ଖୋଲୁଛି ଗାନ୍ଧି ପରିବାରର ବିକାଶ ମଡେଲ ବନାମ ଦୁର୍ନୀତିର ପୋଲ୍ । ନ୍ୟାସନାଲ ହେରାଲ୍ଡ ମନି ଲଣ୍ଡ୍ରିଂ ମାମଲାରେ କୋର୍ଟରେ ଇଡିର ଚାର୍ଜସିଟ୍ ଦାଖଲ । ED ଚାର୍ଜସିଟରେ ରାହୁଲ, ସୋନିଆଙ୍କ ସମେତ ଅନ୍ୟ ଦୁଇ କଂଗ୍ରେସ ନେତାଙ୍କ ନାଁ । ଜାମିନରେ ନେତା, ଇଡି ଚାର୍ଜସିଟ ବିରୋଧରେ ଦେଶବ୍ୟାପୀ କଂଗ୍ରେସର ଧାରଣା । ବିଜେପି କହିଲା, ଚକ୍ରାନ୍ତ କରି ଦେଶର ସମ୍ପତ୍ତି ହଡ଼ପ କରିବା କୌଣସି ରାଜନୈତିକ ଦଳର ଅଧିକାର ନୁହେଁ ।

ପୂରା ମାମଲାରେ ଗାନ୍ଧି ପରିବାରର ସଂପୃକ୍ତିର ପ୍ରମାଣ ସହ ନ୍ୟାସନାଲ ହେରାଲ୍ଡ ମାମଲାରେ ଦୁର୍ନୀତିର ଲମ୍ବା ଚିଠା ଦେଶବାସୀଙ୍କୁ ଦେଖାଇଛନ୍ତି ବିଜେପି ସାଂସଦ ରବି ଶଙ୍କର ପ୍ରସାଦ । ୧୯୩୭ରେ ୫ ହଜାର ସେୟାର ହୋଲ୍ଡରଙ୍କ ଦ୍ବାରା ଆରମ୍ଭ ହୋଇଥିବା ନ୍ୟାସନାଲ ହେରାଲ୍ଡ ଖବରକାଗଜ ପବ୍ଲିସର ଆସୋସିଏଟେଡ ଜର୍ଣ୍ଣାଲ୍ସ ଲିମିଟେଡକୁ ୨୦୦୮ରେ କିଏ ୯୦ କୋଟି ଋଣ ଯୋଗାଇ ଦେଇଥିଲା । ପରେ ଗାନ୍ଧି ପରିବାର ୟଙ୍ଗ୍ ଇଣ୍ଡିଆ କରି ୯୦ କୋଟି ମୂଲ୍ୟର ସମ୍ପତ୍ତିକୁ ମାତ୍ର ୫୦ ଲକ୍ଷ ଟଙ୍କାରେ ହାତେଇ ନେବା ଗାନ୍ଧି ପରିବାରର ବିକାଶ ମଡେଲ କି ବୋଲି ପ୍ରଶ୍ନ କରିଛନ୍ତି ସାଂସଦ । ଚକ୍ରାନ୍ତ କରି ଦେଶର ସମ୍ପତ୍ତି ହଡ଼ପ କରିବା କୌଣସି ରାଜନୈତିକ ଦଳର ଅଧିକାର ନୁହେଁ ବୋଲି କହି କଂଗ୍ରେସକୁ ଦୃଢ଼ ଜବାବ ଦେଇଛନ୍ତି ରବି ଶଙ୍କର ।

ସେପଟେ ଇଡି ଚାର୍ଜସିଟ ବିରୋଧରେ ଦେଶବ୍ୟାପୀ ଧାରଣା ଦେବା ସହ ସୋନିଆ ଓ ରାହୁଲଙ୍କୁ ନିର୍ଦ୍ଦୋଶ ବୋଲି କହିଛନ୍ତି କଂଗ୍ରେସ ନେତା ଓ କର୍ମୀ । ସୋନିଆ-ରାହୁଲଙ୍କ ନାଁରେ ଇଡି ଚାର୍ଜସିଟକୁ କେନ୍ଦ୍ର ସରକାରଙ୍କ ପ୍ରାୟୋଜିତ ଷଡ଼ଯନ୍ତ୍ର କହିଛନ୍ତି ବରିଷ୍ଠ କଂଗ୍ରେସ ନେତା ଜୟରାମ ରମେଶ ।

ନ୍ୟାସନାଲ ହେରାଲ୍ଡ ମାମଲାରେ ତିନି ଦିନ ପୂର୍ବରୁ ଦିଲ୍ଲୀ, ମୁମ୍ବାଇ, ଲକ୍ଷ୍ନୌରେ ରେଡ କରିଥିଲା ଇଡି । ଆସୋସିଏଟେଡ୍ ଜର୍ଣ୍ଣାଲ୍ସ ଲିମିଟେଡର ଆସୋସିଏଟେଡ କମ୍ପାନୀ ୟଙ୍ଗ ଇଣ୍ଡିଆ ପ୍ରାଇଭେଟ୍ ଲିମିଟେଡ୍‌ର ମାଲିକାନାରେ ଥିବା ୬୬୧ କୋଟି ମୂଲ୍ୟର ସମ୍ପତ୍ତି ଆଟାଚ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ନ୍ୟାସନାଲ ହେରାଲ୍ଡ ମାମଲା ରାଜନୈତିକ ନୁହେଁ ବରଂ ଦୁର୍ନୀତି ମାମଲା । ଉଭୟ ରାହୁଲ ଗାନ୍ଧି ଓ ସୋନିଆ ଗାନ୍ଧି ମାମଲାରେ ଜାମିନରେ ଅଛନ୍ତି, ଇଡି ତଦନ୍ତରୁ ଗାନ୍ଧି ପରିବାରର ମୁଖା ଖୋଲିଥିବା କହି କଂଗ୍ରେସକୁ ଟାର୍ଗେଟ୍ କରିଛନ୍ତି କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ ।

ଭବନେଶ୍ବରରେ ଇଡି ଅଫିସ ଘେରାଉ କରିଥିବା କଂଗ୍ରେସକୁ ଜୋରଦାର ଆଟାକ କରିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ । ବ୍ୟକ୍ତିଗତ ସ୍ୱାର୍ଥ ହାସଲ ପାଇଁ କଂଗ୍ରେସ ନିର୍ଲଜ କାମ କରୁଛି । ସରକାରୀ ସମ୍ପତ୍ତି ଓ ଅର୍ଥକୁ କଂଗ୍ରେସ ଦଳ ATM ବନାଇଥିଲା । ୫ ହଜାର କୋଟି ସମ୍ପତ୍ତି ହାତେଇବା ପାଇଁ ଅପଚେଷ୍ଟା କରି ଧରା ପଡିଛନ୍ତି କହି ଦୃଢ଼ ନିନ୍ଦା କରିଛନ୍ତି ମନମୋହନ ।

କଂଗ୍ରେସ ନେତ୍ରୀ ସୋନିଆ ଗାନ୍ଧି ଓ ବିରୋଧୀ ଦଳ ନେତା ରାହୁଲ ଗାନ୍ଧିଙ୍କ ସମେତ ଇଡି ଚାର୍ଜସିଟରେ କଂଗ୍ରେସ ନେତା ସାମ ପିଟ୍ରୋଡା ଓ ସୁମନ ଦୁବେଙ୍କ ନାଁ ରହିଛି । ୨୦୧୦ରେ କମ୍ପାନୀ ବିରୋଧରେ ମାମଲା ରୁଜୁ କରିଥିଲେ ବିଜେପି ନେତା ସୁବ୍ରମଣ୍ୟମ ସ୍ବାମୀ । ଅଧିଗ୍ରହଣ ଜରିଆରେ ୨ ହଜାର କୋଟି ମୂଲ୍ୟର ସମ୍ପତ୍ତିକୁ ଗାନ୍ଧି ପରିବାର ମାତ୍ର ୫୦ ଲକ୍ଷ ଟଙ୍କାରେ ହଡ଼ପ କରିଥିବା ସେ ଅଭିଯୋଗ କରିଥିଲେ । ୨୦୧୪ରେ ମାମଲାର ତଦନ୍ତ ଆରମ୍ଭ କରିଥିଲା ଇଡି । ଆସନ୍ତା ୨୫ରେ ମାମଲାର ଶୁଣାଣି ହେବାକୁ ଯାଉଛି ।