ଭୁବନେଶ୍ଵର: ପଶ୍ଚିମା ଝଡ଼ ଅପସାରଣ ପରେ ତଳମୁହାଁ ହୋଇଛି ପାରଦ । ହ୍ରାସ ପାଇଛି ରାତି ତାପମାତ୍ରା । ଝାରସୁଗୁଡା ଓ ରାଉରକେଲା ସହ ରାଜ୍ୟର ବିଭିନ୍ନ ସ୍ଥାନରେ ରାତି ତାପମାତ୍ରା ହ୍ରାସ ପାଇଛି । ଉତ୍ତର ଓଡ଼ିଶାରେ ରାତି ତାପମାତ୍ରା ଅଧିକ ଖସିଛି ।

ଝାରସୁଗୁଡ଼ା ଓ ରାଉରକେଲାରେ ସର୍ବନିମ୍ନ ରାତି ତାପମାତ୍ରା ୮ ଡିଗ୍ରୀ ରେକର୍ଡ କରାଯାଇଛି । ଗତକାଲି ଝାରସୁଗୁଡ଼ାରେ ସର୍ବନିମ୍ନ ତାପମାତ୍ରା ୧୧.୨ ଡିଗ୍ରୀ ଥିବା ବେଳେ ରାଉରକେଲାରେ ୧୧.୪ ଡିଗ୍ରୀ ରେକର୍ଡ ହୋଇଥିଲା ।

ପଶ୍ଚିମାଝଡ଼ର ଅପସାରଣ ପରେ ରାଜ୍ୟରେ ଉତ୍ତରପଶ୍ଚିମ ଦିଗରୁ ଥଣ୍ଡା ଶୁଷ୍କ ବାୟୁର ପ୍ରବାହ ବୃଦ୍ଧି ପାଇଛି । ଏଥିସହ ଅଧିକାଂଶ ସ୍ଥାନରେ ରାତି ତାପମାତ୍ରାରେ ୨ରୁ ୩ ଡିଗ୍ରୀ ସେଲସିୟସ୍ ଯାଏଁ ହ୍ରାସ ଘଟିଛି ।

ରାଉରକେଲା ଓ ଝାରସୁଗୁଡ଼ାରେ ସର୍ବନିମ୍ନ ରାତି ତାପମାତ୍ରା ୮ ଡିଗ୍ରୀ ରେକର୍ଡ ହୋଇଥିବା ବେଳେ କେନ୍ଦୁଝରରେ ୧୧.୨, ସମ୍ବଲପୁରରେ ୧୩.୩, ହୀରାକୁଦରେ ୧୪.୧, ବାଲଲେଶ୍ଵରେ ୧୪.୮, ଚାନ୍ଦବାଲିରେ ୧୭.୬ ଓ ଭୁବନେଶ୍ଵରର ରାତି ତାପମାତ୍ରା ୧୮.୬ ଡିଗ୍ରୀ ରହିଛି । କେନ୍ଦୁଝରରେ ପାରଦ ସର୍ବାଧିକ ୪.୯ ଡିଗ୍ରୀ ଖସିଥିବା ବେଳେ ଭୁବନେଶ୍ଵରରେ ସର୍ବନିମ୍ନ ୧.୯ ଡିଗ୍ରୀ ହ୍ରାସ ପାଇଛି ।