ଅର୍ଗସ ବ୍ୟୁରୋ: ଯାତ୍ରାରେ ଅଶ୍ଳୀଳତା ଉପରେ ଲାଗିବ ରୋକ୍ । ଆଜି ବିଧାନସଭା ଶୂନ୍ୟକାଳରେ ଉଠିଲା ଯାତ୍ରା ମଞ୍ଚରେ ଅଶ୍ଳୀଳତା ନୃତ୍ୟ ପ୍ରସଙ୍ଗ । ପ୍ରଥମେ ଏହି ପ୍ରସଙ୍ଗ ଉଠାଇଲେ କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି । ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୁରଜ ଏହାର କଡ଼ା ଜବାବ ଦେଲେ । କହିଲେ ବନ୍ଦ ହେବ ଯାତ୍ରାରେ ଅଶ୍ଳୀଳ ନୃତ୍ୟ । ଏଥିପାଇଁ ରାଜ୍ୟ ସରକାର ମାର୍ଗଦର୍ଶିକା ଆଣୁଛନ୍ତି । ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ଯାତ୍ରାରେ ଏଭଳି ନୃତ୍ୟ ଓଡ଼ିଆ ସଂସ୍କୃତି ବିରୋଧୀ । ରାଜ୍ୟ ସରକାର ଏହାକୁ ଗୁରୁତ୍ବର ସହ ନେଇଛନ୍ତି ।

ଦିନକୁ ଦିନ ଯାତ୍ରାରେ ନଗ୍ନ ନୃତ୍ୟ ଓ ଦ୍ବି ଅର୍ଥବୋଧକ ସଂଳାପ ବଢ଼ିଚାଲିଛି। ଦର୍ଶକଙ୍କ ରୁଚି କହି ଆଇଟମ୍ ଡ୍ୟାନ୍ସକୁ ପ୍ରୋତ୍ସାହନ ଦେଉଛନ୍ତି ଯାତ୍ରା ମାଲିକ ଓ ପରିଚାଳକ । ସିନେମା ଭଳି ଯାତ୍ରା ପାଇଁ ବି ସେନ୍ସର ବୋର୍ଡ ଗଠନ ହେଉ ବୋଲି ସ୍ବର ଉଠାଇଛି ବିଜେଡି। ଗୌତମବୁଦ୍ଧ ଦାସ କହିଛନ୍ତି ଯାତ୍ରା ଅଶ୍ଳୀଳତା ବନ୍ଦ ନେଇ ରାଜ୍ୟ ସରକାର ମାର୍ଗଦର୍ଶିକା ଆଣିଲେ ତାଙ୍କ ଦଳ ସ୍ବାଗତ କରିବ । ଯେଉଁ ଯାତ୍ରା ମାଲିକ ଅଶ୍ଳୀଳତାକୁ ପ୍ରଶ୍ରୟ ଦେଉଛନ୍ତି ସେମାନଙ୍କ ଉପରେ ସରକାର କାର୍ଯ୍ୟାନୁଷ୍ଠାନ ନିଅନ୍ତୁ । ସରକାରଙ୍କ ଏହି ନିଷ୍ପତ୍ତିକୁ ଆଇଟମ ଡ୍ୟାନସର୍ ବି ସ୍ବାଗତ କରିଛନ୍ତି।

ଓଡ଼ିଶାର କଳା ସଂସ୍କୃତି ସହ ଦଶକ ଦଶକ ଧରି ଜଡ଼ିତ ଯାତ୍ରା ପରମ୍ପରା । କିନ୍ତୁ ମନୋରଞ୍ଜନ ନାଁରେ ଯାତ୍ରାରେ ସୀମା ଲଂଘୁଛି ଅଶ୍ଳୀଳ ନୃତ୍ୟ। ଯାହା ଓଡ଼ିଆ ଅସ୍ମିତାର ପରିପନ୍ଥୀ । ଏବେ ସରକାର ଏଥିପାଇଁ ଆଇନ ଆଣିଲେ ଅଶ୍ଲୀଳତା ପାଇଁ ଯାତ୍ରା ପ୍ରତି ବିମୁଖ ହୋଇଯାଇଥିବା ବହୁ ଲୋକେ ପୁଣି ଏଥିପ୍ରତି ରୁଚି ଦେଖାଇବେ।

Argus News | argus news | Odisha Latest News, Breaking News, Trending News, Live TV