ମନରେଗା ନାଁରେ ମହାଲୁଟ୍ । ପୋଖରୀ ଖୋଳାଯିବ କହି ଲକ୍ଷ ଲକ୍ଷ ଟଙ୍କା ଲୁଟ୍ । ଏଭଳି ଅଭିଯୋଗ ଆସିଛି କଳାହାଣ୍ଡି ଜିଲ୍ଲା ବଡ଼ଛତ୍ରଙ୍ଗ ପଞ୍ଚାୟତର ଦୁର୍ଗମ ଦାବ୍ରିଗୁଡା ଗାଁରୁ । ଗାଁରେ ଜଳଛାୟା ପକଳ୍ପ ଦ୍ୱାରା ୨୦୨୪-୨୫ ଆର୍ଥିକ ବର୍ଷରେ ୧ ଲକ୍ଷ ୬୫ ହଜାର ଟଙ୍କାରେ ପୋଖରୀ ଖନନହେବା କଥା । ମେଟେରିଆଲ ବାବଦକୁ ୩୫ ହଜାର ୧୩୦ଟଙ୍କା ଥିବା ବେଳେ ଶ୍ରମିକ ମଜୁରୀ ବାବଦକୁ ୧ଲକ୍ଷ ୨୯ ହଜାର ୮୭୦ ଟଙ୍କା ଏଷ୍ଟିମେଟରେ ରହିଛି । ହେଲେ ହୋଇନି ପୋଖରୀ ଖନନ ।

ସବୁଠୁ ଆଶ୍ଚର୍ଯ୍ୟର କଥା ପୋଖରୀ ପାଇଁ ମୁଠାଏ ମାଟି ଉଠିନଥିବା ବେଳେ ଶ୍ରମିକ ମଜୁରୀ ବାବଦକୁ ୩୮ ହଜାର ୭୨୦ ଟଙ୍କା ଉଠି ସାରିଲାଣି । ପୋଖରୀ ମାଲିକ ବୁଡା ମାଝୀ ମଧ୍ୟ ଜାଣି ନାହାଁନ୍ତି ତାଙ୍କର ପୋଖରୀ ଖୋଳା ପାଇଁ ଟଙ୍କା ଆସିଛି । ଅନ୍ୟ ପକ୍ଷରେ କାମ ହୋଇଛି କହି ପୁରୁଣା ଫଟୋକୁ ଅପଲୋଡ଼ କରି ଆହୁରି ୩୩ ହଜାର ୭୯୨ଟଙ୍କା ଠିକାଦାର ଡିମାଣ୍ଡ କରିଥିବା ଅଭିଯୋଗ ହୋଇଛି ।

ଦୁର୍ନୀତିରେ କେବଳ ଠିକାଦାର ନୁହେଁ, ବିଭାଗୀୟ ଅଧିକାରୀ ଠାରୁ ଆରମ୍ଭ କରି କର୍ମଚାରୀ ପର୍ଯ୍ୟନ୍ତ ସମସ୍ତେ ସରକାରୀ ଟଙ୍କା କୁ ଆତ୍ମସାତ କରୁଥିବା ଅଭିଯୋଗ କରୁଛନ୍ତି ଦୁର୍ଗମବାସୀ । ତେଣୁ ଏହାର ଭିଜିଲାନ୍ସସ୍ତରୀୟ ତଦନ୍ତ କଲେ ବହୁ ରହସ୍ୟ ଉନ୍ମୋଚନ ହେବ ବୋଲି ସାଧାରଣରେ ଦାବୀ ହୋଇଛି ।