ଭୁବନେଶ୍ବର ୦୬/୦୪: ରାଜଧାନୀ ବୋମା ବିସ୍ଫୋରଣର ତଦନ୍ତ କରିବ ଏନଆଇଏ। ମୁଖ୍ୟ ଅଭିଯୁକ୍ତ ସହନୱାଜ ମଲ୍ଲିକ ଓରଫ ମଫି ମୃତ୍ୟୁ ପରେ ବ୍ୟାପକ ହେଲା ତଦନ୍ତ । ମଫିର ଗାର୍ଲଫ୍ରେଣ୍ଡ ସମେତ ୭ ଜଣଙ୍କୁ ଜେରା କରୁଛି ଏନଆଇଏ । କମିଶନରେଟ ପୋଲିସ ଠାରୁ ସମସ୍ତ ତଥ୍ୟ ନେଲା ଏନଆଇଏ । ଆନ୍ତଃରାଜ୍ୟ ଲିଙ୍କ ଓ ଜବତ ଆରଡିଏକ୍ସକୁ ନେଇ ହୋଇପାରେ ବଡ଼ ଧରଣର ଖୋଳତାଡ଼।

ଜାନୁଆରୀ ୨୭ ତାରିଖରେ ଏୟାରଫିଲଡ଼ ଥାନା ସୁନ୍ଦରପଦାସ୍ଥିତ ଆଜାଦ ନଗରରେ ହୋଇଥିଲା ଭୟାଙ୍କର ବିସ୍ଫୋରଣ । ମୁଖ୍ୟ ଅଭିଯୁକ୍ତ ସେହେନୱାଜ ମଲ୍ଲିକ ଓରଫ ମଫି ଓ ତା' ମା'ଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି । ଏନଆଇଏ ଏ ନେଇ କେସ ନମ୍ବର ୧ / ୨୦୨୬ ରେ ଏକ ମାମଲା ରୁଜୁ କରିବା ସହ ତଦନ୍ତ ର ପୂର୍ଣ୍ଣ ଭାର କମିଶନରେଟ ପୋଲିସ ଠାରୁ ହାତକୁ ନେଇଛି । ଏହି ତଦନ୍ତ ପ୍ରକ୍ରିୟା ବେଳେ ଜବତ ହୋଇଥିବା ବିସ୍ଫୋରକ ଆରଡିଏକ୍ସର ବ୍ୟବହାର, ମଫି ର ଆନ୍ତରାଜ୍ୟ ଲିଙ୍କ, ପୂର୍ବର ଅପରାଧିକ ମାମଲା ସମ୍ପର୍କରେ ହୋଇପାରେ ଅଧିକ ଖୋଳତାଡ଼। ଠିକ ସେହିପରି ଏତେ ପରିମାଣର ଆରଡିଏକ୍ସ କେଉଁଠାରେ ବ୍ୟବହାର ହୋଇଥାନ୍ତା ଏ ସମ୍ପର୍କରେ ଅଧିକ ଖୋଳତାଡ଼ କରିବା ପାଇଁ ଏକାଧିକ ଲୋକଙ୍କୁ ପଚରାଉଚରା ଜାରି ରଖିଛି ଏନଆଇଏ । ଏପରିକି ମୁଖ୍ୟ ଅଭିଯୁକ୍ତ ତଥା ମୃତ ମଫିର ଗାର୍ଲଫ୍ରେଣ୍ଡ କୁ ଅଧିକ ପଚରାଉଚରା କରୁଛି ଏନଆଇଏ ବୋଲି ଅବସରପ୍ରାପ୍ତ ପୋଲିସ ଅଧିକାରୀ ଶରତ ସାହୁ କହିଛନ୍ତି।

ପଢନ୍ତୁ ଏହି ଖବର: ମାଟିରେ ମିଶିଲା ଇସଲାମ ନଗର

ବିସ୍ଫୋରକ ବା ବୋମାରୁ ହେକ୍ସାହାଇଡ୍ରୋ ଟ୍ରାଇନାଇଟ୍ରୋ ଭଳି ରାସାୟନିକ ବ୍ୟବହାର ହୋଇଥିଲା । ପ୍ରାଥମିକ ତଦନ୍ତ ରୁ ଜାଣିବାକୁ ପାଇଥିଲା ଏନଆଇଏ। ସାମ୍ପୁଲକୁ ରାଜ୍ୟ ଫରେନସିକ ଲ୍ୟାବ କୁ ପଠାଯାଇଥିଲା । ଫରେନସିକ ରିପୋର୍ଟ ଆସିବା ପରେ ବୋମା ବିସ୍ପୋରଣର ଗୁମର ଖୋଲିବା ବୋଲି ଏନଆଇଏ ଆଶା ରଖିଛି । ସେପଟେ ସହଯୋଗୀଙ୍କ ବୟାନ ରେକର୍ଡ ସହ ଜବତ ସିଡ଼ିଆର ରିପୋର୍ଟ ମଧ୍ୟ ଆତଙ୍କିର ମୁଖା ଖୋଲି ଦେଇପାରେ । ଏଭଳି କ୍ଷେତ୍ରରେ ରାଜ୍ୟ ବାହାର ଅପରାଧୀଙ୍କ ସହ ମଫି ଲିଙ୍କ ଓ ଫଣ୍ଡିଂ ନେଇ ତାର ଗାର୍ଲଫ୍ରେଣ୍ଡକୁ ଅଧିକ ପଚରାଉଚରା କରୁଛି ଏନଆଇଏ ବୋଲି ବରିଷ୍ଠ ଆଇନଜୀବୀ ଦିବ୍ୟାନନ୍ଦ ମିଶ୍ର କହିଛନ୍ତି ।

ଦିଲ୍ଲୀ ବିସ୍ଫୋରଣ ସହ ଭୁବନେଶ୍ୱର ବିସ୍ଫୋରଣ ର ଲିଙ୍କ ନେଇ ଚାଲିଛି ଖୋଳତାଡ଼ । ଯଦି ସେମିତି କିଛି ପ୍ରମାଣ ମିଳେ ତେବେ ମଫି ର ସହଯୋଗୀ ଙ୍କ ବଢ଼ିପାରେ ଅଡ଼ୁଆ।