ଭୁବନେଶ୍ଵର: ବିଧାନସଭାକୁ ପ୍ରବେଶ କରୁ କରୁ ରାଗିଲେ ନବୀନ । ଚମ୍ପୁଆ ବିଧାୟକଙ୍କୁ କଲେ ତାଗିଦ୍ । ବିରୋଧୀ ଦଳ ନେତା ନବୀନ ପଟ୍ଟନାୟକ ଗୃହକୁ ପ୍ରବେଶ ବେଳେ ଏଭଳି ଦୃଶ୍ୟ ଦେଖିବାକୁ ମିଳିଛି । ଅନ୍ୟ ବିଜେଡି ବିଧାୟକ ଓ ଗଣମାଧ୍ୟମ ଆଗରେ ନବୀନ ଖୋଲାଖୋଲି ମୁହଁ ଖୋଲି ତାଗିଦ୍ କରିଛନ୍ତି ।

ଆଜିଠୁ ବିଧାନସଭା ଅଧିବେଶନ ଆରମ୍ଭ ହୋଇଥିବା ବେଳେ ଗୃହରେ ପହଞ୍ଚୁଥିଲେ ନବୀନ । ତାଙ୍କୁ ସ୍ଵାଗତ ପାଇଁ ବିଜେଡି ବିଧାୟକ ଛିଡ଼ା ହୋଇଥିଲେ । ଆଉ କାରରୁ ଓହ୍ଲାଇବାର ଠିକ୍ ପରେ ହିଁ ନବୀନ, ଚମ୍ପୁଆ ବିଧାୟକ ସନାତନ ମହାକୁଡ଼ଙ୍କୁ ପ୍ରଶ୍ନ କରିଥିଲେ । ରାଗି କରି ନବୀନ ପଚାରିଥିଲେ କାହିଁକି ଗତକାଲି ବିଜେଡି ବିଧାୟକ ଦଳ ବୈଠକକୁ ଆସି ନଥିଲ ? ତେବେ ଅସୁସ୍ଥତା ହେତୁ ଆସି ନଥିବା କହିଥିଲେ ସନାତନ ମହାକୁଡ଼ ।

ତେବେ ସନାଙ୍କ ଅସୁସ୍ଥତା ଉତ୍ତରରେ ନବୀନ ସନ୍ତୁଷ୍ଟ ହୋଇ ନଥିଲେ । ନବୀନ କହିଥିଲେ, ତୁମେ ବିଜେପି ଆଡ଼କୁ ଯାଉଛ କି ? ନବୀନଙ୍କ ଏହି ପ୍ରଶ୍ନ ତାଙ୍କ ଦଳ ବିଜେଡି ଓ ବିଜେଡି ବିଧାୟକଙ୍କ ଉପରେ ତାଙ୍କର ବିଶ୍ଵାସ ଓ ଭରସା ନଥିବା ସ୍ପଷ୍ଟ କରୁଛି । ଏପରିକି ଦଳରେ ନବୀନଙ୍କୁ କେହି ମାନୁ ନଥିବା ମଧ୍ୟ ସୂଚାଉଛି ।

ସେପଟେ ଗତକାଲି ଖୋର୍ଦ୍ଧାରେ ମଧ୍ୟ ୨୦ରୁ ଅଧିକ ବିଜେଡି ନେତା ଏକାଠି ହୋଇଥିଲେ । ଗୋଟିଏ ପରେ ଗୋଟିଏ ଜାଗାରେ ଦଳର ନେତା ମେଳି ବାନ୍ଧୁଥିବା ବେଳେ ବିଜେଡିର ଅବସ୍ଥା ଆଗକୁ କଣ ହେବ । ଦଳ ରହିବ ନା ଜଣଙ୍କ ପରେ ଜଣେ ନେତା ବିଜେପିକୁ ଲମ୍ଫ ମାରିବେ । ୟାକୁ ନେଇ ଏବେ ବିଜେଡି ସଭାପତି ନବୀନ ଚିନ୍ତିତ ହୋଇ ପଡ଼ୁଥିବା ଜଣାପଡ଼ିଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more