Tiger in Debrigarh / ମହାରାଷ୍ଟ୍ରରୁ ଦେବ୍ରିଗଡ଼ ଆସିଛି ମହାବଳ ! ମିଳିଲା ପୂର୍ବ ଗତିବିଧିର ସୁରାକ୍

ସମ୍ବଲପୁର: ଦେବ୍ରିଗଡ଼ ଅଭୟାରଣ୍ୟକୁ ଆସିଥିବା ମହାବଳ ବାଘର ମୂଳ ବାସସ୍ଥାନ ଓ ପୂର୍ବ ଗତିବିଧିକୁ ନେଇ ମିଳିଛି ଗୁରୁତ୍ୱପୂର୍ଣ୍ଣ ସୁରାକ୍। ମହାରାଷ୍ଟ୍ରରୁ ଏହି ବାଘଟି ଆସିଥିବା ଅନୁମାନ କରୁଛନ୍ତି ବନ ବିଭାଗର ଅଧିକାରୀ। ଛତିଶଗଡ଼ ବନ ବିଭାଗର କ୍ୟାମେରା-ଟ୍ରାପ୍ ଫଟୋରୁ ବାଘର ପରିଚୟ ଓ ପୂର୍ବ ଉପସ୍ଥିତି ସମ୍ପର୍କରେ ତଥ୍ୟ ମିଳିଛି। 

ଗତ ନଭେମ୍ବର ୯ ତାରିଖରେ ଦେବ୍ରିଗଡ଼ ଅଭୟାରଣ୍ୟରେ ଠାବ ହୋଇଥିବା ଏହି ଅଣ୍ଡିରା ବାଘକୁ ୨୦୨୫ ମସିହାରେ ପ୍ରାୟ ୬ ମାସ ଧରି ଛତିଶଗଡ଼ର ଉଦନ୍ତୀ-ସୀତାନଦୀ ବ୍ୟାଘ୍ର ଅଭୟାରଣ୍ୟରେ ଦେଖାଯାଇଥିଲା। ସେଠାକାର ଅଧିକାରୀଙ୍କ କ୍ୟାମେରା-ଟ୍ରାପ୍ ଫଟୋ ସହ ଦେବ୍ରିଗଡ଼ରେ ଠାବ ହୋଇଥିବା ବାଘର ଶରୀରର ଚିହ୍ନ ଓ ଧାରୀକୁ ମିଳାଇ ଏହି ପରିଚୟ ସ୍ପଷ୍ଟ ହୋଇଛି।

ତେବେ ବାଘଟି ମହାରାଷ୍ଟ୍ରରୁ ଛତିଶଗଡ଼ ଦେଇ ଓଡ଼ିଶାକୁ ଆସିଥିବା ଅନୁମାନ କରାଯାଉଥିଲେ ମଧ୍ୟ ଏହାର ସମ୍ପୂର୍ଣ୍ଣ ଯାତ୍ରାପଥ ସମ୍ପର୍କରେ ଏଯାଏଁ ଠୋସ୍ କ୍ୟାମେରା-ଟ୍ରାପ୍ ପ୍ରମାଣ ମିଳିନାହିଁ। ବାଘର ପୂର୍ବ ଗତିବିଧି ଓ ପ୍ରବାସ ଇତିହାସ ଜାଣିବା ପାଇଁ ଅଧିକ ତଥ୍ୟ ବିଶ୍ଳେଷଣ କରାଯାଉଛି।

ପଢନ୍ତୁ ଏହି ଖବର: କୌଣସି ଅଧିକାରୀ ବିନା ଅନୁମତିରେ ସଦର ମହକୁମା ଛାଡ଼ିବେ ନାହିଁ

ଏନେଇ ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ (NTCA)କୁ ତଥ୍ୟ ଯୋଗାଇବା ପାଇଁ ଦେବ୍ରିଗଡ଼ ପକ୍ଷରୁ ଅନୁରୋଧ କରାଯାଇଛି। ହୀରାକୁଦ ୱାଇଲ୍ଡଲାଇଫ୍ ଡିଏଫ୍‌ଓ ଅଂଶୁପ୍ରଜ୍ଞା ଦାଶ ଏହି ସୂଚନା ଦେଇଛନ୍ତି। ମହାବଳର ଗତିବିଧି ଓ ଦୀର୍ଘ ଦୂରତାର ପ୍ରବାସ ଇତିହାସ ଜାଣିବାକୁ ଏବେ ବନ ବିଭାଗର ତଦନ୍ତ ଜାରି ରହିଛି।