ଭୁବନେଶ୍ଵର: ରାଜଧାନୀର ଭିଆଇପି ଏରିଆରୁ ଚୋରି । ନେଇଗଲେ ୫୦ ଲକ୍ଷରୁ ଅଧିକ ମୂଲ୍ୟର ସୁନା ଗହଣା । ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରୁ ଲୁଟ୍ ହୋଇଛି । ନିରଞ୍ଜନଙ୍କ ନୟାପଲ୍ଲୀ ଭିଆଇପି ଏରିଆରେ ଥିବା ଘରୁ ଲୁଟ୍ ନେଇ ନୟାପଲ୍ଲୀ ଥାନାରେ ଅଭିଯୋଗ ହୋଇଛି ।

ନିରଞ୍ଜନଙ୍କ ଘରୁ ସୁନା, ଗହଣା ଓ ନଗଦ ଟଙ୍କା ଲୁଟ୍ ହୋଇଥିବା ଅଭିଯୋଗ ପରେ ଘରେ ପହଞ୍ଚି ଖୋଳତାଡ଼ କରୁଛି ନୟାପଲ୍ଲୀ ଥାନା ପୋଲିସ । ଘରେ ଲାଗିଥିବା ସିସିଟିଭିରେ ମୁଖାପିନ୍ଧା ଚୋର ଦେଖା ଯାଉଥିବା ବେଳେ ପୋଲିସ ଛାନଭିନ୍ କରୁଛି । ଲୁଟେରା ଜଣଙ୍କ ମୁହଁରେ କପଡ଼ା ବାନ୍ଧି ଘରେ ପଶୁଥିବା ସିସିଟିଭିରେ ରେକର୍ଡ ହୋଇଛି ।

ରାତି ପ୍ରାୟ ସାଢ଼େ ୨ଟା ସମୟରେ ନିରଞ୍ଜନ ପଟ୍ଟନାୟକଙ୍କ ଘରେ ପଶିଥିଲା ଲୁଟେରା । ପ୍ରାୟ ଘଣ୍ଟାଏ ଧରି ଲୁଟେରା ଜଣଙ୍କ ଘରେ ଲୁଟପାଟ କରୁଥିଲେ । ଲୁଟ୍ ସମୟରେ ଘରେ ଥିଲେ ନିରଞ୍ଜନ ଓ ତାଙ୍କ ପତ୍ନୀ ଏବଂ ନାତି । ଶବ୍ଦ ଶୁଣି ସେମାନେ ଆସିବା ବେଳକୁ ଚୋର ଭିତରୁ ପଟୁ କବାଟ ଲକ କରି ଝରକା ଦେଇ ଡେଇଁ ପଳାଇଥିଲା ।