Mahanadi Water Dispute / ଟ୍ରିପଲ୍ ଇଞ୍ଜିନ୍ ସରକାରରେ ବାହାରିଲା ସମାଧାନର ବାଟ

ଭୁବନେଶ୍ଵର: ୩ ମାସ ମଧ୍ୟରେ ମହାନଦୀ ବିବାଦରେ ସମାଧାନ । ରାଜ୍ୟରେ ଟ୍ରିପଲ୍ ଇଞ୍ଜିନ୍ ସରକାର ଆସିବା ପରେ ହୁଏତ ଏହା ହେବ ସବୁଠୁ ବଡ଼ ଉପଲବ୍ଧି । ହେଲେ ଗଠନ ହୋଇଥିବା କମିଟି ଟ୍ରିବୁନାଲରେ କ'ଣ ରିପୋର୍ଟ ଦାଖଲ କରିବ । ଓଡ଼ଶା ଚାଷୀଙ୍କୁ ନ୍ୟାୟ ମିଳିବ ନା ନାହିଁ । ବିଶେଷ କରି ଅଣ ମୌସୁମୀ ସମୟରେ ଛତିଶଗଡ଼ କେତେ ପାଣି ଛାଡିବାକୁ ରାଜି ହେବ ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।

ମହାନଦୀରେ ବନ୍ୟା ଭିତରେ ଦିଲ୍ଲୀରୁ ଆସିଛି ବଡ଼ ଆଶ୍ଵସ୍ତିର ଖବର । ଦୀର୍ଘ ଦିନ ଧରି ଲାଗି ରହିଥିବା ମହାନଦୀ ବିବାଦରେ ଅନ୍ତ ହେବାକୁ ଯାଉଛି । ପ୍ରଥମ ଥର ପାଇଁ କେନ୍ଦ୍ର ଜଳ ଶକ୍ତି ମନ୍ତ୍ରୀଙ୍କ ଅଧ୍ୟକ୍ଷତାରେ ହାଇଲେବୁଲ ବୈଠକରେ ଏକାଠି ବସିଛନ୍ତି ଓଡ଼ିଶାର ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ ।

ଏଥିସହ ପଢ଼ନ୍ତୁ: ମହାନଦୀ ଅବବାହିକା ଓ ତଳିଆ ଅଞ୍ଚଳରେ ସତର୍କତା ବୃଦ୍ଧି ପାଇଁ ଜିଲ୍ଲାପାଳମାନଙ୍କୁ SRCଙ୍କ ନିର୍ଦ୍ଦେଶ 

ନିଷ୍ପତ୍ତି ଅନୁସାରେ, କେନ୍ଦ୍ର ଜଳ ଆୟୋଗଙ୍କ ଅଧ୍ୟକ୍ଷତାରେ ଏକ କମିଟି ଗଠନ ହୋଇଛି । ଏହି କମିଟି ୩ ମାସ ମଧ୍ୟରେ ଟ୍ରିବୁନାଲକୁ ରିପୋର୍ଟ ପ୍ରଦାନ କରିବ । ଉଭୟ ରାଜ୍ୟର କୃଷକଙ୍କ ସ୍ଵାର୍ଥକୁ ଆଖି ଆଗରେ ରଖି ଜଳ ପରିଚାଳନାକୁ ପ୍ରାଥମିକତା ଦିଆଯିବ ।

ବଡ଼ କଥା ହେଉଛି, ଉଭୟ ରାଜ୍ୟ ଭିତରେ ସହମତି ହେଲେ କେଉଁ ଆଧାରରେ ହେବ ଜଳ ପରିଚାଳନା । ଓଡ଼ିଶାକୁ ତାର ହକ୍ ମିଳିବ ତ ? ଅଣମୌସୁମୀ ସମୟରେ ଶୁଖିଲା ପଡୁଥିବା ମହାନଦୀରେ କେତେ ପାଣି ଛାଡିବ ଛତିଶଗଡ ? ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।

ନିକଟରେ ୩୯ ବର୍ଷର ତଥ୍ୟକୁ ଆଧାର କରି ମହାନଦୀର ହାରାହାରି ଜଳ ପ୍ରବାହ ବାବଦରେ ତଥ୍ୟ ରଖିଥିଲେ ରାଜ୍ୟ ସରକାର । ଟ୍ରିବୁନାଲଙ୍କ ନିକଟରେ ଦାଖଲ ହୋଇଥିବା ତଥ୍ୟ ଅନୁସାରେ ବାର୍ଷିକ ହାରାହାରି ୩୨.୮୩ ମିଲିୟନ ଏକର ଫୁଟ୍ ଜଳ ହୀରାକୁଦ ବନ୍ଧ ପର୍ଯ୍ୟନ୍ତ ଆସୁଥିବା ବେଳେ ସେଥିରୁ ୨୭.୭୬ ମିଲିୟନ ଏକର ଫୁଟ୍ ଜଳ କେବଳ ଛତିଶଗଡରୁ ଆସୁଛି ।

କମ୍‌ ବର୍ଷା ଅବା ମରୁଡ଼ି ସମୟରେ ୯୦ ପ୍ରତିଶତ ନିର୍ଭରଶୀଳତା ପରିସ୍ଥିତିରେ କିନ୍ତୁ ହୀରାକୁଦକୁ ଛତିଶଗଡ଼ରୁ ଜଳ ପ୍ରବାହ କମୁଛି । ଯାହାକି ମାତ୍ର ୨୧. ୮୨ ମିଲିୟନ ଏକର ଫୁଟ୍ । ସେହିପରି ନରାଜ ପାଖକୁ ବାର୍ଷିକ ହାରାହାରି ୫୬.୨୯ ମିଲିୟନ ଏକର ଫୁଟ୍ ଜଳ, ମହାନଦୀ ବେସିନ କ୍ୟାଚମେଣ୍ଟ ଏବଂ ଚିଲିକା ଯାଏ ୬୨.୩୬ ମିଲିୟନ ଏକର ଫୁଟ୍ ଜଳ ପ୍ରବାହିତ ହେଉଛି ।

ଏଥିସହ ପଢ଼ନ୍ତୁ: ବନ୍ୟାରେ ପ୍ରଭାବିତ ୮ ଲକ୍ଷ ଲୋକ; କାଲି ବନ୍ୟା ପ୍ଳାବିତ ୪ ଜିଲ୍ଲା ଗସ୍ତରେ ଯିବେ ମୁଖ୍ୟମନ୍ତ୍ରୀ 

ପୂର୍ବତନ ମୁଖ୍ୟଯନ୍ତ୍ରୀଙ୍କ ମତରେ ଅଣମୌସୁମୀ ସମୟରେ ହୀରାକୁଦରେ ଛତିଶଗଡ଼ ୨ ମିଲିୟନ୍ ଏକର ଫୁଟ ଏବଂ ଛତିଶଗଡ଼ ସୀମାରେ ୧.୭୪ ମିଲିୟନ୍ ଏକର ଫୁଟ୍ ପାଣି ଛାଡ଼ିବା ଦରକାର । ବଡ଼ କଥା ହେଉଛି, ଟ୍ରିବୁନାଲ ଗଠନର ପ୍ରାୟ ୮ ବର୍ଷ ପରେ ଦୁଇ ରାଜ୍ୟ ଜଳର ମାପକୁ ନେଇ ସହମତି ପ୍ରକାଶ କରିଥିବାରୁ ପ୍ରଥମ ପ୍ରତିବନ୍ଧକ ଦୂର ହୋଇଥିଲା। ଏବେ କେଉଁ ଭିତ୍ତିରେ ସହମତି ହେଉଛି ତା ଉପରେ ନଜର ।