ରାଜ୍ୟ ସମେତ ଦକ୍ଷିଣ ଓଡ଼ିଶାକୁ ମୋଦି ସରକାରଙ୍କ ନୂଆ ବର୍ଷ ପାଇଁ ବଡ଼ ଭେଟି । ଏକାବେଳେକେ ମିଳିଲା ୧୫୨୬ କୋଟି । ୩୨୬ ଜାତୀୟ ରାଜପଥର ହେବ ନବ କଳେବର, ଲାଭବାନ ହେବେ ଲକ୍ଷ ଲକ୍ଷ ଜନତାଙ୍କ ସହ ଆଜି ଓ ଭବିଷ୍ୟତ ପିଢ଼ି ।

୩୨୬ ନମ୍ଵର ଜାତୀୟ ରାଜପଥକୁ ନେଇ ମୋଦି ସରକାର ନେଇଛନ୍ତି ବଡ଼ ନିଷ୍ପତ୍ତି । ଏହାର ବିସ୍ତାର କରିବା ପାଇଁ ପ୍ରସ୍ତାବରେ ମୋହର ମାରିଛି କେନ୍ଦ୍ର କ୍ୟାବିନେଟ୍ । ଫଳରେ ଗଜପତି, ରାୟଗଡ଼ା, କୋରାପୁଟ ଜିଲ୍ଲା ଲାଭନ୍ୱିତ ହେବ ।

ଆଲୁମିନିୟନ ଶିଳ୍ପର ବିକାଶ ସହ କୋରାପୁଟର କଫି ଚାଷୀ ଲାଭ ପାଇବେ । ୨୪୩ କିଲୋମିଟର ପାଇଁ ଖର୍ଚ୍ଚ ହେବ ୧ ହଜାର ୫୨୬ କୋଟି ଟଙ୍କା । ଏହି ବଡ଼ ନିଷ୍ପତ୍ତି ପାଇଁ ପିଏମ୍ ମୋଦି ଓ କେନ୍ଦ୍ରମନ୍ତ୍ରୀ ନୀତୀନ ଗଡ଼କରୀଙ୍କୁ ଧନ୍ୟବାଦ ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କହିଛନ୍ତି, ଏହି ପ୍ରକଳ୍ପ ଗଜପତିର ମୋହନା, ରାୟଗଡ଼ା ଓ କୋରାପୁଟ ଜିଲ୍ଲାରେ ଯୋଗାଯୋଗକୁ ସୁଗମ କରିବା ସହ ଆଞ୍ଚଳିକ ଅର୍ଥନୀତିକୁ ନୂଆ ଗତି ଦେବ । ଏହି ପଦକ୍ଷେପ ଦ୍ଵାରା ଶିଳ୍ପ, ଶିକ୍ଷାନୁଷ୍ଠାନ ଓ ପର୍ଯ୍ୟଟନ କେନ୍ଦ୍ରଗୁଡ଼ିକର ବିକାଶ ହେବ । ସ୍ଥାନୀୟ ଲୋକଙ୍କ ପାଇଁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ ।

ଖଣି ଖାଦାନ ଭରା ଅବିଭକ୍ତ କୋରାପୁଟ ଜିଲ୍ଲା ଜାତୀୟ ରାଜପଥର ବିସ୍ତାରରେ ଖୋଲିବ ବିକାଶର ଅନେକ ବାଟ। ପ୍ରକଳ୍ପ ମୂଲ୍ୟ ୧୫୨୬.୨୧ କୋଟି ଟଙ୍କାରୁ ୯୯୬.୭୬ କୋଟି ଟଙ୍କା ସିଭିଲ୍ ନିର୍ମାଣ କାର୍ଯ୍ୟରେ ବ୍ୟବହାର କରାଯିବ । ଏହା ବଜାର ଓ ନିଯୁକ୍ତି ସୁଯୋଗ ସୃଷ୍ଟିରେ ସହାୟକ ହେବ ।

ଏହି ପ୍ରକଳ୍ପ ମୋହନା-କୋରାପୁଟ ପର୍ଯ୍ୟନ୍ତ ଏକ ପ୍ରମୁଖ ଅର୍ଥନୈତିକ ଓ ଲଜିଷ୍ଟିକ୍ସ ହବ୍‌ରେ ପରିଣତ ହେବ । ଜାତୀୟ ରାଜପଥ-୨୬, ୫୯ ଓ ୧୬ ଏବଂ ରାୟପୁର-ବିଶାଖାପାଟଣା ସହ ଏହା ଯୋଡ଼ିହେବ । ଗୋପାଳପୁର ବନ୍ଦର, ଜୟପୁର ବିମାନବନ୍ଦର ଓ ବହୁ ରେଳ ଷ୍ଟେସନ ପର୍ଯ୍ୟନ୍ତ ସଡ଼କ ଯୋଗାଯୋଗରେ ଉନ୍ନତି ହେବ ।

ବିଜେପିର ଡବଲ ଇଞ୍ଜିନ ସରକାରଙ୍କ ଫୋକସରେ ଆଦିବାସୀ ବହୁଳ ଜିଲ୍ଲା । ଗତ ବର୍ଷ ରେଳ ଲାଇନ ସଂପ୍ରସାରଣ ଭେଟି ଓ ଚଳିତ ବର୍ଷ ରାସ୍ତା ସଂପ୍ରସାରଣକୁ ମିଳିଥିବା ଉପହାରକୁ ନେଇ ଉତ୍ସାହିତ ଅଞ୍ଚଳବାସୀ । ଯୁବ ପିଢ଼ିଙ୍କ ପାଇଁ ରୋଜଗାର ସହ ଯାତାୟାତ ଓ ଆର୍ଥିକ ସ୍ଥିତି ସୁଧାରିବାର ଲାଇଫ ଲାଇନ ପାଲଟିବ ଏହି ଯୋଜନା ।