ଶେଷ ହୋଇଛି ଚଳିତ ବର୍ଷର ମାଟ୍ରିକ ପରୀକ୍ଷା।ଶେଷ ଦିନ ତୃତିୟ ଭାଷା ପରୀକ୍ଷା ଥିବା ବେଳେ ପୂର୍ବ ପରୀକ୍ଷା ଭଳି ଶେଷ ଦିନର ପରୀକ୍ଷା ମଧ୍ୟ ଶୃଙ୍ଖଳିତ ଢଙ୍ଗରେ ଶେଷ ହୋଇଛି । ପରୀକ୍ଷା ଶେଷ ହେବା ପରେ ହସ ହସ ମୁହଁରେ ପରୀକ୍ଷା କେନ୍ଦ୍ରରୁ ବାହାରିଥିଲେ ପରୀକ୍ଷାର୍ଥୀ । ପରୀକ୍ଷାର୍ଥୀଙ୍କ ଚେହେରାରେ ଥିବା ଖୁସି ହିଁ ବୟାନ କରୁଥିଲା ଯେ ପରୀକ୍ଷା ବେଶ ଭଲରେ ଶେଷ ହୋଇଛି । ଚଳିତବର୍ଷ ମାଟ୍ରିକ ପରୀକ୍ଷା ସଫଳତା ଓ ଶାନ୍ତି ଶୃଙ୍ଖଳାରେ ଶେଷ ହେବା ପଛରେ ରହିଛି ଅନେକ କାରଣ।

ସେଥିମଧ୍ୟରେ ଗୁରୁତ୍ବପୂର୍ଣ୍ଣ ଭୁମିକା ନିର୍ବାହ କରିଥିଲା ପ୍ରଶ୍ନପତ୍ରରେ ତ୍ରୀସ୍ତରୀୟ ସୁରକ୍ଷା ବ୍ୟବସ୍ଥା ଓ ଏଆଇ କ୍ୟାମେରା ସମ୍ବଳିତ କମାଣ୍ଡ କଣ୍ଟୋଲ ରୁମ । ବିଶେଷ କରି ପ୍ରଶ୍ନପତ୍ର ଭାଇରାଲକୁ ରୋକିବା ପାଇଁ ପ୍ରଶ୍ନପତ୍ରକୁ କ୍ୱିଆରକୋର୍ଡ, ସିରିଏଲ ନମ୍ବର ଓ ଡାଇନାମିକ କୋର୍ଡର ବ୍ୟବସ୍ଥାକୁ ଗ୍ରହଣ କରିଥିଲା ବୋର୍ଡ । ତେଣୁ ପ୍ରଶ୍ନ ପତ୍ରଗୁଡ଼ିକୁ ଭାଇରାଲ ହେଲେ ସହଜରେ ଚିହ୍ନଟ ହୋଇଯିବାର ଭୟ ହିଁ ବିଶୃଙ୍ଖଳାକାରୀଙ୍କୁ ଏହି କାର୍ଯ୍ୟରୁ ନିବୃତ ରଖିଥିଲା ।

ଏହା ବ୍ୟତିତ ସମସ୍ତ ୩୧୩୩ଟି ପରୀକ୍ଷା କେନ୍ଦ୍ର ଓ ନୋଡାଲ ସେଣ୍ଟରରେ ସିସିଟିଭି ସର୍ଭେଲାନ୍ସ ଏବଂ ଏଆଇ ସମ୍ବଳିତ କମାଣ୍ଡ କଣ୍ଟୋଲ ରୁମ ଜରିଆରେ ୬ ଶହଟି ପରୀକ୍ଷା କେନ୍ଦ୍ରର ଲାଇଭ ସିସିଟିଭି ଫୁଟେଜକୁ ଯାଞ୍ଚ ବ୍ୟବସ୍ଥା ମଧ୍ୟ କେବଳ ପରୀକ୍ଷା ଶୃଙ୍ଖଳିତ କରିନାହିଁ ବରଂ କପି ଉପରେ ମଧ୍ୟ ରୋକ ଲଗାଇବାରେ ସଫଳ ହୋଇଛି । ପରୀକ୍ଷା ଶେଷ ହେବା ପରେ ଏବେ ଖାତା ଦେଖା ଓ ଫଳ ପ୍ରକାଶନ ପାଇଁ ବୋର୍ଡ ପୂର୍ବ ଯୋଜନା ମୁତାବକ କାର୍ଯ୍ୟ ଆରମ୍ଭ କରିଛି । ଖାତା ଦେଖା ପାଇଁ ରାଜ୍ୟରେ ମୋଟ ୫୨ଟି କେନ୍ଦ୍ର କରାଯାଇଥିବା ବେଳେ ଆସନ୍ତା ୧୯ ତାରିଖରୁ ଖାତା ଦେଖା ଆରମ୍ଭ କରିବାକୁ ଯାଉଛି ବୋର୍ଡ । ଏହା ସହ ମେ ମାସ ପ୍ରଥମ ସପ୍ତାହରେ ପରୀକ୍ଷା ଫଳ ପ୍ରକାଶ ପାଇବ ବୋଲି ସୂଚନା ଦେଇଛନ୍ତି ବୋର୍ଡ଼ ସଭାପତି ।

ରାଜ୍ୟରେ 5 ଲକ୍ଷ 22 ହଜାର ପରୀକ୍ଷାର୍ଥୀ ଚଳିତ ବର୍ଷ ମାଟ୍ରିକ ପରୀକ୍ଷା ଦେଇଥିବା ବେଳେ ପ୍ରଶ୍ନ ପତ୍ର ଭାଇରାଲ ଭଳି ଘଟଣା କୁ ରୋକିବା ର୍ବ ସଫଳ ହୋଇଛି ବୋର୍ଡ ।