତି ସମସ୍ତେ । କି ବୁଢ଼ା କି ପିଲା ସମସ୍ତଙ୍କ ମୁହଁରେ ଗୋଟିଏ କଥା ଉତ୍ତମ ମହାନ୍ତି ଆଉ ନାହାନ୍ତି ।

୧୩୫ଟିରୁ ଅଧିକ ଓଡ଼ିଆ ଫିଲ୍ମରେ ଅଭିନୟର ଛାପ ଛାଡ଼ିଥିବା ଉତ୍ତମ ମହାନ୍ତି ବଙ୍ଗାଳୀ ଓ ହିନ୍ଦୀ ଫିଲ୍ମ ବି କରିଥିଲେ । ୧୯୭୭ରେ 'ଅଭିମାନ' ଫିଲ୍ମରୁ ଓଡ଼ିଆ ଚଳଚ୍ଚିତ୍ରରେ କ୍ୟାରିଅର ଆରମ୍ଭ କରି ଦେଇଥିଲେ ଗୋଟିଏ ପରେ ଗୋଟିଏ ହିଟ୍ ଫିଲ୍ମ । ଜୀବନର ଶେଷ ସମୟ ପର୍ଯ୍ୟନ୍ତ ସେ ସିନେମା ସହ ଜଡ଼ିତ ଥିଲେ । ୨୦୨୨ରେ ରିଲିଜ୍ ହୋଇଥିବା 'ବିଦ୍ୟାରାଣ'ରେ ତାଙ୍କୁ ଶେଷ ଥର ଦେଖିବାକୁ ମିଳିଥିଲା ।

ସିଲଭର୍ ସ୍କ୍ରିନ୍‌ରେ ଅଧା ଦଶନ୍ଧି

୨୩ ଡିସେମ୍ୱର ୧୯୫୮ରେ ବାରିପଦାରେ ଜନ୍ମ ହୋଇଥିଲେ ଉତ୍ତମ । 'ଅଭିମାନ' ଚଳଚ୍ଚିତ୍ରରୁ ଆରମ୍ଭ ହୁଏ ତାଙ୍କ ଫିଲ୍ମ କ୍ୟାରିୟର । ଦୀର୍ଘ ୪୮ ବର୍ଷ ଧରି ସେ ସିନେ ଇଣ୍ଡଷ୍ଟ୍ରିରେ ରାଜ କରିଥିଲେ । ୭୦ ଦଶକରେ ଗୋଟିଏ ପରେ ଗୋଟିଏ ହିଟ୍‌ ଫିଲ୍ମ ଭେଟି ଦେଇ ଦର୍ଶକଙ୍କ ପ୍ରିୟ ହିରୋ ପାଲଟିଥିଲେ । ଉତ୍ତମ ମହାନ୍ତିଙ୍କ ନୂଆ ଫିଲ୍ମ ଆସିବା ଶୁଣିଲେ ହଲ୍ ହେଉଥିଲା ହାଉସ୍‌ ଫୁଲ୍ । ଅନେକ ହିଟ୍ ଫିଲ୍ମରେ ଅଭିନୟ କରି ଲୋକପ୍ରିୟତା ହାସଲ କରିଥିବା ଉତ୍ତମ ଟିଭି ସିରିଏଲରେ ମଧ୍ୟ କାମ କରିଛନ୍ତି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV