ସିରିଜ୍ ଏନକାଉଣ୍ଟର ପରେ ଛାନିଆ ମାଓବାଦୀ । ପୁଣି ଶାନ୍ତି ବାର୍ତ୍ତା ପାଇଁ କଲେ ଅପିଲ୍ । ଉତ୍ତର ବସ୍ତର ସବ୍ ଜୋନାଲ୍ ବିରୋ ପ୍ରଭାରୀ ଜାରି କରିଛି ପ୍ରେସନୋଟ୍ । ପୂର୍ବରୁ ମାଓ ସଂଗଠନର କେନ୍ଦ୍ରୀୟ କମିଟି ଶାନ୍ତି ବାର୍ତ୍ତା ପାଇଁ ଅପିଲ୍ କରିଥିବାବେଳେ ବର୍ତ୍ତମାନ ଦୁଇ ଫର୍ଦ୍ଦର ପ୍ରେସ୍ ବିବୃତିରେ ମାଓ ସଂଗଠନ ପକ୍ଷରୁ କୁହାଯାଇଛି ଯେ ଶାନ୍ତି ବାର୍ତ୍ତା ପାଇଁ ଅନୁକୂଳ ପରିବେଶ ଆବଶ୍ୟକ । ଛତିଶଗଡ଼ ଉପ ମୁଖ୍ୟମନ୍ତ୍ରୀ ବିଜୟ ଶର୍ମାଙ୍କ ଦ୍ଵାରା ଉଠାଯାଇଥିବା ବିଷୟ ପ୍ରତି ଶାନ୍ତି ବାର୍ତ୍ତାରେ ସାମିଲ କରିବା ପାଇଁ ଅପିଲ କରିଛନ୍ତି ମାଓବାଦୀ । ପୂର୍ବରୁ କେନ୍ଦ୍ରୀୟ କମିଟି ଶାନ୍ତି ବାର୍ତ୍ତା ପାଇଁ ୩ଟି ସର୍ତ୍ତ ରଖିଥିବାବେଳେ ଛତିଶଗଡ଼ ସରକାରଙ୍କ ପକ୍ଷରୁ କୁହାଯାଇଥିଲା ଯେ ବିନା ସର୍ତ୍ତରେ ହିଁ ଶାନ୍ତି ବାର୍ତ୍ତାରେ ମୋହର ଲାଗିବ । ତେଣୁ ବର୍ତ୍ତମାନ ଗୋଟିଏ ସର୍ତ୍ତ ସହ ଶାନ୍ତି ବାର୍ତ୍ତା ପାଇଁ ଅପିଲ୍ କରିଛନ୍ତି ମାଓବାଦୀ ସଂଗଠନ ।

ନିକଟରେ ଛତିଶଗଡ଼ରେ ସିରିଜ୍ ଏନକାଉଣ୍ଟ ହୋଇ ଅନେକ ମାଓବାଦୀ ନିହତ ହେଲେଣି । ବାରମ୍ବାର ଚେତେବନୀ ସତ୍ତ୍ବେ ଆତ୍ମସମର୍ପଣ କରୁନଥିବା ମାଓବାଦୀଙ୍କ ବିରୋଧରେ ଜିରୋ ଟଲରାନ୍ସ ନୀତି ଆପଣାଇବାକୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ଗୃହମନ୍ତ୍ରୀ । ୨୦୨୬ ମାର୍ଚ୍ଚ ୩୧ ସୁଦ୍ଧା ଭାରତ ନକ୍ସଲମୁକ୍ତ ହେବ କହି ମାଓବାଦୀଙ୍କୁ ଚରମବାଣୀ ଶୁଣାଇଛନ୍ତି ଅମିତ ଶାହ ।