ସମୁଦ୍ର ମଝିରେ ବିରାଟ ହାତୀଶୁଣ୍ଢ... ସୁ ସୁ ଗର୍ଜନ କରି ଆକାଶକୁ ଟାଣିନେଲା ହଜାର ହଜାର ଲିଟର ପାଣି । ଅଦ୍ଭୁତ ଦୃଶ୍ୟ ଦେଖି ଲୋକେ ହୋଇଗଲେ ଆଶ୍ଚର୍ଯ୍ୟ । ମନରେ ପ୍ରଶ୍ନ ଆସୁଛି କି ଓଡ଼ିଶାକୁ ପୁଣି ବଡ଼ ବିପଦ ମାଡ଼ିଆସୁନି ତ ? ପ୍ରଳୟଙ୍କାରୀ ବାତ୍ୟାର ପୂର୍ବ ଆଭାଷ ନୁହେଁ ତ ?

ପୁରୀଜିଲ୍ଲାର ଅସ୍ତରଙ୍ଗ ପିର ଯାହାନିଆ ସମୁଦ୍ର କୁଳ ହେଉଛି ଓଡ଼ିଶାର ଏକ ପ୍ରମୁଖ ପର୍ଯଟକ ସ୍ଥଳ । ଏଠାରେ ପ୍ରାୟ ସବୁସମୟରେ ପର୍ଯଟକଙ୍କର ଗହଳି ଦେଖିବାକୁ ମିଳିଥାଏ । ଅନ୍ୟ ସମୟ ଭଳି ଆଜି ମଧ୍ୟ ଅସ୍ତରଙ୍ଗ ସମୁଦ୍ରରେ ପର୍ଯଟକ ମାନେ ଗାଧୋଉଥିବାବେଳେ ସମୁଦ୍ର ଭିତରେ ଦେଖିବାକୁ ମିଳିଥିଲା ଏକ ବିରଳ ଚିତ୍ର ।

ପାଗ ଠିକଠାକ୍ ରହିଥିବା ବେଳେ ହଠାତ ସମୁଦ୍ର ଉପରେ ଘୋଟି ଆସିଥିଲା କଳାହାଣ୍ଡିଆ ମେଘ ଆଉ ଏହି ମେଘ ବାଦଲରୁ ସମୁଦ୍ର ମଧ୍ୟକୁ ଲମ୍ବିଯାଇଥିଲା ଏକ ଲମ୍ବା ହାତୀଶୁଣ୍ଢ । ଏହି ହାତୀଶୁଣ୍ଢ ପଡିବା ପରେ ସମୁଦ୍ର ମଧ୍ୟରେ ଆରମ୍ଭ କରିଥିଲା ଏକ ଜଳଚକ୍ର । ଏହି ହାତୀ ଶୁଣ୍ଢ ସମୁଦ୍ରରୁ ଟାଣି ନେଉଥିଲା ହଜାର ହଜାର ଲିଟର ସମୁଦ୍ର ଜଳ ।

ଆଉ ଏହି ବିରଳ ଚିତ୍ର ଦେଖିବାକୁ ମିଳିଥିଲା ସମୁଦ୍ର କୁଳଠାରୁ ମାତ୍ର କେଇ କିଲୋମିଟର ଦୂରରେ । ଏ ଭଳି ଦୃଶ୍ୟ କୁ ସମୁଦ୍ର କୂଳରେ ରହିଥିବା ପର୍ଯଟକ ମାନେ ଉପଭୋଗ କରିବା ସହିତ ନିଜ ନିଜ ମୋବାଇଲ ରେ ଭିଡିଓ ସୁଟିଂ କରି ଚାଲିଥିଲେ ।

ସେପଟେ ବଙ୍ଗୋପସାଗରରେ ସୃଷ୍ଟି ହୋଇଛି ଲଘୁଚାପ କ୍ଷେତ୍ର। ଆସନ୍ତା ୪୮ ଗଣ୍ଟା ମଧ୍ୟରେ ଘନୀଭୂତ ହୋଇପାରେ ଯଦି ଘନୀଭୂତ ହୁଏ ତେବେ ଓଡ଼ିଶାକୁ ବାତ୍ୟା ବିପଦ ରହିଛି । କିନ୍ତୁ ବାତ୍ୟାକୁ ନେଇ ଏପର୍ଯ୍ୟନ୍ତ ପାଣିପାଗ ବିଭାଗ କୌଣସି ସୂଚନା ଦେଇ ନାହାନ୍ତି। ହେଲେ ଅସ୍ତରଙ୍ଗରେ ଏଭଳି ଦୃଶ୍ୟ ବାତ୍ୟାର ପୂର୍ବାଭାଷ ବୋଲି ଲୋକେ ଆଶଙ୍କା କରିଛନ୍ତି ।

ସମୁଦ୍ର ମଝିରେ ହାତୀଶୁଣ୍ଢ କଣ ?
ଏହା ଏକ ପ୍ରକାର ଘୂର୍ଣ୍ଣିବାତ୍ୟା, ଯାହା ପାଣି ଉପରେ ସୃଷ୍ଟି ହୋଇଥାଏ । ଦେଖିବାକୁ ଏହା ଆକାଶରୁ ସମୁଦ୍ର ପାଣିକୁ ସଂଯୋଗ କରୁଥିବା ଏକ ଲମ୍ବା ସ୍ତମ୍ଭ ପରି ଲାଗେ, ଯାହା ହାତୀର ଶୁଣ୍ଢ ପରି ଦେଖାଯାଏ ।

କିପରି ସୃଷ୍ଟି ହୁଏ ?
ଯେତେବେଳେ ଉଷ୍ଣ ଓ ଆର୍ଦ୍ର ବାୟୁ ଥଣ୍ଡା ବାୟୁ ସହ ମିଶେ, ସେତେବେଳେ ଏହା ସୃଷ୍ଟି ହୁଏ । ଏହା ମୁଖ୍ୟତଃ କୁମୁଲୁନିମ୍ବସ (Cumulonimbus) ମେଘରୁ ସୃଷ୍ଟି ହୋଇ ପାଣିକୁ ଟାଣି ନେଇଥାଏ ।