'ମୋ ପୁଅକୁ ଭଲ କରିଦେ କାଳିଆ । ତୋ ଆଗରେ କାନି ପତାଇ ଭିକ୍ଷା ମାଗୁଛି । ତୁ ହିଁ ଏବେ ଶେଷ ଭରସା' । ଆଜି ସକାଳୁ ଏମିତି କିଛି ଶବ୍ଦ ଶୁଣିବାକୁ ମିଳିଥିଲା, ସଂହଦୁଆରେ । ଜଣେ ମହିଳା ଭୋରୁ ଭୋରୁ ସଂହଦୁଆରେ ପହଞ୍ଚି ଜଗନ୍ନାଥଙ୍କୁ ଭାବ ବିହ୍ୱଳ କଣ୍ଠରେ ଆକୁଳ ନିବେଦନ କରୁଛନ୍ତି, ତାଙ୍କ ପୁଅ ସୁସ୍ଥତା କାମନା କରୁଚନ୍ତି । ସିଂହଦୁଆରେ ସମ୍ପୂର୍ଣ୍ଣ ଦଣ୍ଡାୟମାନ ହୋଇ ଜଗନ୍ନାଥଙ୍କୁ ଡାକୁଛନ୍ତି । ଏହି ଦୃଶ୍ୟ ଦେଖି ସମସ୍ତେ ସେଠି ଭାବ ବିହ୍ୱଳ ହୋଇପଡ଼ିଥିଲେ । ସମସ୍ତେ ତାଙ୍କୁ ସେଇ ଗୋଟିଏ ଆଶ୍ୱାସନା ଦେଇଥିଲେ, ଜଗା ସବୁ ଠିକ୍‌ କରିଦେବ ।

କଥାରେ ଅଛି ଯେଉଁଠି ଡାକ୍ତରଙ୍କ ବିଜ୍ଞାନ ଫେଲ୍‌ ମାରିଯାଏ, ସେଇଠୁ ଆରମ୍ଭ ହୁଏ ଭାବ ଭକ୍ତିର ଠାକୁର ମହାପ୍ରଭୁ ଶ୍ରୀଜଗନ୍ନାଥଙ୍କ ଚମତ୍କାରିତା । ସେଇ ଚମତ୍କାରିତା ପାଇଁ ଆଜି ଜଗା ଦୁଆରେ ମାଆ କରୁଥିଲା ଆକୁଳ ନିବେଦନ । ଶ୍ରୀମନ୍ଦିର ସିଂହଦ୍ବାରରେ ପୁଅର ଆରୋଗ୍ୟ ଭିକ୍ଷା କରିଛି ମାଆ । ଅସୁସ୍ଥ ପୁଅକୁ ସିଂହଦ୍ଵାର ଆଗରେ ଶୁଆଇ କାନି ପତାଇ ମହାପ୍ରଭୁଙ୍କୁ ନିଜର ଦୁଃଖ ଜଣାଇଛି ।

ରବିବାର ଭୋରରୁ ସିଂହଦ୍ଵାର ଖୋଲିବା ବେଳେ ଏମିତି କିଛି ଦୃଶ୍ୟ ସମସ୍ତଙ୍କ ସାମ୍ନକୁ ଆସିଥିଲା । ଜଣେ ମହିଳା ଓ ଜଣେ ପୁରୁଷ ଏକ କୁନି ପୁଅକୁ ସାଙ୍ଗରେ ଆଣି ସିଂହ ଦୁଆରେ ଶୁଆଇଥିଲେ । ନିଜ ଛୁଆ ପାଇଁ କାଳିଆ ପାଖରେ କାନି ପତାଇ ଗୁହାରି କରୁଥିଲେ। ପାଖରେ ଥିବା ସମସ୍ତେ ଏହା ଦେଖି ଆଶ୍ଚର୍ଯ୍ୟ । ଶୀତୁଆ ସକାଳେ ଜଣେ ମାଆକୁ ତା' ପିଲା ସହ ଶ୍ରୀମନ୍ଦିର ବାହାରେ ଏତେ ଅସହାୟ ଦେଖି ସମସ୍ତଙ୍କ ଆଖିରେ ଲୁହ ।

ଗତକାଲି ମଧ୍ୟ ଏଭଳି ଏକ ଦୃଶ୍ୟ ଦେଖିବାକୁ ମିଳିଥିଲା । ରାଜସ୍ଥାନର ଜଣେ ବ୍ୟକ୍ତି ସିଂହଦୁଆରେ ତାଙ୍କ ଅସୁସ୍ଥ ପୁଅକୁ ରଖି କାଳିଆ ଆଗରେ ଭୋ ଭୋ ହୋଇ କାନ୍ଦିଥିଲେ । କାରଣ ତାଙ୍କ ପୁଅ ବର୍ଷେ ହେବ କୋମାରେ ପଡ଼ିଥିଲା । ଡାକ୍ତରଙ୍କ ଶତ ଚେଷ୍ଟା ସତ୍ତ୍ୱେ ଉଠୁନଥିଲା । ତେଣୁ କହିବାକୁ ଗଲେ ଡାକ୍ତରୀ ବିଜ୍ଞାନ ସେଇଠି ସମ୍ପୂର୍ଣ୍ଣ ଫେଲ ମାରିଥିଲା । ଆଉ ଶେଷରେ ତାଙ୍କ ପୁଅକୁ ଧରି ସେ ସୁଦୁର ରାଜସ୍ଥାନରୁ ପୁରୀ ଧାଇଁ ଆସିଥିଲେ । ସିଂହ ଦୁଆରେ ଆଣ୍ଠୁ ମାଡ଼ି କାଳିଆ ଆଗରେ ଭୋ ଭୋ ହୋଇ କାନ୍ଦିଥିଲେ । ତାଙ୍କ ପୁଅକୁ ଭଲ କରିଦେବା ପାଇଁ କାଳିଆ ଆଗରେ ହାତ ପତାଇଥିଲେ । ଏହାର ଭିଡିଓ ମଧ୍ୟ ସୋସିଆଲ ମିଡିଆରେ ଖୁବ୍‌ ଭାଇରାଲ ହୋଇଥିଲା । ଏହି ଘଟଣାଥିଲା ୮ ନଭେମ୍ବର ୨୦୨୫ ।

ଏହି ଘଟଣା ପରେ ନଭେମ୍ବର ୨୨ ତାରିଖରେ ସେହି ରାଜସ୍ଥାନର ବ୍ୟକ୍ତି ପୁଣି ବଡ଼ ଦାଣ୍ଡରେ ନଜର ଆସିଥିଲେ । ଆଉ ଜଗାକୁ କୃତଜ୍ଞତା ଜଣାଇଥିଲେ । ଏଥର ସେ ହସି ହସି ଜଗାଗୁ ସବୁ ଶ୍ରେୟ ଦେଇଥିଲେ । କାରଣ ବର୍ଷେ ହେବ ଶୋଇଥିବା ତାଙ୍କ ପୁଅ କୋମାରେ ଶୋଇଥିଲା । କିନ୍ତୁ ଜଗା ପାଖରେ ଗୁହାରି କରିବାର ମାତ୍ର କେଇ ଦିନ ଭିତରେ ପୁଅ କୋମାରୁ ଫେରିଲା । ଏଥିପାଇଁ ସେ ଜଗାକୁ ସବୁ ଶ୍ରେୟ ଦେଇଛନ୍ତି । ଆଉ ମହାପ୍ରଭୁ ଶ୍ରୀଜଗନ୍ନାଥ ହିଁ ଜୀଅନ୍ତା ଠାକୁର । ସେ ସମସ୍ତଙ୍କ ଦୁଃଖ ବୁଝନ୍ତି ।