ଅର୍ଗସ ବ୍ୟୁରୋ: ବେଫିକର ରାଜ୍ୟ ସରକାର, ବେଫିକର ପ୍ରଶାସନ । ଗାଁରେ କାମ ନାହିଁ କି ଜିଲ୍ଲାରେ କାମ ନାହିଁ । ପରିବାର ଚଳାଇବା ଚିନ୍ତାରେ ଇଚ୍ଛା ନଥାଇ ବି ଦାଦନ ଯାଉଛି ଗାଁର ଭେଣ୍ଡିଆ ପୁଅ । ସ୍ଥିତି ଏମିତି ହେଲାଣି ଯେ କେନ୍ଦ୍ରାପଡ଼ା ସାତଭାୟା ଗାଁରେ ଯୁବକ ଆଉ ନାହାନ୍ତି । ୧୨ ଶହ ପରିବାରରୁ ୧୨ ଶହ ଦାଦନ ଯାଇଛନ୍ତି । ଆଉ ସବୁ ଜାଣିଶୁଣି ନାହିରେ ତେଲମାରି ବସିଛି ପ୍ରଶାସନ । ହେଲେ ଏମିତି ଘଟଣା ସାମ୍ନାକୁ ଆସିବା ପରେ ଓଡ଼ିଆଙ୍କୁ ନବୀନ ବାବୁ କେତେ ଭଲପାଆନ୍ତି ତାହା ସ୍ପଷ୍ଟ ହୋଇଛି ।

କେନ୍ଦ୍ରାପଡାରୁ କେରଳ...ପ୍ରାୟ ୨୫ ଶହ କିଲୋମିଟର । ହେଲେ ବି ଗଡୁଛି ବସ୍‌ । ବୁହାଯାଉଛନ୍ତି ଦାଦନ । କଥାଟା ଶୁଣିବା ପରେ ଆଶ୍ଚର୍ଯ୍ୟ ଲାଗୁଥିବ । ଭାବୁଥିବେ ୨୫ ଶହ କି.ମି ରାସ୍ତା, ବସ୍‌ରେ କେମିତି ଯାଉଛନ୍ତି ଲୋକେ ? ହେଲେ ବିକଳ୍ପ କଣ ଅଛି ? ପରିବାର ଚଳାଇବାକୁ ହେଲେ ଦାଦନ ହିଁ ଏତମାତ୍ର ବିକଳ୍ପ । ଏଠାରେ ପ୍ରଶ୍ନ ଉଠୁଛି, ରାଜ୍ୟରେ ଯଦି ଏମଏସଏମଇ ଦ୍ଵାରା ଲକ୍ଷଲକ୍ଷ ଯୁବପିଢିଙ୍କୁ ଚାକିରି ମିଳୁଛି ତେବେ କେନ୍ଦ୍ରାପଡାରେ ଏହି ଯୁବକଯୁବତୀମାନେ ଯୋଜନାରୁ ବାଦ୍‌ ପଡିଲେ କେମିତି ? କେନ୍ଦ୍ରାପଡା ପିଲା କଣ ନବୀନ ବାବୁଙ୍କର ସାବତ ପୁଅ କି ? କିଛି ଏମିତି ପ୍ରଶ୍ନ ଏବେ ଜିଲ୍ଲାର ପିଲାଙ୍କ ମନରେ ଉଙ୍କିମାରୁଥିବା ବେଳେ ଉତ୍ତର କିନ୍ତୁ କାହା ପାଖରେ ନାହିଁ ।

ସାତଭାୟା । ସମୁଦ୍ର କୂଳର ଗାଁଟିଏ । ହେଲେ ଜଳବାୟୁ ପରିବର୍ତ୍ତନ ଲାଗି ସମୁଦ୍ର ଆଁରେ ଗାଁ । ବାରମ୍ବାର ଦାବି ପରେ ରହିବାକୁ ଘର ସିନା ଦେଇଦେଲେ ସରକାର ହେଲେ ରୋଜଗାର ଦେବାକୁ ପୂରା ଭୁଲିଗଲେ । ସେଇଥି ଲାଗି ଇଚ୍ଛା ନଥିଲେ ବି ଏବେ ବାହାର ରାଜ୍ୟରେ ଯାଇ କିଏ ଇଟା ବୋହୁଛି ତ ଆଉ କିଏ ସିମେଣ୍ଟ ବୋହୁଛି । ଜାଣି ଆଶ୍ଚର୍ଯ୍ୟ ହେବେ କି ବାରମ୍ବାର ନବୀନ ବାବୁ କହୁଛନ୍ତି ଆମେ ମାଆଙ୍କୁ ସମ୍ମାନ ଦେଉଛୁ, ତାଙ୍କ ଲାଗି ଯୋଜନା କରୁଛୁ । ହେଲେ ସେ ଯୋଜନାଟା କେଉଁଠି ବାଟ ହୁଡିଛି ସେନେଇ କିନ୍ତୁ କେହି କିଛି କହିବାକୁ ନାରାଜ । ଆଉ ପରସ୍ଥିତିର କଷାଘାତରେ ପଡି ମାତ୍ର ୧୨ ହଜାର ପାଇଁ ଦାଦନ ଯାଉଛି ଗାଁର ପିଲା । ଏବେ ଭୋଟ୍‌ ଆସିଲାଣି, ନୂଆନୂଆ କେତେ କଣ ଯୋଜନା କରିବେ ସରକାର । ହେଲେ କାର୍ଯ୍ୟକାରିତ କେବେ ହେବ ? ଦାଦନ ସମସ୍ୟା କେତେ ଦୂର ହେବ ? ଗାଁରେ ପୁରୁଷ କେବେ ରହିବେ ? ସେ ଉତ୍ତର କିନ୍ତୁ ସରକାରଙ୍କୁ ହିଁ ଦେବାକୁ ପଡିବ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV