ଘରକୁ ଛୁଟି କଟାଇବାକୁ ଆସିଥିଲେ, 4ଦିନ ହେଲାଣି ପତ୍ତା ମିଳୁନି
Key Points
4ଦିନ ହେଲା ନୌସେନା ଅଫିସର୍ ନିଖୋଜ । ଘରକୁ ଛୁଟି କଟାଇବାକୁ ଆସିଥିଲେ । 4 ଦିନ ହେଲାଣି କୌଣସି ପତ୍ତାମିଳୁନି
ବ୍ରହ୍ମପୁର: 4ଦିନ ହେଲା ନୌସେନା ଅଫିସର୍ ନିଖୋଜ । ଛୁଟି ନେଇ ଘରକୁ ବୁଲିବାକୁ ଆସିଥିଲେ । ହେଲେ କାର୍ଯ୍ୟରେ ଯୋଗ ଦେବା ପାଇଁ ଘରୁ ବାହାରିପଡିଥିବାବେଳେ ନା ସେ କାର୍ଯ୍ୟରେ ଯୋଗ ଦେଇଛନ୍ତି । ନା ତାଙ୍କ ଫୋନ ଲାଗୁଛି । 4 ଦିନ ହେଲାଣି କୌଣସି ପତ୍ତାମିଳୁନି ।
ସୂଚନାନୁଯାୟୀ, କେରଳର କୋଚି ଆଇଏନ୍ଏସ୍ ଗରୁଡ଼ାରେ କାର୍ଯ୍ୟରେ ଯୋଗ ଦେବାକୁ ଯାଉଥିଲେ ନୌସେନା ଆକ୍ଟିଲିଡିଂ କମ୍ୟୁନିକେଟର (ଏଜି.ଏଲ୍.କମ୍.) ସୌରଭ କୁମାର ପାତ୍ର । ବୟସ ମାତ୍ର ୨୫ ବର୍ଷ । ଗତ ୧୯ ତାରିଖରୁ ସେ ଟ୍ରେନ୍ରେ ଯାଇଥିବାବେଳେ ଏବେ ସେ ନିଖୋଜ ଅଛନ୍ତି । ଆଇଏନ୍ଏସ୍ ଗରୁଡ଼ାରେ ପହଞ୍ଚିନାହାନ୍ତି କି ତାଙ୍କର କୌଣସି ସନ୍ଧାନ ନାହିଁ । ଫୋନ୍ ବି ସୁଇଚ୍ ଅଫ୍ ରହିଛି । ତେଣୁ ତାଙ୍କୁ କେହି ଅପହରଣ କରିଥିବା ସନ୍ଦେହ କରି ବ୍ରହ୍ମପୁର ଟାଉନ୍ ଥାନାରେ ଏତଲା ଦେଇଛନ୍ତି ତାଙ୍କ ମାଆ ନିତୁ ପାତ୍ର । ପୁଲିସ ମିସିଂ ରିପୋର୍ଟ କରି ତଦନ୍ତ ଆରମ୍ଭ କରିଛି ।
ସୌରଭଙ୍କ ଶେଷ ମୋବାଇଲ୍ ଲୋକେସନ୍ ଇଚ୍ଛାପୂରମ୍ ଥିବା ପରିବାର ଲୋକ କହିଛନ୍ତି । ପୁଅକୁ ଖୋଜି ଆଣିବାକୁ ସେ ପୁଲିସ ଓ ନୌସେନାରେ ନିବେଦନ କରିଛନ୍ତି । ବ୍ରହ୍ମପୁର ଗେଟ୍ବଜାରରେ ସୌରଭଙ୍କ ଘର ।
📱 Get Argus News App
✨ତାଙ୍କ ଭାଇ ସମୀରଙ୍କ ସୂଚନାନୁସାରେ, ୨୦୧୯ ରୁ ସେ ନୌସେନାରେ ନିଯୁକ୍ତି ପାଇଥିଲେ । କେରଳର କୋଚି ଆଇଏନ୍ଏସ୍ ଗରୁଡ଼ାରେ ତାଙ୍କର ନିଯୁକ୍ତି ଥିଲା । ୨୦୨୪ ଡିସେମ୍ବର ୨୮ରେ ସେ ଘରକୁ ଛୁଟିରେ ଆସିଥିଲେ । ଜାନୁଆରୀ ୧୯ ତାରିଖରେ ତାଙ୍କର କୋଚି ଫେରିବାର ଥିଲା । ବ୍ରହ୍ମପୁରରୁ ଟ୍ରେନ୍ ଯୋଗେ ବିଶାଖାପାଟଣା ଯାଇ ସେଠାରୁ କୋଚିକୁ ଫ୍ଲାଇଟ୍ ଟିକଟ ହୋଇଥିଲା । ଭୋର ୩ଟା ଜାନୁଆରୀ ୧୯ରେ ବ୍ରହ୍ମପୁର ରେଳ ଷ୍ଟେସନ୍ରେ ସୌରଭଙ୍କୁ ଟ୍ରେନ୍ରେ ବସାଇଥିଲେ ପରିବାର ଲୋକ । ଅପରାହ୍ନରେ ତାଙ୍କର ଫ୍ଲାଇଟ୍ ଥିଲା । ବ୍ରହ୍ମପୁରରୁ ଯିବା ପରେ ତାଙ୍କ ମୋବାଇଲ୍ ଫୋନ୍ ସୁଇଚ୍ ଅଫ୍ ହୋଇଯାଇଥିଲା।
ପରିବାର ଲୋକ ବାରମ୍ବାର ତାଙ୍କୁ ଯୋଗାଯୋଗ କରିବାକୁ ଚେଷ୍ଟା କରିଥିଲେ କିନ୍ତୁ ଫୋନ୍ ସୁଇଚ୍ ଅଫ୍ ଥିଲା । ପରିବାର ଲୋକ ଖୋଜାଖୋଜି କରିବା ପରେ ବିଶାଖାପାଟଣା ଏୟାର ପୋର୍ଟରେ ସୌରଭଙ୍କ ଅନୁସନ୍ଧାନ କରିଥିଲେ । କିନ୍ତୁ ସେ ସେଠାରେ ଚେକ୍ଇନ୍ କରିନଥିବା ଜଣାପଡିଥିଲା । ତେଣୁ ତାଙ୍କ ମାଆ ନିତୁ ପାତ୍ର ଟାଉନ୍ ଥାନାରେ ଅଭିଯୋଗ କରିଛନ୍ତି ।
କୋଚି ଆଇଏନ୍ଏସ୍ ଗରୁଡ଼ା ଅଧିକାରୀଙ୍କ ସହ କଥା ହୋଇଥିଲେ ପରିବାର ଲୋକ । ସୌରଭ ସେଠାରେ ବି କାର୍ଯ୍ୟରେ ଯୋଗ ଦେଇନଥିବା ଅଧିକାରୀ ଫୋନ୍ରେ କହିଥିବା ଜଣାପଡିଛି । ପୁଲିସ ସୌରଭଙ୍କ ମୋବାଇଲ୍ ଲୋକେସନ୍ ଯାଞ୍ଚ କରିଥିଲା । ଇଚ୍ଛାପୁରମ୍ ତାଙ୍କର ଶେଷ ମୋବାଇଲ୍ ଲୋକେସନ୍ ଥିବା ଜଣାପଡିଛି ।