ଭୁବନେଶ୍ଵର: 'ସୁଭଦ୍ରା' ରଚିବ ଇତିହାସ । ଆଜି ଅନ୍ତର୍ଜାତୀୟ ମହିଳା ଦିବସରେ କୋଟିଏ ୬୩ ହଜାରଙ୍କୁ ମିଳିବ ଦ୍ଵିତୀୟ କିସ୍ତି । ଗୋଟିଏ ଦିନରେ ୫ ହଜାର କୋଟି ପ୍ରଦାନ କରିବେ ସରକାର । ବ୍ରହ୍ମପୁର ଆମ୍ବପୁଆ ବିବେକ ବିହାର ପଡ଼ିଆରେ ଦ୍ଵିତୀୟ କିସ୍ତି ପ୍ରଦାନ କରିବେ ମୁଖ୍ୟମନ୍ତ୍ରୀ ମୋହନ ମାଝୀ । କାର୍ଯ୍ୟକ୍ରମରେ ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ବି ଉପସ୍ଥିତ ରହିବେ ।

୨୦୩୬ ସୁଦ୍ଧା ବିକଶିତ ଓଡ଼ିଶା ଗଠନ ସାଙ୍ଗକୁ ୨୦୪୭ ସୁଦ୍ଧା ବିକଶିତ ଭାରତ ନିର୍ମାଣ ପାଇଁ ରହିଛି ପ୍ରଧାନମନ୍ତ୍ରୀଙ୍କ ଲକ୍ଷ୍ୟ । ସୁଭଦ୍ରା ଯୋଜନା ମହିଳାଙ୍କ ଆତ୍ମବିଶ୍ଵାସ ବଢ଼ାଇବା ସହ ସେମାନଙ୍କୁ ପ୍ରୋତ୍ସାହିତ କରୁଛି । ଗତ ନିର୍ବାଚନରେ ବିଜେପି ପ୍ରଚାରର ବଡ଼ ଅସ୍ତ୍ର ଥିଲା 'ସୁଭଦ୍ରା' । ଯାହା ଏବେ ଏକ ବ୍ରାଣ୍ଡ ଭାବେ ଉଭା ହୋଇଛି ।
ଆଜି 'ସୁଭଦ୍ରା' ଦ୍ଵିତୀୟ କିସ୍ତି ମିଳିବାକୁ ଯାଉଥିବାରୁ ମହିଳାଙ୍କ ଭିତରେ ନାହିଁ ନଥିବା ଉତ୍ସାହ । 'ସୁଭଦ୍ରା' ଯୋଜନା ପାଇଁ ଘରେ ଘରେ 'ସୁଭଦ୍ରା' ଦୀପ ଜାଳି ମହିଳା ସଶକ୍ତିକରଣର ଏ ପର୍ବ ପାଳିବାକୁ ବିଜ୍ଞାପନ ମାଧ୍ୟମରେ ଆହ୍ବାନ ଦେଇଥିଲେ ସରକାର । ଏଥିପାଇଁ ସୁଭଦ୍ରା ହିତାଧିକାରୀମାନେ ଘରେ ଘରେ ଦୀପ ଜାଳିଛନ୍ତି । ବିଭିନ୍ନ ସ୍ଥାନରେ କରାଯାଇଛି ସୁଭଦ୍ରା ଶୋଭାଯାତ୍ରା ।

ଗାଁ ଠୁଁ ସହର ସବୁଆଡ଼େ ହଜାର ହଜାର ମହିଳା ଅତି ଆଗ୍ରହର ସହ ଦୀପ ଜାଳିଛନ୍ତି। ଘରେ ଘରେ, ବିଭିନ୍ନ ଦେବଦେବୀ ପୀଠରେ 'ସୁଭଦ୍ରା' ମାଆମାନେ ପ୍ରଦୀପ ଆଳତି କରିଛନ୍ତି । 'ସୁଭଦ୍ରା' ପାଇଁ ପୁରୀ ଜିଲ୍ଲା ପିପିଲି ମଉଜିବେଗ ଗାଁର ୪୦ରୁ ଅଧିକ ମହିଳା ଏକାଠି ହୋଇ ଦୀପ ଜାଳିଛନ୍ତି । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ଆହ୍ୱାନକ୍ରମେ ଉପକୃତ ହୋଇଥିବା ମହିଳାମାନେ ସମୂହ ଏକାଠି ହୋଇ ଗାଁ ମଝିରେ ଦୀପ ଜାଳି ଖୁସି ଜାହିର କରିଛନ୍ତି ।

'ସୁଭଦ୍ରା' ଯୋଜନା’ରେ ହିତାଧିକାରୀଙ୍କ ସଂଖ୍ୟା ସଫଳତାର ସହ ୧ କୋଟି ଛୁଇଁବା ଅବସରରେ ଓଡ଼ିଶାର କୋଣ ଅନୁକୋଣରେ ମାଆ ଭଉଣୀମାନେ ଘରେ ଘରେ ସୁଭଦ୍ରା ଦୀପ ଜାଳି ମହିଳା ସଶକ୍ତୀକରଣର ପର୍ବ ପାଳିଥିବାରୁ ସେମାନଙ୍କୁ ଶୁଭେଚ୍ଛା ଜଣାଇଛନ୍ତି କେନ୍ଦ୍ରମନ୍ତ୍ରୀ । ସୁଭଦ୍ରା ଯୋଜନାକୁ ନେଇ ମାତୃଶକ୍ତିଙ୍କ ମଧ୍ୟରେ ବହୁତ ଉତ୍ସାହ ଓ ଉଲ୍ଲାସ ଦେଖାଯାଇଛି । ମହାପ୍ରଭୁ ଏବଂ ମା’ ସୁଭଦ୍ରାଙ୍କ ଆଶୀର୍ବାଦ ସବୁବେଳେ ଓଡ଼ିଶାବାସୀଙ୍କ ସହ ରହିଥାଉ, ଏହା କାମନା ବୋଲି ଟ୍ଵିଟ୍ କରିଛନ୍ତି ଧର୍ମେନ୍ଦ୍ର ପ୍ରଧାନ । ସେପଟେ ମହିଳାଙ୍କୁ 'ସୁଭଦ୍ରା' ସ୍ଵାବଲମ୍ବୀ କରୁଛି ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV