ଅର୍ଗସ ବ୍ୟୁରୋ: ରାସ୍ତା ସାରା ଖାଲଖମା । ସେହି ଖାଲରେ ଜମି ରହୁଛି ବର୍ଷା ପାଣି । ଅସରାଏ ବର୍ଷା ପରେ ରାସ୍ତା ସାରା କାଦୁଅ ପଚପଚ । କାଦୁଅ ପଚପଚ ରାସ୍ତାରେ ଅଞ୍ଚଳବାସୀ ଯାତାୟାତ କରିବାକୁ ବାଧ୍ୟ ହେଉଛନ୍ତି । ରାସ୍ତାର ଅବସ୍ଥା ଦେଖିଲେ ଆପଣ ବି ଜାଣିପାରିବେ କେତେ ଅସୁବିଧାରେ ଲୋକେ ରାସ୍ତାରେ ଚଳପ୍ରଚଳ କରୁଛନ୍ତି । ସ୍ଥିତି ଏମିତି ହେଲାଣି ଯେ ଯାଉ ଯାଉ ପାଦ କାଦୁଅ ଭିତରେ ପଶି ଯାଉଛି ଗାଡି ଚକ । ଗାଡି କଣ ସେ ରାସ୍ତାରେ ଚାଲିକି ଯିବା ବି ମୁସ୍କିଲ। ଟିକିଏ ଅସାବଧାନତା ହେଲେ ତଳେ ପଡି ଯିବାର ଭୟ ରହୁଛି । 

ରାସ୍ତା ବିପର୍ଯ୍ୟସ୍ତର ଏପରି ବିକଳ ଦୃଶ୍ୟ ଦେଖିବାକୁ ମିଳିଛି ଅନୁଗୋଳ ସଇଡା ପଞ୍ଚାୟତ ଅନ୍ତର୍ଗତ ମହନପୁର ଗାଁରେ। ସାମାନ୍ୟ ବର୍ଷାରେ ବେହାଲ ହୋଇ ପଡିଛି ଗାଁ ରାସ୍ତା । ଚାରି ଆଡ଼େ କାଦୁଅ ପଚ ପଚ, ଫଳରେ ଗାଡି ମଟର ଯିବା ଆସିବା ମାସେ ହେବ ଠପ ହୋଇ ପଡିଛି । ଏପଟେ ଗାଁ ରେ ସ୍କୁଲ କି ଅଙ୍ଗନବାଡି ନଥିବାରୁ ପାଖ ଗାଁ କୁ ଏହି ରାସ୍ତା ଦେଇ ନିତିଦିନ ଛାତ୍ର ଛାତ୍ରୀ ସ୍କୁଲ କୁ ଯିବା ଆସିବା କରନ୍ତି । ମାତ୍ର ବର୍ଷାରେ ରାସ୍ତା କାଦୁଅ ହୋଇ ଥିବାରୁ ଏବେ ସ୍କୁଲ କୁ ଯାଉ ନାହାନ୍ତି ଛାତ୍ରଛାତ୍ରୀ । କିଛି ମାସ ତଳେ ସଇଡା ପଞ୍ଚାୟତ ପକ୍ଷରୁ ମନରେଗା ଯୋଜନାରେ ୩ ଲକ୍ଷ ୭୫ ହଜାର ଟଙ୍କା ବ୍ୟୟରେ ଏହି ରାସ୍ତା ମରାମତି କରାଯାଇଥିଲା । କିନ୍ତୁ ଠିକ ସେ କାମ ନକରି ମୋରମ ବଦଳରେ ମାଟି ରାସ୍ତା ଉପରେ ଢାଳି ଲକ୍ଷାଧିକ ଟଙ୍କା ଆତ୍ମସାତ ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି I 

ମହନପୁରରେ ୩୦ ପରିବାର ରହୁଥିବା ବେଳେ ରାସ୍ତା ନଥିବାରୁ ଯାତାୟାତ ପାଇଁ ଏହା କେବଳ ଗୋଟିଏ ରାସ୍ତା। ବର୍ଷ ତମାମ ଏହି ରାସ୍ତା ଖରାପ ରହିବା ଫଳରେ ଲୋକେ ନାହିଁ ନଥିବା ଅସୁବିଧା ଭୋଗୁଛନ୍ତି। 

(ପାଲଲହଡାରୁ ହରିସଚନ୍ଦ୍ର ଦାସ)