ଏଠି ଅନ୍ଧାର ଆସିଲେ ଖୋଜା ପଡେ ଆଲୁଅ । ସନ୍ଧ୍ୟା ହେଲେ ଭୟର ବାତାବରଣ । ତାଟି କବାଟ ଭରସା । କେତେବେଳେ ଜଙ୍ଗଲି ଜନ୍ତୁଙ୍କ ଭୟ ତ କେତେବେଳେ ସାପ ବେଙ୍ଗ କୀଟ ପତଙ୍ଗ ଭୟ । ରାୟଗଡା ଜିଲ୍ଲା ଗୁଡ଼ାରୀ ବ୍ଳକର ଅନେକ ଗାଁରେ ଆଜି ବି ଅପହଞ୍ଚ ବିକାଶ । ଆଜି ବି ବିଜୁଳି ଆଲୁଅ ଭଳି ମୌଳିକ ସୁବିଧାରୁ ବଂଚିତ ଏମାନେ ।

ଡିବିରର ମିଞ୍ଜି ମିଞ୍ଜି ଆଲୁଅ ଗଢୁଛି କୁନି କୁନି ପିଲଙ୍କ ଭବିଷ୍ୟତ । ତେଲ ଥିବା ଯାଏଁ ପାଠ ପଢ଼ନ୍ତି ତେଲ ସରିଗଲେ ପାଠ ପଢ଼ା ଠପ । ବେଳ ଥାଉ ଥାଉ ଏଠାକାର ଲୋକେ ରନ୍ଧା ବଢ଼ା ସାରିଦିଅନ୍ତି ଆଉ ସନ୍ଧ୍ୟା ପରେ ଏଭଳି ଅନ୍ଧାରରେ ରାତି ବିତାଇଥାନ୍ତି ଗାଁର ଆଦିବାସୀ ପରିବାର ।

ପାଞ୍ଚ ବର୍ଷ ତଳେ ଗ୍ରାମକୁ ଆସିଥିଲା ବିଦ୍ୟୁତ । ଖୁଣ୍ଟ ପୋତା ହୋଇଥିଲା । ତାର ଟଣା ହୋଇଥିଲା । କିନ୍ତୁ ବିଦ୍ୟୁତ୍ ଆସିଲା ନାହିଁ । ବାଟ ହୁଡ଼ିଲା ସରକାରୀ ଇଛାଶକ୍ତି । ଯେଉଁ ଅନ୍ଧାରକୁ ସେହି ଅନ୍ଧାର । ବିଜୁଳି ଆଲୁଅରେ ସରିନାହିଁ ଏମାନଙ୍କ ଦୁଃଖ । ଗାଁ କୁ ଯିବା ପାଇଁ ପକା ରାସ୍ତା ଟିଏ ନାହିଁ । ଗ୍ରୀଷ୍ମ ଋତୁରେ କଥା ଚଳିଯାଏ କିନ୍ତୁ ବର୍ଷାରେ ଅନେକ ଦୁର୍ଦଶା ଭୋଗୁଛନ୍ତି ଗାଁ ଲୋକେ । ସାମାନ୍ୟ ଅସୁସ୍ଥତା ହେଉ କିମ୍ଵା ଗର୍ଭବତୀ ମହିଳା ସେମାନଙ୍କୁ ଖଟିଆ ହିଁ ଭରସା । ବିଜେଡି ସରକାରଙ୍କ ବସୁଧା ଯୋଜନା ଏଠି ଫେଲ୍ ମାରିଛି । ଗାଁ ରେ ଗୋଟିଏ ନଳକୂପ ରହିଛି । ତାହାବି ଭଲ ପାଣି ବାହାରୁନି । ପାଣିକୁ ଛାଣି ବାଧ୍ୟ ହୋଇ ନେଉଛନ୍ତି ଲୋକ ।

ଏ ସବୁ ସମସ୍ୟା ନେଇ ସ୍ଥାନୀୟ ନେତା ବ୍ଲକ ପ୍ରଶାସନ ପରେ ଜିଲ୍ଲା ପ୍ରଶାସନ ନିକଟକୁ ଅନେକଥର ଗୁହାରିପରେ ମଧ୍ୟ ସମସ୍ୟା ସମାଧାନ ହୋଇନଥିବା ଅଭିଯୋଗ କରିଛନ୍ତି ଗାଁ ଲୋକେ । ଫଳରେ ଦୁର୍ଦ୍ଦିନରେ ଦିନ କାଟୁଛନ୍ତି ଗ୍ରାମବାସୀ ।