କଳାହାଣ୍ଡି ଜିଲ୍ଲାର ସର୍ବ ପୁରାତନ ସ୍କୁଲ ମଧ୍ୟରେ ନାନ୍ଦୋଳ ଉଚ୍ଚ ପ୍ରାଥମିକ ବିଦ୍ୟାଳୟ ଅନ୍ୟତମ ଅଟେ । ହେଲେ ଏହି ପୁରାତନ ବିଦ୍ୟାଳୟକୁ ଶିକ୍ଷା ବିଭାଗ ଅଣଦେଖା କରୁଛି । ଯାହା ଫଳରେ ଅବ୍ୟବସ୍ଥା ଘେରରେ ଚାଲିଛି ଏହି ବିଦ୍ୟାଳୟ । ଶ୍ରେଣୀ ଗୃହ ମାନଙ୍କରେ ଲହଡି ମାରୁଛି ବର୍ଷା ଜଳ। କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକ ଅନ୍ତର୍ଗତ ନାନ୍ଦୋଳ ଉଚ୍ଚ ପ୍ରାଥମିକ ବିଦ୍ୟାଳୟ ୧୯୦୪ ମସିହାରେ ନିର୍ମାଣ ହୋଇଥିଲା । ବର୍ତ୍ତମାନ ବିଦ୍ୟାଳୟ ୧୨୧ ବର୍ଷରେ ପଦାର୍ପଣ କରିଛି । ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୯୭ ଜଣ ଛାତ୍ରଛାତ୍ରୀ ଥିବା ବେଳେ ୫ଜଣ ଶିକ୍ଷକ ଶିକ୍ଷୟିତ୍ରୀ ଅଛନ୍ତି।ସ୍କୁଲରେ ଶ୍ରେଣୀ ଗୃହ ଅଭାବ ଥିବା ଯୋଗୁଁ ଗୋଟିଏ କୋଠରିରେ ଦୁଇଟି ଲେଖାଏଁ ଶ୍ରେଣୀର ଛାତ୍ରଛାତ୍ରୀ ପାଠ ପଢୁଛନ୍ତି ।

ବର୍ତ୍ତମାନ ଶ୍ରେଣୀ ଗୃହ ମାନଙ୍କରେ କେଉଁଠି ଛାତ ପଡୁଛି ତ କେଉଁଠି ଲୁହା ଛଡ଼ ଦେଖା ଗଲାଣି । କେତେବେଳେ କାହା ଉପରେ ପଡିବ ତାହା ଭଗବାନଙ୍କୁ ହିଁ ଜଣା । ବର୍ତ୍ତମାନ ଲଘୁଚାପଜନିତ ବର୍ଷା ଯୋଗୁଁ ସ୍କୁଲ ପରିସର ବେହାଲ ଅବସ୍ଥାରେ ଅଛି। ଗୋଟିଏ ପଟେ ଛାତରୁ ପାଣି ଗଳୁଥିବା ବେଳେ ଅନ୍ୟପଟେ ଶ୍ରେଣୀ ଗୃହ ଓ ଅଫିସ କାର୍ଯ୍ୟାଳୟ ରାସ୍ତାରେ ପାଣି ପଶି ଯାଇଛି। ଫଳରେ ଛାତ୍ରଛାତ୍ରୀ ଓ ଶିକ୍ଷକ ଶିକ୍ଷୟିତ୍ରୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ନାନ୍ଦୋଳ ଉଚ୍ଚ ପ୍ରାଥମିକ ବିଦ୍ୟାଳୟର ୧୨୧ ବର୍ଷ ପୂରଣ କରିଛି । ଏହି ବିଦ୍ୟାଳୟ କେତେ ଯେ ମଣିଷ ତିଆରି କରିଛି । କିଏ ଅଧିକାରୀ, କିଏ କର୍ମଚାରୀ ତ ଆଉ କିଏ ରାଜନେତା ହୋଇ ସୁନାମ ଅର୍ଜନ କରିଛନ୍ତି । ହେଲେ ଯାହାଙ୍କ ପାଇଁ ଏହା ସମ୍ଭବ ହେଲା ସେହି ପୁରୁଣା ବିଦ୍ୟାଳୟ ଏବେ ନିଜ ପରିଚୟ ଖୋଜୁଛି । ଶିକ୍ଷା ବିଭାଗ ମଧ୍ୟ ସବୁ ଜାଣି ଚୁପ ପଡିବା ନେଇ ସାଧାରଣରେ ଉଦବେଗ ବିଷୟ ହୋଇଛି । ତୁରନ୍ତ ରାଜ୍ୟ ସରକାର ଏହି ପୁରାତନ ବିଦ୍ୟାଳୟର ପୁନରୁଦ୍ଧାର କରିବାକୁ ସାଧାରଣରେ ଦାବି ହୋଇଛି।