ପାଉଁଶ ପୋଖରୀ ପାଇଁ ମନ ଇଚ୍ଛା ଖୋଳି ନେଇ ଯାଉଛନ୍ତି ମୋରମ
ଝାରସୁଗୁଡ଼ାର ମୋରମ୍ ଚୋରା ଚାଲାଣରେ ଲାଗୁନି ଲଗାମ୍ । ଧିରେ ଧିରେ ଖାଲି ହେବାରେ ଲାଗିଲାଣି ଇବ୍ ଉପତ୍ୟକାର ମୋରମ୍ ଚଟାଣ । ପ୍ରଶାସନ ଓ ଖଣି ବିଭାଗର ନାକ ତଳେ ମନଇଚ୍ଛା ଚାଲିଛି ଲଘୁ ଖଣିଜର ଲୁଟ୍ । ସରକାରୀ ତହବିଲ୍କୁ ଆସୁନି ରାଜସ୍ୱ । ମୋରମ୍ ଚୋରିରେ ବେଫିକର ମାଫିଆ, ଆଉ ଚୁପ୍ ବସିଛି ପ୍ରଶାସନ ।
କନ୍ଷ୍ଟ୍ରକସନ କମ୍ପାନିଗୁଡ଼ିକର ନିର୍ମାଣ କାର୍ଯ୍ୟ ତଥା ବେଆଇନ ପାଉଁଶ ପୋଖରୀ ନିର୍ମାଣ ପାଇଁ ମୋରମ୍ ଚଟାଣ କାଟି ବେଧଡ଼କ ବିକ୍ରି କରି ଦିଆଯାଉଥିବା ଘଟଣା ସାମ୍ନାକୁ ଆସୁଛି । କିନ୍ତୁ ଏନେଇ ବାରମ୍ବାର ଅଭିଯୋଗ ପରେ ବି ଖଣି ବିଭାଗ ନିରବଦ୍ରଷ୍ଟା ସାଜିଛି । ସରକାରୀ ଭାବେ ଝାରସୁଗୁଡ଼ା ଜିଲ୍ଲାରେ ୭ଟି ମୋରମ୍ ଖାଦାନ ରହିଛି । କିନ୍ତୁ ଗତ ୨ ବର୍ଷର ତଥ୍ୟକୁ ଅନୁଶୀଳନ କଲେ କେବଳ ଝାରସୁଗୁଡ଼ା ତହସିଲ ଅନ୍ତର୍ଗତ ୧୫ରୁ ଊର୍ଦ୍ଧ୍ୱ ସ୍ଥାନରୁ ମୋରୁମ୍ ଚୋରି ହେବାର ନଜିର ରହିଛି । ମୋରମ୍କୁ ମାଫିଆମାନେ ଖୋଲା ବଜାରରେ ଟ୍ରିପ୍ ପିଛା ୪ ହଜାରରୁ ସାଢ଼େ ୪ ହଜାର ଟଙ୍କାରେ ବିକ୍ରି କରୁଛନ୍ତି ।
ବିଗତ କିଛି ମାସ ହେବ ଝାରସୁଗୁଡ଼ା ତହସିଲ ଅନ୍ତର୍ଗତ ଲହଣ୍ଡାବୁଡ଼ ମୌଜାରେ ଥିବା ଚିଲିଂ ପ୍ଳାଣ୍ଟ ନିକଟରେ ଥିବା ବିଶାଳ ମୋରୁମ୍ ଚଟାଣରୁ ଓ ପଞ୍ଚପଡ଼ା ମୌଜାରୁ ବେଧଡ଼କ ମୋରୁମ୍ ଚାଲାଣ କରାଯାଉଛି । ବିଶେଷ କରି ରାତି ସମୟରେ ଏହି ଚୋରି ହେଉଥିବାରୁ ମୋରୁମ୍ କେଉଁଠିକୁ ଯାଉଛି, କିଏ ନେଉଛି ପ୍ରଶାସନ ତାହାର ଟେର୍ ପାଉନି । ଆଉ ଖଣି ଅଧିକାରୀ କହୁଛନ୍ତି, ଧରାପଡ଼ିଲେ ଫାଇନ୍ କଟାଯାଉଛି ।
ମାଫିଆ ମାନଙ୍କୁ ଧରି ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ଦାବି ଜୋର ଧରିଛି । ନହେଲେ ଧିରେ ଧିରେ ଖାଲି ହୋଇଯିବ ଇବ୍ ଉପତ୍ୟକାର ଏ ମୋରମ୍ ଚଟାଣ ।
