ଖଣ୍ଡିଏ ବାଉଁଶରେ ପାଦ, ଖଣ୍ଡିଏ ବାଉଁଶରେ ହାତ । ତଳେ ଅଥଳ ପାଣି । ଚାଲିଲେ ମାତ୍ରେ ଦୋହଲୁଛି ପୋଲ । କେତେବେଳେବି ବାଉଁଶ ପୋଲ ଭୁଶୁଡି ଯାଇପାରେ ନଚେତ୍ ମଣିଷ ପାଣିରେ ପଡିଯାଇପାରେ । ଏସବୁ ଜାଣିବି ପ୍ରତିଦିନ ନିଜ ଜୀବନକୁ ବାଜିରେ ଲଗାଉଛନ୍ତି ଏମାନେ । ଭଦ୍ରକ ଜିଲ୍ଲା ଖଣ୍ଡତଡ଼ା ପଞ୍ଚାୟତର ୮ ନଂ ୱାର୍ଡ ରଘୁପତି ବିନ୍ଧା । ୧୦୦ରୁ ଅଧିକ ପରିବାର ବସବାସ କରୁଥିବାବେଳେ ନାହିଁ ଗମନାଗମନ ସୁବିଧା । ୨୦୧୦ ମସିହାରୁ ବ୍ରିଜ୍ ଭାଙ୍ଗି ଯାଇଥିବାବେଳେ ନୂଆ ବ୍ରଜ୍ ଖଣ୍ଡିଏ ଦୀର୍ଘ ବର୍ଷ ପରେ ବି ନିର୍ମାଣ ହୋଇପାରିଲା ନାହିଁ । ଯାହାର ସଜ୍ଜା ଭୋଗୁଛନ୍ତି ଏହି ନୀରିହ ଗରିବ ପରିବାର ।

ସାଳନ୍ଦୀ ନଦୀ ଗୋଟେପାଖେ ରଘୁପତି ବିନ୍ଧା ରହିଥିବାବେଳେ ଆରପାଖରେ ରହିଛି ଆହାରପଦା । ସେଠାରେ ଏମଇ ସ୍କୁଲ, ଭଦ୍ରକାଳୀ ହାଇସ୍କୁଲ ସମେତ ଅଙ୍ଗନବାଡ଼ି କେନ୍ଦ୍ର ଅଛି । ଯେଉଁଥିପାଇଁ ସ୍କୁଲ ପିଲାଙ୍କୁ ପ୍ରତିଦିନ ଏହି ବାଉଁଶ ପୋଲ ଉପରେ ବିପଦସଙ୍କୁଳ ଅବସ୍ଥାରେ ଯାତାୟତ କରିବାକୁ ପଡେ । ନଚେତ୍ ୩ କିମି ବୁଲି ଅଧିକ ବାଟ ଯିବାକୁ ହେବ । ଯାହାକି ଲୋକମାନେ ଏତେ ବାଟ ବୁଲିବା ଅପେକ୍ଷା ବାଉଁଶ ପୋଲକୁ ସାହାରା କରିଛନ୍ତି ।

ଗତ କିଛି ଦିନ ତଳେ ଏହି ବାଉଁଶ ପୋଲରୁ ଖସି ପଡି ଜଣେ ଛାତ୍ର ଗୁରୁତର ହୋଇଥିଲେ । ସେହିପିର ଏକ ବୃଦ୍ଧ ପୋଲରୁ ଖସି ପଡି ନିଖୋଜ ହୋଇଯାଇଥିଲେ । ପରଦିନ ପାଣିରୁ ତାଙ୍କ ମୃତଦେହ ଉଦ୍ଧାର ହୋଇଥିଲା । ସାଳନ୍ଦୀ ଜଳସମ୍ପଦ ବିଭାଗ ଅଧୀନରେ ଏହି ପୋଲ ନିର୍ମାଣ ଦାୟିତ୍ଵ ରହିଥିବାବେଳେ କେହି କେହ କର୍ଣ୍ଣପାତ କରୁ ନାହାନ୍ତି । ଅନ୍ୟପଟେ ବ୍ଲକ ଗୋଷ୍ଠୀ ଉନ୍ନୟନ ଅଧିକାରୀ କହିଛନ୍ତି, ସମସ୍ୟାର ହେବ ସମାଧାନ । ବିଜେଡି ସରକାରରୁ ବ୍ରିଜ୍ ପାଇଁ କଲବଲ ହେଉଥିବାବେଳେ ଏଥର ଦୁଃଖ ଶୁଣିବେ ବିଜେପି ସରକାର ଏଇ ଆଶା ବାନ୍ଧିଛନ୍ତି ରଘୁପତି ବିନ୍ଧାବାସୀ ।