ନବୀନଙ୍କୁ ସିଧାସଳଖ ନିଶାନା ସାଧି ବର୍ଷିଲେ ବରିଷ୍ଠ ନେତା
Key Points
- ବିଜୟର ଶ୍ରେୟ ନେଉଥିଲ ତ ପରାଜୟର ବି ଦାୟୀତ୍ବ ନିଅ
- ନବୀନଙ୍କୁ ସିଧାସଳଖ ନିଶାନା ସାଧି ବର୍ଷିଲେ ବରିଷ୍ଠ ନେତା
- ବିଜେଡିର ବର୍ତ୍ତମାନ ପରିସ୍ଥିତି ନେଇ ସୁପ୍ରିମୋଙ୍କୁ ମାଗିଲେ ଜବାବ୍
- ସମୀକ୍ଷା କରି ଦଳକୁ ଠିକଣା ବାଟରେ ଚଳାଇବାକୁ ଦେଲେ ପରାମର୍ଶ
ଅର୍ଗସ ବ୍ୟୁରୋ: ନବୀନଙ୍କୁ ବାଛିଲେ ନେତା । ମାତ୍ର ନବୀନ ବାଛିଲେ ବବି-ପାଣ୍ଡିଆନ୍ ଙ୍କୁ । ବନାଇ ଦେଲେ ବିଜେଡିର ସର୍ବେସର୍ବା । ନିର୍ବାଚନ ପରିଚାଳନାର ଦାୟୀତ୍ବ ନେଇ ନବୀନଙ୍କ ନାଁରେ ମନମାନି ଚଳାଇଲେ ବବି-ପାଣ୍ଡିଆନ୍ । ନେତାଙ୍କୁ କହିବାକୁ କି ଶୁଣିବାକୁ ଦେଲେନି ସୁଯୋଗ । ଜିଲ୍ଲା ଓ୍ବାରୀ ଠୁ ରାଜ୍ୟ ସ୍ତରୀୟ ପରାଜୟ ସମୀକ୍ଷାରେ ବବି-ପାଣ୍ଡିଆନ୍ ଙ୍କ ମନମାନି ବିଷୟରେ ସବୁ ଶୁଣିବା ପରେ ବି ନବୀନଙ୍କ ନିରବତା ବିଜେଡିରେ ବଡ ଝଡ ଆଣିଛି । ଆଉ ବବି-ପାଣ୍ଡିଆନ୍ ନୁହେଁ ନିର୍ବାଚନ ପରାଜୟ ପାଇଁ ନବୀନଙ୍କୁ ଦାୟୀ କଲେଣି ବରିଷ୍ଠ ନେତା । ମୁହଁ ଖୋଲି ନବୀନଙ୍କ ଉପରେ ବର୍ଷିଛନ୍ତି ଦଳର ବରିଷ୍ଠ ନେତା ଅମର ଶତପଥୀ । ସିଧାସଳଖ ସୁପ୍ରିମୋଙ୍କୁ ମାଗିଛନ୍ତି ଜବାବ । ଅମର କହିଛନ୍ତି ପାଣ୍ଡିଆନ ଙ୍କୁ ଆମେ ନେତା କରିନଥିଲୁ । ଆମେ ନବୀନ ବାବୁ ଙ୍କୁ ହିଁ ନେତା ବାଛିଥିଲୁ । ଆଶା କରିଥିଲୁ ସବୁ ଦାୟିତ୍ୱ ସେ ନେବେ । ମାତ୍ର ତାହା ସେ କଲେ ନାହିଁ । ତେଣୁ ନବୀନ ପଟ୍ଟନାୟକ ବିଜୟ ର ଶ୍ରେୟ ଯେମିତି ନେଉଥିଲେ ପରାଜୟର ବି ଦାୟିତ୍ୱ ନିଅନ୍ତୁ । ଆଉ ଜବାବ ରଖନ୍ତୁ କାହିଁକି ଆଜି ଇଏ ପରିସ୍ଥିତି । ସମୀକ୍ଷା କରି ଠିକଣା ବାଟରେ ଦଳକୁ ଚଲଇଲେ ହିଁ ଦଳ ଚାଲିବ ବୋଲି କହିଛନ୍ତି ଅମର ।
ସେପଟେ ବରିଷ୍ଠ ନେତା ଅମର ପ୍ରସାଦ ଶତପଥୀଙ୍କ ମନ୍ତବ୍ୟକୁ ସମର୍ଥନ କରିଛନ୍ତି ପୂର୍ବତନ ବିଧାୟକ ସମ୍ବିତ ରାଉତରାୟ । ସମ୍ବିତ କହିଛନ୍ତି ବରିଷ୍ଠ ନେତା ଅମର ଶତପଥି ଯାହା କହିଛନ୍ତି ତାହା ସମ୍ପୂର୍ଣ୍ଣ ଠିକ କଥା । ଜଣେ ଅନୁଭବି ନେତା ଭାବେ ତାଙ୍କର ମତାମତ ସେ ରଖିଛନ୍ତି । ଯାହା କହୁଛନ୍ତି ଠିକ ମଧ୍ୟ କହୁଛନ୍ତି କିନ୍ତୁ ସଭାପତି ଜିଲ୍ଲା ୱାରି ସମୀକ୍ଷା କରିଛନ୍ତି । ଆପାତତଃ ସଭାପତି ବର୍ତ୍ତମାନ ସବୁଥିରେ ଚେଷ୍ଟା କରୁଛନ୍ତି କଣ କଣ ହେଇଛି କଣ ନାହିଁ ବୁଝିବା ପାଇଁ । ତେଣୁ ଅଧିକ ବ୍ୟତି ବ୍ୟସ୍ତ ହେବା ଆବଶ୍ୟକ ନାହିଁ ।
24 ବର୍ଷ ଶାସନରେ ରହିବା ହେଉ କି ନିର୍ବାଚନ ପରାଜୟର ତିନି ମାସ ମଧ୍ୟରେ କେବେ ବି ଦଳ ଭିତରୁ ନବୀନଙ୍କ ଆଡକୁ ଅଙ୍ଗୁଳି ଉଠିନଥିଲା । ଅନ୍ୟ କାହାକୁ ସାମ୍ନାରେ ରିଖି ସବୁବେଳେ ସେଭ ଜୋନ୍ ରେ ରହିଆସୁଥିଲେ ନବୀନ । ମାତ୍ର ଏବେ ବିଜେଡିର ବରିଷ୍ଠ ନେତା ମାନେ ଦଳର ସ୍ଥିତି ପାଇଁ ସିଧାସଳଖ ନବୀନଙ୍କ ଉପରକୁ ଅଙ୍ଗୁଳି ଉଠାଇବା ବିଜେଡିରେ ବଡ ବିସ୍ଫୋରଣ ଆଡକୁ ସଙ୍କେତ ଦେଉଥିବା ଚର୍ଚ୍ଚା ହେଉଛି…
