ଝାରସୁଗୁଡ଼ା: ବହୁଚର୍ଚ୍ଚିତ ନବ ଦାସ ହତ୍ୟା ମାମଲାରେ କ୍ରାଇମବ୍ରାଞ୍ଚ କରୁଛି ସାନି ତଦନ୍ତ । ଗତକାଲି ନବଙ୍କ ପତ୍ନୀ ମିନତୀଙ୍କ ସହ ପୁଅ ବିଶାଳ ଓ ଝିଅ ଦିପାଳୀଙ୍କୁ କ୍ରାଇମବ୍ରାଞ୍ଚ ଜେରା କରିଥିଲା । ସାନି ତଦନ୍ତର ଦ୍ଵିତୀୟ ଦିନରେ ଆଜି କ୍ରାଇମବ୍ରାଞ୍ଚ ଝାରସୁଗୁଡ଼ାର ବିଭିନ୍ନ ସ୍ଥାନର ଖୋଳତାଡ଼ କରୁଛି ।

ନବ ଦାସଙ୍କ ବାସଭବନରେ ଖୋଳତାଡ଼ କରୁଛି କ୍ରାଇମବ୍ରାଞ୍ଚ । ନବଙ୍କ ଘର ସହ ଝାରସୁଗୁଡ଼ା ବିମାନବନ୍ଦର, ଝାରସୁଗୁଡ଼ା ଜିଲ୍ଲା ହସ୍ପିଟାଲ୍‌ରେ ମଧ୍ୟ କ୍ରାଇମବ୍ରାଞ୍ଚ ଟିମ୍ ଛାନଭିନ୍ କରିଛି । ମଙ୍ଗଳବାର ନବଙ୍କ ପତ୍ନୀ, ପୁଅ ଓ ଝିଅଙ୍କୁ କ୍ରାଇମବ୍ରାଞ୍ଚର ୨ ଜଣିଆ ଟିମ୍ ୭ ଘଣ୍ଟା ଧରି ପଚରାଉଚରା କରି ବୟାନ ରେକର୍ଡ କରିଥିଲା ।

ତଦନ୍ତ ଦାୟିତ୍ଵରେ ଥିବା କ୍ରାଇମବ୍ରାଞ୍ଚର ଅତିରିକ୍ତ ଏସ୍‌ପି ବିଜୟ ମଲ୍ଲିକ କହିଛନ୍ତି, ତଦନ୍ତ ବେଳେ ଯିଏ ପରିସରକୁ ଆସିବେ ସମସ୍ତଙ୍କୁ ପଚରାଉଚରା କରାଯିବ । ୨୦୨୩ ଜାନୁଆରୀ ୨୯ରେ ବ୍ରଜରାଜନଗରର ଗାନ୍ଧୀ ଛକରେ ଦିନ ପ୍ରାୟ ୧୨ଟା ସମୟରେ ଗୁଳିମାଡ଼ କରିଥିଲେ ପୋଲିସ ଏଏସ୍ଆଇ ଗୋପାଳ ଦାସ ।

ଗୁଳିମାଡ଼ ପରେ ନବଙ୍କୁ ତୁରନ୍ତ ଝାରସୁଗୁଡ଼ା ଜିଲ୍ଲା ହସ୍ପିଟାଲ୍ ନିଆଯାଇଥିଲା । ସେଠାରେ ଇସିଜି କରାଯିବା ପରେ ଏୟାର ଆମ୍ବୁଲାନ୍ସ ଯୋଗେ ଝାରସୁଗୁଡ଼ାରୁ ଅଣା ଯାଇଥିଲା ଭୁବନେଶ୍ଵର ଆପୋଲୋ ହସ୍ପିଟାଲ୍ । ଆଉ ଆପୋଲୋରେ ନବଙ୍କ ଅସ୍ତ୍ରୋପଚାର କିଛି ସମୟ ପରେ ଡାକ୍ତର ମୃତ ଘୋଷଣା କରିଥିଲେ ।

ନବଙ୍କୁ ଗୁଳିମାଡ଼ରୁ ନେଇ ଆପୋଲୋ ହସ୍ପିଟାଲ୍ ଅଣାଯିବା ପର୍ଯ୍ୟନ୍ତ କଣ କଣ ଘଟିଥିଲା ? କେଉଁ ଡାକ୍ତର କଣ ଚିକିତ୍ସା କରିଥିଲେ ? ଏବେ ଏସବୁର ପୁଙ୍ଖାନୁପୁଙ୍ଖ ତଦନ୍ତ କରିବ କ୍ରାଇମବ୍ରାଞ୍ଚ । ଗୁଳିମାଡ଼ ଦିନ ନବ ପିନ୍ଧିଥିବା ସାର୍ଟ କୁଆଡ଼େ ଗଲା ? କୋଭିଡ୍ ନାଁରେ ସାର୍ଟ ପୋଡ଼ି ଦିଆ ଯାଇଛି କି ? ଏ ସବୁ ଦିଗରେ ବି କ୍ରାଇମବ୍ରାଞ୍ଚ ଛାନଭିନ୍ କରିବ ବୋଲି ଜଣାପଡ଼ିଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more