କେରଳର ୱାଇନାଡ଼ ପରେ ଉତ୍ତରାଖଣ୍ଡର ଉତ୍ତରକାଶୀରେ ଘଟିଥିବା ଭୂସ୍ଖଳନ ସମଗ୍ର ଦେଶ କୁ ଦୋହଲାଇ ଦେଇଛି । ମାଟି ତଳୁ ଜୀବନକୁ ସାଉଁଟିବାକୁ ଚାଲିଛି ସଂଘର୍ଷ । ଏଭଳି ସ୍ଥିତିରେ ଆମ ରାଜ୍ୟ ଓଡ଼ିଶା ଭୂସ୍ଖଳନ ଭଳି ପ୍ରାକୃତିକ ବିପର୍ଯ୍ୟୟରୁ କେତେ ମୁକ୍ତ ତାକୁ ନେଇ ଆରମ୍ଭ ହୋଇଛି ଆଲୋଚନା । କାରଣ ସରକାରୀ ତଥ୍ୟ କହୁଛି ରାଜ୍ୟର ଗଜପତି ଜିଲ୍ଲାକୁ ଭୂସ୍ଖଳନ ପ୍ରବଣ ଅଞ୍ଚଳ ଭାବେ ଚିହ୍ନଟ କରାଯାଇଛି । ଜିଲ୍ଲାର ୧୨୯ ଟି ସ୍ଥାନରେ ରହିଛି ଭୂସ୍ଖଳନର ଭୟ । ଯାହାକୁ ଦୃଷ୍ଟିରେ ରଖି କେରଳ ଓ ଉତ୍ତରାଖଣ୍ଡ ଭଳି ବଡ଼ ଅଘଟଣ ଏଡାଇବାକୁ ବିଭିନ୍ନ ବିଭାଗ, ପାଣିପାଗ ନିର୍ଦ୍ଦେଶାଳୟ, କେରଳର ଅମୃତା ବିଶ୍ୱ ବିଦ୍ୟା ପୀଠମ ମଧ୍ୟରେ ଲଗାତାର ସମନ୍ୱୟ ବୈଠକ ବସୁଛି । ଅଧିକ ସର୍ଭେ ପାଇଁ ଓସଡ଼ମା ଏବଂ ଅମୃତା ବିଶ୍ୱ ବିଦ୍ୟାଳୟ ମଧ୍ୟରେ ଚୁକ୍ତିନାମା ସ୍ୱକ୍ଷର ହୋଇଥିବା କହିଛନ୍ତି ରାଜ୍ୟ ସରକାର ।

କେରଳ ଓ ଉତ୍ତରାଖଣ୍ଡ ଭଳି ଭୂସ୍ଖଳନ ଦେଖିଲେ ଆଜି ଭୟରେ ଥରି ଉଠନ୍ତି ଗଜପତି ଜିଲ୍ଲାର ଅନେକ ପଞ୍ଚାୟତବାସୀ । ୨୦୦୬ ମସିହାରେ ଗୁମ୍ମା ବ୍ଲକର ମିଞ୍ଜିରି ଠାରେ ହୋଇଥିବା ଭୂସ୍ଖଳନରେ ୪ଜଣଙ୍କ ଜୀବନ ଯାଇଥିଲା.. ୨୦୧୮ ଅକ୍ଟୋବର ମାସରେ ହୋଇଥିବା ତିତିଲି ବାତ୍ୟା ସମୟରେ ରାୟଗଡ ବ୍ଲକର ଗଙ୍ଗାବାଡ, ଲକ୍ଷ୍ମୀପୁର, କଇଁପୁର, ଗଣ୍ଡାହାତୀ ଆଦି ପଞ୍ଚାୟତ ସମେତ ରା.ଉଦୟଗିରି ଓ ନୂଆଗଡ ବ୍ଲକର କିଛି ଅଞ୍ଚଳରେ ଭୂସ୍ଖଳନ ଯୋଗୁଁ ୪୯ଜଣ ମୃତ୍ୟୁ ବରଣ କରିଥିଲେ । ଯାହାକୁ ଆଜି ବି ଭୁଲି ନାହାନ୍ତି ଗ୍ରାମବାସୀ ।

ଏସବୁ ପାହାଡ଼ିଆ ଅଞ୍ଚଳରେ ଭୂସ୍ଖଳନ ଘଟିବାର ପ୍ରମୁଖ କାରଣଗୁଡ଼ିକ ହେଉଛି ଭୀଷଣ ବୃଷ୍ଟିପାତ, ବାତ୍ୟା, ମୃର୍ତ୍ତିକାକ୍ଷୟ ଓ ଜଙ୍ଗଲଧ୍ୱଂସ । ଖଣି ଖନନ ଓ ବେଆଇନ ପଥର ଖୋଳା, ନିମ୍ନମାନର ରାସ୍ତା ନିର୍ମାଣ ଓ ରକ୍ଷଣାବେକ୍ଷଣ ମଧ୍ୟ ଅନ୍ୟତମ କାରଣ । ଜଙ୍ଗଲଧ୍ବଂସ ହେବା ଫଳରେ ଭୂମିର ନମନୀୟତା ବୃଦ୍ଧି ପାଇବା ସଂଗେ ସଂଗେ ଧସିବା ଭଳି ବିପଦ ବି ଉପୁଜି ଥାଏ । ତେବେ କେରଳ , ଉତ୍ତରାଖଣ୍ଡ ଓ ହିମାଚଳ ପ୍ରଦେଶରେ ଭୁସ୍ଖଳନ ଭଳି ଗଜପତିରେ ତିତିଲର ତିକ୍ତ ଅନୁଭୁତି ବି ରହିଛି... । ଏବେ ଠୁଁ ସାବଧାନ ନ ହେଲେ ଆଗକୁ ବଡ଼ ବିପର୍ଯ୍ୟୟକୁ ଆଶଙ୍କାକୁ ଏଡ଼ାଇ ଦେଇହେବ ନାହିଁ ।