UP ଷ୍ଟାଇଲ୍ରେ ବିକାଶର ଷ୍ଟାଟିଷ୍ଟିକାଲ ରିପୋର୍ଟ ଦେବାକୁ ନେତାଙ୍କୁ ନିର୍ଦେଶ
ପୁରୀଠାରେ ଶେଷ ହୋଇଥିବା ବିଜେପି ବିଧାୟକ, ସାଂସଦଙ୍କ ତିନି ଦିନିଆ ପ୍ରଶିକ୍ଷଣ ବର୍ଗରେ ସୁଶାସନ, ସଙ୍ଗଠନ ଓ ଜନ ସମ୍ପର୍କର ପାଠ ପଢିଲେ ଜନ ପ୍ରତିନିଧି । ୨୦୩୬ ପାଇଁ ବିଜେପି ଯେଉଁ ଭିଞ୍ଜନ ଡକ୍ୟୁମେଣ୍ଟ ତିଆରି କରିଛି, ତାକୁ ସଫଳ କରିବା ପାଇଁ କ୍ଷମତାରେ ରହିବାକୁ ପଡିବ । ତେଣୁ ତୁମେ କ୍ଷମତାରେ ରୁହ କି ନରୁହ, ଦଳ କ୍ଷମତାରେ ରହିବା ଦରକାର । ନିଜ ନିଜ ନିର୍ବାଚନ ମଣ୍ଡଳୀରେ କେମିତି ବିକାଶ ହେବ ତା ଉପରେ ଗୁରୁତ୍ୱ ଦିଅ ।
ଉତ୍ତର ପ୍ରଦେଶ ଢାଞ୍ଚାରେ ନିର୍ବାଚନ ମଣ୍ଡଳୀ ୱାରୀ ପ୍ରଗତିର ଷ୍ଟାଟିଷ୍ଟିକାଲ ରିପୋର୍ଟ ତିଆରି କର । ନିର୍ବାଚନ ମଣ୍ଡଳୀରେ କଣ ସବୁ ବିକାଶ ହେଉଛି, ତା ଉପରେ ପ୍ରତି ୩ ମାସକୁ ଥରେ ରିପୋର୍ଟ ପ୍ରସ୍ତୁତ ପାଇଁ ପରାମର୍ଶ ଦେଇଛନ୍ତି କେନ୍ଦ୍ରୀୟ ନେତା ।
ବିଧାୟକ ଏବଂ ସାଂସଦଙ୍କ ଅଫିସ କେମିତି ପରିଚାଳନା କରିବା ଦରକାର । ଅଧିକରୁ ଅଧିକ ଲୋକଙ୍କ ପାଖରେ କେମିତି ଅଫିସ ପହଞ୍ଚି ପାରିବ, ସମସ୍ୟା ସମାଧାନ କରିପାରିବ । ପଦ ପଦବୀ ବଡ଼ ନୁହେଁ । କାର୍ଯ୍ୟକର୍ତ୍ତା ଓ ଲୋକଙ୍କ ସହ କେମିତି କଥା ହେବେ ଜନ ପ୍ରତିନିଧି । ତାଙ୍କ ପ୍ରତି କେମିତି କରିବେ ବ୍ୟବହାର । ଫୋନରେ କଥା ହେଲା ବେଳେ କେମିତି ଶାଳିନତା ସହ କଥା ହେବେ । କାର୍ଯ୍ୟାଳୟକୁ ଗଲେ କର୍ମକର୍ତ୍ତାଙ୍କ ପ୍ରତି କେମିତି ଆଚରଣ ଦେଖାଇବେ । ଗ୍ରାଉଣ୍ଡରେ ଲୋକଙ୍କ ସହ କେମିତି ବ୍ୟବହାର କରିବେ, ସେନେଇ ବିଧାୟକ ଓ ସାଂସଦଙ୍କୁ ପରାମର୍ଶ ଦେଇଛନ୍ତି କେନ୍ଦ୍ରୀୟ ନେତୃତ୍ୱ ।
ତିନି ଦିନିଆ ବିଧାୟକ, ସାଂସଦ ପ୍ରଶିକ୍ଷଣ ବର୍ଗର ଶେଷ ଦିନରେ ସଙ୍ଗଠନ ସାଧାରଣ ସମ୍ପାଦକ ବିଏଲ୍ ସନ୍ତୋଷ, ସହ ସଂଗଠନ ସମ୍ପାଦକ ଭି. ସତୀଶ ଏବଂ ସାଧାରଣ ସମ୍ପାଦକ ସୁନୀଲ ବଂଶଲ ଦେଇଥିଲେ ଗୁରୁତ୍ୱପୂର୍ଣ୍ଣ ପରାମର୍ଶ ।
