ଦୁହେଁ ଦୁହିଁଙ୍କୁ ପ୍ରେମ କରିଥିଲେ । ଭଲ ପାଇ ବାହା ହେଲେ । ଆଉ ଏବେ ଏମାନଙ୍କୁ ମିଳିଛି ବଳଦ ଦଣ୍ଡ । ପ୍ରେମ କରିବା ଯେ କେତେ ମହଙ୍ଗା ଆପଣ ଏହି ଦୃଶ୍ୟରୁ ଜାଣିପାରୁଥିବେ ।

ଏ ଦୃଶ୍ୟ ଆପଣଙ୍କୁ ବିଚଳିତ କରିପାରେ । ଭିଡିଓ ଦେଖିଲେ ଆପଣ ଜାଣିପାରୁଥିବେ କେମିତି ଦୁଇ ଯୁବକ, ଯୁବତୀଙ୍କୁ ବଳଦ ଭଳି ଖଟାଉଛନ୍ତି । ବେକରେ ଜୁଆଳି ପକାଇ ମୁଣ୍ଡକୁ ଜୁଆଳିରେ ବାନ୍ଧି ଲଙ୍ଗଳ ଧରି ହଳ କରୁଛନ୍ତି ଗାଁ ଲୋକେ । ପୁଣି ଯେମିତି ବଳଦକୁ ହଳ କରିବା ସମୟରେ ପିଠିକୁ ବାଡାନ୍ତି ଠିକ୍ ସେମିତି ଏମାନଙ୍କ ପିଠିକୁ ପିଟି ପିଟି ହଳ କରାଯାଉଛି । ତାହା ବି ସର୍ବ ସମ୍ମୁଖରେ ଘଟୁଛି । ପୁରା ଗାଁ ଏକାଠି ହୋଇଛନ୍ତି । ସମସ୍ତେ ଦେଖୁଛନ୍ତି, ହେଲେ ସମସ୍ତଙ୍କ ପାଟି ଚୁପ୍ । କେହି କହୁନାହାନ୍ତି ଯେ ଏ ସବୁ ବନ୍ଦ କର ।

ପ୍ରକୃତ କଥା ହେଉଛି ଯୁବକ ଜଣକ ସମ୍ପର୍କରେ ନିଜ ପିଉସୀଙ୍କୁ ବିବାହ କରିଛନ୍ତି । ଯାହାକୁ ତାଙ୍କ ସମାଜ ଆଦୌ ଗ୍ରହଣ କରେନି । ସେଥିପାଇଁ ପ୍ରଜା କୋର୍ଟରେ ନିଷ୍ପତ୍ତି ହେଲା ଯେ ଦୁହିଁଙ୍କୁ ବଳଦ ଦଣ୍ଡ ଦିଆଯିବ । ବାଉଁଶରେ ତିଆରି ହଳ ଲଙ୍ଗଳରେ ତାଙ୍କୁ ଦଣ୍ଡିତ କରାଗଲା । ପରେ ଗ୍ରାମ ଦେବତୀଙ୍କ ଆଗରେ ପୂଜା କରାଇ ଶୁଦ୍ଧି କରାଯାଇଛି । ଯାହାର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ୍ ହେଉଛି । ତେବେ ଏହି ଭିଡିଓ ଦେଖିଲେ ଆଶ୍ଚର୍ଯ୍ୟ ଲାଗୁଛି ଯେ, ଆଜି ମଧ୍ୟ ବଞ୍ଚିଛି ପ୍ରଜା କୋର୍ଟ । AI, CHAT GPT ଯୁଗରେ ପହଞ୍ଚିଲାବେଳକୁ ଏ ଦୃଶ୍ୟ ଟିକେ ବିଚଳିତ କରୁଛି ।