ଜଙ୍ଗଲ ଛାଡ଼ି ରାଜରାସ୍ତାରେ ମାଙ୍କଡ଼ l ଜଙ୍ଗଲରେ ଖାଦ୍ୟ ଅଭାବରୁ ରାସ୍ତାକୁ ଆସି ପଥଚାରିଙ୍କ ଉପରେ କରୁଛନ୍ତି ଆକ୍ରମଣ । ଖୋର୍ଦ୍ଧା- ବଲାଙ୍ଗୀର 57 ନମ୍ବର ଜାତୀୟ ରାଜପଥରେ ଦେଖିବାକୁ ମିଳୁଛି ଏପରି ମାଙ୍କଡ଼ଙ୍କ ଦୈରାତ୍ମ୍ୟ । ମହୀପୁର -ନୂଆଗାଁ ଜଙ୍ଗଲରେ ଖାଦ୍ୟ ଅଭାବରୁ ରାସ୍ତାକୁ ଚାଲିଆସୁଛନ୍ତି ଶହ ଶହ ମାଙ୍କଡ଼ l ଏଥିଯୋଗୁଁ ପ୍ରତିଦିନ ଏକାଧିକ ସଡ଼କ ଦୁର୍ଘଟଣା ଘଟୁଥିବା ବେଳେ ଗାଡି ଧକ୍କାରେ ବି ବହୁ ମାଙ୍କଡ଼ଙ୍କ ଜୀବନ ଯାଉଛି l ଜଙ୍ଗଲରେ ପ୍ରଚୁର ଖାଦ୍ୟ ନଥିବାରୁ ଶହ ଶହ ମାଙ୍କଡ଼ ଖାଦ୍ୟସନ୍ଧାନରେ ରାସ୍ତା ଉପରକୁ ଚାଲି ଆସୁଛନ୍ତି l କିଛି ପଥଚାରୀ ଓ ଗାଡିଚାଳକ ରାସ୍ତାରେ ମାଙ୍କଡ଼ଙ୍କୁ ନିୟମିତ ଖାଇବାକୁ ଦେଉଥିବାରୁ ଜାତୀୟ ରାଜପଥ ଉପରକୁ ଆସୁଥିବା ମାଙ୍କଡ଼ଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏଦିଗରେ ବନ ବିଭାଗ ଓ ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି। l

ଜଙ୍ଗଲରେ ଆବଶ୍ୟକ ମୁତାବକ କୋଳି ଓ ଛୁଇଁ ଜାତୀୟ ଗଛ ହ୍ରାସ ପାଇଥିବାରୁ ମାଙ୍କଡ଼ଙ୍କ ପାଇଁ ଖାଦ୍ୟାଭାବ ଦେଖା ଦେଉଛି l ଏଦିଗରେ ମହୀପୁରଠାରୁ ନୂଆଗାଁ ପର୍ଯ୍ୟନ୍ତ ପ୍ରାୟ 10 ବର୍ଗ କିଲୋମିଟର ଜଙ୍ଗଲରେ ପ୍ରଚୁର କୋଳି ଓ ଛୁଇଁ ଜାତୀୟ ଚାରାରୋପଣ ଉପରେ ଜୋର ଦେଇଛନ୍ତି ପରିବେଶପ୍ରେମୀ। ସେପଟେ ମାଙ୍କଡ଼ମାନଙ୍କୁ ଖାଦ୍ୟ ନଦେବା ନେଇ ପଥଚାରୀଙ୍କୁ ବ୍ୟାପକ ସଚେତନତା କରାଗଲେ ଏକାଧିକ ଦୁର୍ଘଟଣାକୁ ରୋକାଯାଇ ପାରିବ ମତପ୍ରକାଶ ପାଇଛି।

ଜଙ୍ଗଲ ଓ ବନ୍ୟଜନ୍ତୁଙ୍କ ସୁରକ୍ଷା ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ମହୀପୁର- ନୂଆଗାଁ ଜଙ୍ଗଲରେ ମାଙ୍କଡ଼ଙ୍କ ସୁରକ୍ଷିତ ବଂଶବୃଦ୍ଧି ସହ ଦୈନିକ ସଡ଼କ ଦୁର୍ଘଟଣା ରୋକିବାକୁ ଜିଲ୍ଲା ପ୍ରଶାସନ ଗୁରୁତର ସହ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି l