Residents Protest / ନୀଳାଦ୍ରିବିହାରରେ ବଡ଼ ଧରଣର ଉଚ୍ଛେଦ ଅଭିଯାନ, ବିରୋଧରେ ସ୍ଥାନୀୟ ବାସିନ୍ଦା

ମାଟିରେ ମିଶିବ ୩୩୦ ଘର...! ନୀଳାଦ୍ରିବିହାରରେ ବଡ଼ ଉଚ୍ଛେଦ ଅଭିଯାନ । ସକାଳୁ ସକାଳୁ ଜେସିବି ଓ ବୁଲଡୋଜର ଧରି ପହଞ୍ଚିଛି ପ୍ରଶାସନ । ଗୋଟିଏ ପଟେ ବିଏମସି-ବିଡିଏର ଉଚ୍ଛେଦ ଅଭିଯାନ, ଅନ୍ୟପଟେ ଘର ହରାଇବା ଆଶଙ୍କାରେ ଲୋକଙ୍କ ବିରୋଧ । ସ୍ଥିତିକୁ ନଜରରେ ରଖି ମୁତୟନ ହୋଇଛି ବ୍ୟାପକ ପୋଲିସ ଫୋର୍ସ । ରାଇଟ୍ କଣ୍ଟ୍ରୋଲ୍ ଗାଡ଼ିଠୁ ଆମ୍ବୁଲାନ୍ସ ସବୁକିଛି ପ୍ରସ୍ତୁତ । ନୀଳାଦ୍ରିବିହାରରେ ଏବେ ଉଚ୍ଛେଦକୁ ନେଇ ତେଜିଛି ତାତି ।

ସୂଚନାଥାଉ କି ରାଜଧାନୀ ଭୁବନେଶ୍ୱରର ନୀଳାଦ୍ରିବିହାର ଅଞ୍ଚଳରେ ଆଜି ବଡ଼ ଧରଣର ଉଚ୍ଛେଦ ଅଭିଯାନ ଆରମ୍ଭ କରିଛି ବିଏମସି । ବିଏମସି ଓ ବିଡିଏର ମିଳିତ ଉଦ୍ୟମରେ ଏହି ଉଚ୍ଛେଦ କାର୍ଯ୍ୟ ଚାଲିଛି । ଅଭିଯାନକୁ ଦୃଷ୍ଟିରେ ରଖି ଘଟଣାସ୍ଥଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି ।

ନୀଳାଦ୍ରିବିହାର ଟ୍ରାଞ୍ଜିଟ୍ ହାଉସ୍‌ରେ ରହୁଥିବା ଲୋକେ ଏହି ଉଚ୍ଛେଦ ଅଭିଯାନକୁ ବିରୋଧ କରିଛନ୍ତି । ଉଚ୍ଛେଦକୁ ନେଇ ଅଞ୍ଚଳରେ ଉତ୍ତେଜନାର ଆଶଙ୍କା ଥିବାରୁ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ।

କୌଣସି ଅପ୍ରୀତିକର ପରିସ୍ଥିତି ଘଟିଲେ ତୁରନ୍ତ ମୁକାବିଲା ପାଇଁ ରାଇଟ୍ କଣ୍ଟ୍ରୋଲ୍ ଗାଡ଼ି ସହ ଆମ୍ବୁଲାନ୍ସକୁ ମଧ୍ୟ ସଜାଗ ରଖାଯାଇଛି । ଚନ୍ଦ୍ରଶେଖରପୁର ଥାନା ପୋଲିସ ପକ୍ଷରୁ ବ୍ୟାପକ ଫୋର୍ସ ମୁତୟନ ରହିଛି ।

ସୂଚନା ଅନୁସାରେ, ନୀଳାଦ୍ରିବିହାରରେ ଥିବା ପ୍ରାୟ ୮୯୦ଟି ଘର ମଧ୍ୟରୁ ୩୩୦ଟି ଘରକୁ ଜବରଦଖଲ ମୁକ୍ତ କରିବା ପାଇଁ ପ୍ରଶାସନ ପକ୍ଷରୁ ଅଭିଯାନ ଚାଲିଛି । ଉଚ୍ଛେଦକୁ ନେଇ ପ୍ରଶାସନ ଓ ସ୍ଥାନୀୟ ଲୋକଙ୍କ ମଧ୍ୟରେ ମତଭେଦ ଦେଖାଦେଇଛି ।