ପୁରୀ: ଦେବେନ୍ଦ୍ର ପ୍ରଧାନଙ୍କ ଦେହାନ୍ତରେ ଆଉ ଏକ ଯୁଗର ଅନ୍ତ ହୋଇଛି । ଦୀପ ଭଳି ଜଳି ଜଳି ସମାଜକୁ ଆଲୋକିତ କରୁଥିବା ଦେବେନ୍ଦ୍ର ପ୍ରଧାନ ପଞ୍ଚଭୂତରେ ବିଲୀନ ହୋଇଛନ୍ତି । ରାଷ୍ଟ୍ରୀୟ ମର୍ଯ୍ୟାଦା ସହ ପୁରୀ ସ୍ଵର୍ଗଦ୍ଵାରରେ ସମ୍ପନ୍ନ ହୋଇଛି ଡକ୍ଟର ଦେବେନ୍ଦ୍ର ପ୍ରଧାନଙ୍କ ଶେଷକୃତ୍ୟ । ଶେଷକୃତ୍ୟ ପୂର୍ବରୁ ଡକ୍ଟର ଦେବେନ୍ଦ୍ର ପ୍ରଧାନଙ୍କୁ ଗାର୍ଡ ଅଫ୍ ଅନର ଦିଆ ଯାଇଥିଲା ।

ଦେବେନ୍ଦ୍ରଙ୍କ ଅନ୍ତିମ ସଂସ୍କାରରେ ଯୋଗ ଗୁରୁ ବାବା ରାମଦେବଙ୍କ ସହ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଏକାଧିକ ମନ୍ତ୍ରୀ, ସାଂସଦ ଓ ବିଧାୟକ ଉପସ୍ଥିତ ରହିଥିଲେ । ରାଜ୍ୟ ବାହାରର ଅନେକ ନେତା ବି ସାମିଲ୍ ହୋଇଥିଲେ । ଲୋକାରଣ୍ୟ ହୋଇ ଉଠିଥିଲା ସ୍ଵର୍ଗଦ୍ଵାର । ସମସ୍ତଙ୍କ ଲୋତକରେ ଝରି ଆସୁଥିଲା ଲୁହ । ଦୁଃଖରେ ମ୍ରିୟମାଣ ହୋଇ ପଡ଼ିଥିଲେ ଏକାଠି ହୋଇଥିବା ଜନଗଣ । ଦଳମତ ନିର୍ବିଶେଷରେ ସମସ୍ତେ ସାମିଲ୍ ହୋଇଥିଲେ ଦେବେନ୍ଦ୍ର ପ୍ରଧାନଙ୍କ ଶେଷକୃତ୍ୟରେ ।

ମଙ୍ଗଳବାର ସକାଳୁ ଭୁବନେଶ୍ଵର ଚନ୍ଦ୍ରଶେଖରପୁର ସ୍ଥିତ ବାସଭବନରୁ ଦେବେନ୍ଦ୍ର ପ୍ରଧାନଙ୍କ ମରଶରୀରକୁ ପୁରୀ ଅଭିମୁଖେ ନିଆ ଯାଇଥିଲା । ଦେବେନ୍ଦ୍ରଙ୍କ ଶେଷ ଯାତ୍ରାରେ ସାମିଲ୍ ହୋଇଥିଲେ ହଜାର ହଜାର ଲୋକ । ପାର୍ଥିବ ଶରୀରକୁ ପୁରୀ ନେବା ରାସ୍ତାରେ ଦେବେନ୍ଦ୍ର ପ୍ରଧାନଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ ଲୋକେ ।

ସୋମବାର ୮୪ ବର୍ଷ ବୟସରେ ଦିଲ୍ଲୀରେ ଡକ୍ଟର ଦେବେନ୍ଦ୍ର ପ୍ରଧାନଙ୍କ ଦେହାନ୍ତ ହୋଇଥିଲା । ଡାକ୍ତରୀ ପେଶାରୁ ରାଜନୀତିକୁ ଆସି ଅଟଳ ବିହାରୀ ବାଜପେୟୀ ସରକାରରେ କେନ୍ଦ୍ର ପରିବହନ ମନ୍ତ୍ରୀ ହୋଇଥିଲେ ଦେବେନ୍ଦ୍ର ପ୍ରଧାନ । ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ଦାୟିତ୍ଵ ମଧ୍ୟ ତୁଲାଇ ଥିଲେ । ମଣ୍ଡଳ ସଭାପତିରୁ ରାଜ୍ୟ ସଭାପତି ଭାବେ କାର୍ଯ୍ୟ କରିଥିଲେ । ଓଡ଼ିଶାରେ ବିଜେପିର ସଂଗଠନର ମୂଳ ଦୁଆ ପକାଇବାରେ ଥିଲା ତାଙ୍କର ପ୍ରମୁଖ ଭୂମିକା । ଦେବେନ୍ଦ୍ରଙ୍କ ଶରୀର ସିନା ପଞ୍ଚଭୂତରେ ବିଲୀନ ହୋଇଛି, ସେ କିନ୍ତୁ ଓଡ଼ିଆଙ୍କ ପ୍ରାଣରେ ଘର କରି ନେଇଛନ୍ତି ଚିର ଦିନ ପାଇଁ ।

Argus News | argus news | Odisha Latest News, Breaking News, Trending News, Live TV