କେତେବେଳେ ହାତୀ ମାରୁଛି ତ କେବଳ ମଣିଷ କରୁଛି ହାତୀ ଶିକାର । ଜଙ୍ଗଲ ଛାଡି ଜନବସତି ମୁହାଁ ଗଜରାଜ । ରାତି ଅଧରେ ହାତୀ ଆସୁଛି, ଘର ଭାଙ୍ଗୁଛି, ଫସଲ ନଷ୍ଟ କରୁଛି ହାବୁଡରେ ପଡିଲେ ମଣିଷକୁ ବି ଦଳି ଦେଉଛି ।  କେବଳ ଜଙ୍ଗଲ ପାଖ ଗାଁ ନୁହେଁ ସହରରେ ବି ବଢୁଛି ହାତୀ ଭୟ । ଓଡିଶାରେ ହାତୀ ମଣିଷ ଲଢେଇ ଏବେ ନିତିଦିନିଆ ଘଟଣା ।

ହାତୀ ମଣିଷ ଲଢେଇରେ ପୂର୍ଣଛେଦ ପାଇଁ ରାଜଧାନୀରେ 2 ଦିନିଆ କର୍ମଶାଳାରେ ହୋଇଛି ମାନସ ମନ୍ଥନ । ଏଥିରେ ଯୋଗ ଦେଇଛନ୍ତି 7 ଟି ଦେଶର ପ୍ରତିନିଧି । ହାତୀଙ୍କ ସୁରକ୍ଷା ପାଇଁ ପ୍ରଥମ ଥର ପାଇଁ ଚନ୍ଦକାର ଗୋଡିବାରିରେ ପ୍ରତିଷ୍ଠା ହେବ ସେଣ୍ଟର ଫର ସ୍ପେସିସ ସର୍ଭାଇଭାଲ ଏସିଆନ ଏଲିଫ୍ୟାଣ୍ଟ । ଏହି କର୍ମଶାଳାରେ ଯୋଗ ଦେଇ ମୁଖ୍ୟ ମନ୍ତ୍ରୀ କହିଛନ୍ତି ହାତୀ ସୁରକ୍ଷା ପାଇଁ ସରକାର ଆଣିବାକୁ ଯାଉଛନ୍ତି ହାତୀ ନୀତି । ଏଥିରେ ହାତୀ କିପରି ଜଙ୍ଗଲ ଛାଡି ଜନବସତି ମୁହାଁ ନ ହେବେ ସେ ନେଇ ଯୋଜନା କରାଯାଇଛି । ଜଙ୍ଗଲ ଭିତରେ ଜଳାଶୟରୁ ନେଇ ହାତୀଙ୍କ ପାଇଁ ଧାନ ଚାଷ କରିବାକୁ ପ୍ଲାନ ପ୍ରସ୍ତୁତ ହୋଇଛି ।

୨୦୨୪ ମସିହାରେ ହୋଇଥିବା ହାତୀ ଗଣନା ଅନୁସାରେ ରାଜ୍ୟରେ ଅଛନ୍ତି ୨୧୦୩ଟି ହାତୀ । ତେବେ ଜଙ୍ଗଲ ତୁଳନାରେ ଓଡ଼ିଶାରେ ଅଛନ୍ତି ପ୍ରାୟ ୪୦୦ରୁ ଅଧିକ ହାତୀ । ଯେଉଁଥିପାଇଁ ବାସସ୍ଥାନ ହେଉ ବା ଖାଦ୍ୟ ଅନ୍ୱେଷଣରେ ଜନବସତି ମୁଁହା ହେଉଛନ୍ତି ହାତୀ। କେନ୍ଦ୍ର ସରକାରଙ୍କ ତଥ୍ୟ କହୁଛି, ହାତୀ ମଣିଷ ଲଢେଇରେ ସମଗ୍ର ଦେଶରେ ଓଡ଼ିଶା ୧ ନଂ । ଗତ ୫ ବର୍ଷ ମଧ୍ୟରେ ହାତୀ ମଣିଷ ଲଢେଇରେ ୬୨୪ ଲୋକଙ୍କ ଜୀବନ ଯାଇଛି । ସେହିପରି ଶିକାର, ଟ୍ରେନ ଧକ୍କା ଓ ହରପିସ ଭଳି ରୋଗ ଯୋଗୁଁ ଗତ ୧୦ ବର୍ଷରେ ୭୭୯ଟି ହାତୀ ମୃତ୍ୟୁ ବରଣ କରିଛନ୍ତି । ଧିରେ ଧିରେ ନଷ୍ଟ ହେଉଛି ହାତୀ କରିଡର । ଲୋକେ ଜଙ୍ଗଲ କାଟିବାରୁ ହାତୀଙ୍କ ଯିବା ଆସିବା ରାସ୍ତା ବଦଳିଯାଉଛି । ବିଶେଷଜ୍ଞ ମତ, ଏହି ଧାରା ଜାରି ରହିଲେ ଆସନ୍ତା 10 ବର୍ଷରେ ରହିବ ନାହିଁ ହାତୀଙ୍କ ପାଇଁ ଉଦ୍ଦିଷ୍ଟ କରିଡର ।