ପୁରୀରେ ୨୪ ଘଣ୍ଟାରେ ଦୁଇ ଦୁଇଟି ମର୍ଡର । ଟାଇଲ ମିସ୍ତ୍ରୀକୁ ହତ୍ୟା ପରେ ଜଣେ ନାବାଳକର ନେଲେ ଜୀବନ । ପୋଲିସକୁ ଚ୍ୟାଲେଞ୍ଜ ଦେଇ ଅପରାଧ ଘଟାଉଛନ୍ତି ଅପରାଧୀ । ଭୟଭୀତ ଅବସ୍ଥାରେ ପୁରୀ ସହରବାସୀ ଓ ପର୍ଯ୍ୟଟକ ।

ଗତ ୨୪ ଘଣ୍ଟାରେ ପୁରୀରେ ଘଟିଛି ଡବଲ୍ ମର୍ଡର । ଗତକାଲି ଜଣେ ନାବାଳକର ମୃତଦେହ ଶ୍ରୀସେତୁ ନିକଟ ଜଳଭଣ୍ଡାରରୁ ପୋଲିସ ଉଦ୍ଧାର କରିଥିବା ବେଳେ ଗୁରୁବାର ସ୍ପଟରେ ସଦରଥାନା ପୋଲିସ ଓ ସାଇନଟିଫିକ୍ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ମୃତ ନାବାଳକ ହେଉଛନ୍ତି ପୁରୀ ଟାଉନଥାନା ଅଞ୍ଚଳର ସୂର୍ଯ୍ୟ ସାହୁ । ନାବାଳକୁ ହତ୍ୟାକରି ଫିଙ୍ଗି ଦେଇଥିବା ଚାଞ୍ଚଲ୍ୟକର ଅଭିଯୋଗ ଆଣିଛନ୍ତି ମୃତକଙ୍କ ମା । ମୃତ ନାବାଳକ ମଙ୍ଗଳବାର ଦିନ ଜଳଖିଆ ଆଣିବାକୁ ଯାଇ ଆଉ ଘରକୁ ଫେରିନଥିଲା ।

ଏନେଇ ଥାନାରେ ନିଖୋଜ ପରେ ନାବାଳକର ମୋବାଇଲ ଟ୍ରେସ୍ କରି ଶ୍ରୀସେତୁ ନିକଟ ଜଳଭଣ୍ଡାରରୁ ମୃତ ଦେହ ଠାବ କରିଥିଲା ପୋଲିସ । ନାବାଳକର ମୁଣ୍ଡରେ ଗଭୀର ଆଘାତ ଲାଗିଥିବାର ଦେଖିବାକୁ ମିଳିଥିଲା । ପୂର୍ବ ଶତ୍ରୁତାକୁ ନେଇ ନାବାଳକକୁ ସେହି ଅଞ୍ଚଳର କିଛି ଯୁବକ ହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି ।

ସେପଟେ ଗତକାଲି ପୁରୀ ପେଣ୍ଠକଟା ମେରାଇନ୍ ଥାନା ବ୍ରାହ୍ମଣପୋଖରୀ ସନାତନ ବିହାରରେ ଜଣେ ଟାଇଲ୍ ମିସ୍ତ୍ରୀଙ୍କୁ ମଧ୍ୟ ହତ୍ୟା କରାଯାଇଥିଲା । ହାତୁଡ଼ିରେ ମାରିମାରି ଅତି ନୃସଂସ ଭାବରେ ହତ୍ୟା କରିଥିବା ଅଭିଯୋଗ ହୋଇଥିଲା। ପଶ୍ଚିମବଙ୍ଗ ମେଦିନୀପୁରର ଟାଇଲ୍ ମିସ୍ତ୍ରୀ ଶେଖ୍ ନୋରା ଆଲମ୍ ଆଲିଆସ୍ ରାଜେଶଙ୍କ କିଛି ସହଯୋଗୀଙ୍କ ସହ ବଚସା ହୋଇଥିଲା । ଏଥିରେ ତାର ସହଯୋଗୀ ଉତକ୍ଷିପ୍ତ ହୋଇ ହାତୁଡ଼ିରେ ଛେଚି ହତ୍ୟା କରି ଫେରାର୍ ହୋଇଯାଇଥିଲା । ପେଣ୍ଠକଟା ମେରାଇନ୍ ଥାନା ପୋଲିସ ପଶ୍ଚିମବଙ୍ଗ ଯାଇ ଅଭିଯୁକ୍ତ ମୁଶାରଫ୍‌କୁ ଗିରଫ କରିଛି । ପୁରୀ ଭଳି ପର୍ଯ୍ୟଟନ କ୍ଷେତ୍ରରେ ଗତ ୨୪ ଘଣ୍ଟାରେ ଦୁଇ ଦୁଇଟି ମର୍ଡର ହୋଇଥିବାରୁ ପାଟ୍ରୋଲିଂକୁ କଡ଼ାକଡ଼ି କରିବାକୁ ସାଧାରଣରେ ଦାବି ହୋଇଛି ।