ମହାନଦୀ ମହାବିବାଦ ସମାଧାନ ପାଇଁ ବିଜେପି ସରକାରଙ୍କ ବଡ ପଦକ୍ଷେପ । ଆପୋଷ ଆଲୋଚନା ଲାଗି ସହମତ ଛତିଶଗଡ ସରକାର । ଟ୍ରିପଲ୍ ଇଞ୍ଜିନ ସରକାରରେ ବାହାରିବ ରାସ୍ତା । ଓଡିଶା ଗସ୍ତରେ ଆସି ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଭେଟି ଆଲୋଚନା କରିଛନ୍ତି ଛତିଶଗଡ ସିଏମ୍ ବିଷ୍ଣୁଦେବ ସାଏ । ବିଶ୍ଵ ଜଳ ଦିବସ କାର୍ଯ୍ୟକ୍ରମରେ ଓଡିଶା ବାସୀଙ୍କୁ ଏହି ଖୁସି ଖବର ଦେଇଛନ୍ତି ମୋହନ । ମୁଖ୍ୟମନ୍ତ୍ରୀ କହିଥିଲେ, କେନ୍ଦ୍ର, ଛତିଶଗଡ ଏବଂ ଓଡିଶାରରେ ଟ୍ରିପଲ ଇଞ୍ଜିନ ସରକାର ଚାଲିଛି । ତେଣୁ ଆପୋଷ ଆଲୋଚନା ମାଧ୍ୟମରେ ବିବାଦର ସମାଧାନ ହେବ । ଦୁଇ ରାଜ୍ୟ ପରସ୍ପରର ପଡ଼ୋଶୀ । ଉଭୟ ରାଜ୍ୟ ମଧ୍ୟରେ ଭାଷା ଓ ଭାବଗତ ସାମଞ୍ଜସ୍ୟ ମଧ୍ୟ ରହିଛି । ତେଣୁ ଦୁଇ ରାଜ୍ୟର ଜନସାଧାରଣଙ୍କ ହିତ ଦୃଷ୍ଟିରୁ ବିବାଦ ତୁରନ୍ତ ସମାଧାନ ହେବା ଆବଶ୍ୟକ ବୋଲି କହିଥିଲେ ମୋହନ ।

ଖରାଦିନେ ଛତିଶଗଡ଼ରୁ ଅଧିକ ପାଣି ଆସୁ ଓଡ଼ିଶାର ଦାବି । କିନ୍ତୁ ଛତିଶଗଡ ସରକାର ସହ ଆଲୋଚନା କଲାନି ପୂର୍ବ ବିଜେଡି ସରକାର । ଟ୍ରିବ୍ୟୁନାଲ କିମ୍ବା ସେଣ୍ଟ୍ରାଲ ଓ୍ବାଟର କମିଶନ ପାଖରେ ସଠିକ ତଥ୍ୟ ରଖିଲେ ନାହିଁ । ଟ୍ରିବ୍ୟୁନାଲ, କୋର୍ଟ, କଚେରୀରେ ଲମ୍ବା ଚାଲିଲା ମାମଲା । ଜଳ ବିବାଦ ସମାଧାନ ପାଇଁ ସହାୟତାର ହାତ ବଢାଇଥିବା କେନ୍ଦ୍ର ସରକାରଙ୍କୁ ସହଯୋଗ କଲାନି ପୂର୍ବ ସରକାର । ୨୦୧୬ରେ ତତ୍କାଳୀନ ଛତିଶଗଡ ସିଏମ୍ ରମଣ ସିଂ, କେନ୍ଦ୍ର ମନ୍ତ୍ରୀ ନୀତିନ ଗଡକରୀଙ୍କ ସହ ଆଲୋଚନା ପାଇଁ ବସି ଅଧାରୁ ପଳାଇ ଆସିଲେ ନବୀନ । ଟ୍ରିବ୍ୟୁନାଲ ପାଇଁ ଧରିଥିଲେ ଜିଦ୍ । ଯେତେବେଳେ ଛତିଶଗଡ଼ ବ୍ୟାରେଜ୍ ନିର୍ମାଣ କଲା ନାହିରେ ତେଲ ଦେଇ ଶୋଇଥିଲେ ପୂର୍ବ ସରକାର । ସମାଧାନ ନକରି ଦୌଡି ପଳାଇଲେ । ମହାନଦୀ ବଞ୍ଚାଅ ଆନ୍ଦୋଳନ କଲେ । ମହାନଦୀକୁ ମାଆ କହି ସାବତ ମାଆ ସଜାଇ ଦେଲେ ପୂର୍ବ ନବୀନ ସରକାର ।

ଅନ୍ୟପଟେ ଜଳ ବିବାଦ ସମାଧନ ପାଇଁ ମୋହନ ଓ ବିଷ୍ଣୁଦେବଙ୍କ ଆଲୋଚନାକୁ ନେଇ ତେଜିଛି ରାଜନୀତି । କେନ୍ଦ୍ର ଓ ଛତିଶଗଡ ମୁଣ୍ଡରେ ଅଠା ବୋଳି ନିଜ ଭୁଲ ଉପରେ ପରଦା ପକାଇବାକୁ ଉଦ୍ୟମ କରିଛି ବିଜେଡି । କଂଗ୍ରେସ କହିଛି, ଆପୋଷ ଆଲୋଚନା ଫଳପ୍ରଦ ହେଲା ଭଳି ଲାଗୁନି । ତେବେ ବିରୋଧୀଙ୍କୁ କଡା ଜବାବ ଦେଇଛନ୍ତି ଆଇନ ମନ୍ତ୍ରୀ । କହିଛନ୍ତି, ଜଳ ବିବାଦ ପ୍ରସଙ୍ଗରେ ନିଜ ଫାଇଦା ପାଇଁ ରାଜନୈତିକ ରୁଟି ସେକିବାରୁ ଚେଷ୍ଟା କରିଥିଲା ବିଜେଡି ।

ବର୍ଷା ଋତୁକୁ ଛାଡିଦେଲେ ଓଡିଶାରେ ବର୍ଷ ତମାମ ଶୁଖିଲା ପଡୁଛି ମହାନଦୀ । ଯେଉଁଥିପାଇଁ ପୂର୍ବ ସରକାର ନା ଆଲୋଚନାରେ ସମାଧାନ କଲେ, ନା ନଦୀ ତଳ ମୁଣ୍ଡରେ ଜଳ ଭଣ୍ଡାର କଲେ । କେତେବେଳେ ମହାନଦୀ ବଞ୍ଚାଅ ଅନ୍ଦୋଳନ ତ ପୁଣି କେତେବେଳେ ସବୁଜ ମହାନଦୀ ନାଁରେ ବଡ ପ୍ରଚାର କରିଥିଲା ବିଜେଡି । ଏପରିକି ପ୍ରଥମେ ୭ଟି ବ୍ୟାରେଜ କରିବେ ବୋଲି କହି ପରେ ଫାଙ୍କି ଦେଲେ । ହେଲେ ଏବେ ଟ୍ରିପଲ୍ ଇଞ୍ଜିନ ସରକାରରେ ବିବାଦ ସମାଧାନର ରାସ୍ତା ବାହାରିବ ବୋଲି ସଞ୍ଚାର ହୋଇଛି ନୂଆ ଆଶା ।