ସବୁଠି ହର ହର ମହାଦେବ, ଲୋକଙ୍କ ସହ ମିଶି ପୂଜାର୍ଚ୍ଚନା କଲେ ଜନପ୍ରତିନିଧି

ଚତୁର୍ଦିଗ ଶିବମୟ....ହର ହର ମହାଦେବ ଧ୍ୱନିରେ ପ୍ରକମ୍ପିତ ହେଉଛି ଗଗନ ପବନ । ମହାଶିବରାତ୍ରିକୁ ନେଇ ସବୁଠି ଉତ୍ସବର ପରିବେଶ । ରାଜ୍ୟର ପ୍ରମୁଖ ଶୈବପୀଠରେ ଶ୍ରଦ୍ଧାଳୁଙ୍କ ଭିଡ଼ ଲାଗିଛି । ସବୁଠି ଶିବ ଆରାଧନାରେ ନିମଗ୍ନ ଭକ୍ତ । ଜାଗର ଜାଳି ମହାଦୀପ ଉଠିବାକୁ ଅପେକ୍ଷା କରିଛନ୍ତି ଶ୍ରଦ୍ଧାଳୁ । ଅନେକ ସ୍ଥାନରେ ଜନତାଙ୍କ ସହ ନେତା ବି ଏ ମହାଶିବରାତ୍ରିରେ ସାମିଲ ହୋଇଛନ୍ତି । ଏକାମ୍ରକ୍ଷେତ୍ର ହେଉ କି ଶ୍ରୀକ୍ଷେତ୍ର, ଆରଡ଼ି ହେଉ କି କପିଳାସ, ଧବଳେଶ୍ବର ହେଉ କି ପଞ୍ଚଲିଙ୍ଗେଶ୍ୱର.. ସବୁଠି ଶିବଙ୍କ ଆରାଧନାରେ ନିମଗ୍ନ ଭକ୍ତ । ଦିଅଁଙ୍କ ଦର୍ଶନ ପାଇଁ ରାତି ଅଧରୁ ଲାଇନ୍ ଲଗାଇଥିଲେ ଭକ୍ତ । 

ଭଦ୍ରକର ପ୍ରସିଦ୍ଧ ଆରଡ଼ି ପୀଠରେ ବାବା ଆଖଣ୍ଡଳମଣିଙ୍କ ଦର୍ଶନ କରିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ମନ୍ଦିରର ଉନ୍ନତି ପାଇଁ ୧୦ କୋଟି ଟଙ୍କା ଘୋଷଣା କରିଛନ୍ତି ଉପମୁଖ୍ୟମ । ସାଙ୍ଗରେ ଉଚ୍ଚ ଶିକ୍ଷାମନ୍ତ୍ରୀ ସୂର୍ଯ୍ୟବଂଶୀ ସୁରଜ, ଭଦ୍ରକ ବିଧାୟକ ସୀତାଂଶୁ ଶେଖର ମହାପାତ୍ର ବି ପୀଠରେ ବାବାଙ୍କ ଦର୍ଶନ କରିଛନ୍ତି ।

ରାଜଧାନୀର ଆରାଧ୍ୟ ତଥା ଏକାମ୍ର କ୍ଷେତ୍ରର ଅଧୀଶ୍ବର ମହାପ୍ରଭୁ ଲିଙ୍ଗରାଜଙ୍କ ମନ୍ଦିର ପରିସରରେ ମହାଶିବରାତ୍ରି ପାଇଁ ଲାଗିଛି ପ୍ରବଳ ଗହଳି । ଭୋର ୩ଟା ସମୟରେ ଖୋଲିଥିଲା ପ୍ରଭୁ ଲିଙ୍ଗରାଜଙ୍କ ପହଡ଼ । ଦ୍ବାରଫିଟା, ମଙ୍ଗଳ ଆଳତୀ ଓ ଅବକାଶ ନୀତି ପରେ ପୂର୍ବାହ୍ନ ୧୧ଟା ଯାଏ ସାହାଣମେଲା ଦର୍ଶନ ଚାଲିଥିଲା । ଦିନ ତମାମ ସମସ୍ତ ନୀତିକାନ୍ତି ସଠିକ୍ ସମୟରେ ଶେଷ ହୋଇଥିବା ବେଳେ, ରାତି ୧୦ଟାରେ ମନ୍ଦିର ଚୂଡାକୁ ଉଠିବ ମହାଦୀପ‌ ।

ଐତିହାସିକ କୁମୁଡ଼ା ପାହାଡ଼ ଗୁମ୍ଫାରେ ବିଦ୍ୟମାନ ବାବା ଶ୍ରୀ ଶ୍ରୀ ଧବଳେଶ୍ୱରଙ୍କ ମହାଶିବରାତ୍ର ନେଇ ଟିଟିଲାଗଡ଼ ଚଳଚଞ୍ଚଳ । ମନ୍ଦିରରେ ରୀତିନୀତି ମୁତାବକ ବାବା ଧବଳେଶ୍ୱରଙ୍କ ପୀଠରେ ପୂଜାର୍ଚନ ଚାଲିଛି । ବିଧାୟକ ନବୀନ ଜୈନ ମନ୍ଦିରରେ ବାବାଙ୍କ ଦର୍ଶନ କରିବା ସହ ଶୃଙ୍ଖଳିତ ଦର୍ଶନର ସମୀକ୍ଷା କରିଛନ୍ତି । ଯାଜପୁରର ମହାବିନାୟକଙ୍କ ଦର୍ଶନ କରିଛନ୍ତି ବଡ଼ଚଣା ବିଧାୟକ । ବିଧାୟକ ଅମର କୁମାର ନାୟକ ସପତ୍ନୀକ ବାବାଙ୍କ ଦର୍ଶନ କରିଛନ୍ତି । ବଡ଼ଚଣା ବାସୀଙ୍କ ମଙ୍ଗଳ କାମନା କରିବା ସହ ପବିତ୍ର ପଞ୍ଚଦେବଙ୍କ ପୂଜାର୍ଚ୍ଚନା କରି କୃପା ଲାଭ କରିଛନ୍ତି ।

ମୟୂରଭଞ୍ଜ ଜିଲ୍ଲା କପ୍ତିପଦା ବ୍ଲକ ଅଧିନରେ ଥିବା ଝୀଙ୍କେଶ୍ୱର ପୀଠରେ ଦେବ ଦେବ ମହାଦେବଙ୍କ ଦର୍ଶନ ପାଇଁ ଲାଗିଛି ଶ୍ରଦ୍ଧାଳୁଙ୍କ ଭିଡ଼ । କୁହାଯାଏ ଏଠି ମହାଦେବ ପାତାଳରୁ ବାହାରିଛନ୍ତି । ତେଣୁ ସେ ପାତାଳି ମହାଦେବ । ଢେଙ୍କାନାଳ ଜିଲ୍ଲା ପ୍ରସିଦ୍ଧ ଶୈବପୀଠ କପିଳାସରେ ଶ୍ରଦ୍ଧାଳୁଙ୍କ ଭିଡ଼ ଧିରେ ଧିରେ ବଢିବାରେ ଲାଗିଛି । ହରିବୋଲ ହୁଳହୁଳିରେ କମ୍ପୁଛି ଗଗନ ପବନ । ଶ୍ରଦ୍ଧାଳୁ ମାନେ ନିଜର ମାନସିକ ନେଇ ବାବାଙ୍କ ନିକଟରେ ଜାଗର ଜାଳୁଛନ୍ତି ।

ଓଡ଼ିଶାର ଆଦି ହିମାଳୟ, ପବିତ୍ର ତପସ୍ଥଳୀରେ ଦୁଇ ମନ୍ତ୍ରୀ । ମନ୍ତ୍ରୀ ବିଭୁତି ଭୂଷଣ ଜେନା ଓ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ମହେନ୍ଦ୍ରଗିରିରେ ଭୋଳାବାବାଙ୍କ ଦର୍ଶନ କରିଛନ୍ତି । ସେହିଭଳି ନୟାଗଡ଼ର ପ୍ରସିଦ୍ଧ ଶୈବପୀଠ ଶରଣକୁଳର ବାବା ଲଡ଼ୁବାବାଙ୍କ ପୀଠରେ ଲାଗିଛି ଭକ୍ତଙ୍କ ଭିଡ଼ l ଭକ୍ତଙ୍କ ଦର୍ଶନ ପାଇଁ ପ୍ରଶାସନ ତରଫରୁ ସମସ୍ତ ପ୍ରସ୍ତୁତି କରାଯାଇଛି l ମହାଶିବରାତ୍ରିରେ ବାବା ଲଡ଼ୁବାବାଙ୍କ ଦର୍ଶନ କରିଛନ୍ତି ପୁରୀ ସାଂସଦ ସମ୍ବିତ ପାତ୍ର ।

ମହାଶିବରାତ୍ରି ପାଇଁ 'X'ରେ ପୋଷ୍ଟ କରି ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେହିପରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ନିଜ ସୋସିଆଲ୍ ମିଡିଆରେ ମହାଶିବରାତ୍ରିର ଶୁଭ କାମନା ଜଣାଇଛନ୍ତି ।