ଯାଜପୁର ଜିଲ୍ଲା ବିଞ୍ଝାରପୁର ବ୍ଲକରେ ଅନେକ ସ୍ଥାନରେ ନାହିଁ ଶିଶୁଙ୍କ ପାଠ ପଢିବା ପାଇଁ ନିଜସ୍ୱ ଅଙ୍ଗନବାଡି କେନ୍ଦ୍ର । କେଉଁଠି କମ୍ୟୁନିଟି ସେଣ୍ଟର ତ ଆଉ କେଉଁଠି ଭଡ଼ା ଘରେ ଚାଲିଛି ଅଙ୍ଗନବାଡି । ସରକାରୀ ତଥ୍ୟ ଅନୁଯାୟୀ, ବିଞ୍ଝାରପୁର ବ୍ଲକରେ ମୋଟ ୨୯୫ ଗୋଟି ଅଙ୍ଗନବାଡି କେନ୍ଦ୍ର ଥିବା ବେଳେ ମାତ୍ର ୧୭୮ଟି ଅଙ୍ଗନବାଡି କେନ୍ଦ୍ରର ନିଜସ୍ୱ ଗୃହରେ ପାଠ ପଢୁଛନ୍ତି ଶିଶୁ । ବାକି ୧୨୭ଟି ସ୍ଥାନରେ ଏପର୍ଯ୍ୟନ୍ତ ନିର୍ମାଣ ହୋଇପାରି ନାହିଁ ଅଙ୍ଗନବାଡି ଗୃହ । ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟ ଅନୁଯାୟୀ, ୧୨୭ଟି କେନ୍ଦ୍ରର ନିଜସ୍ୱ ଗୃହ ନଥିବାରୁ ୭୬ଟି କେନ୍ଦ୍ର ସ୍କୁଲ ଗୃହରେ, ୨୪ଟି କେନ୍ଦ୍ର ଭଡ଼ା ଘରେ ଏବଂ ୨୭ଟି କେନ୍ଦ୍ର କମ୍ୟୁନିଟି ସେଣ୍ଟରରେ ଚାଲୁଛି । ବର୍ତ୍ତମାନ ସୁଦ୍ଧା ୩୯ଟି କେନ୍ଦ୍ରର ଗୃହ ନିର୍ମାଣଧୀନ ଅବସ୍ଥାରେ ପଡି ରହିଛି । କେବଳ ସେତିକି ନୁହେଁ, କେତେକ ଅଙ୍ଗନବାଡିରେ କର୍ମଚାରୀଙ୍କର ଦେଖା ମିଳୁନାହିଁ, ନାମକୁ ମାତ୍ର ଚାଲିଛି l ଯେଉଁଥିପାଇଁ ପିଲାମାନଙ୍କ ଶିକ୍ଷାଦାନ ବାଧାପ୍ରାପ୍ତ ହେଉଥିବା ଅଭିଯୋଗ ହୋଇଛି ।

ପୂର୍ବ ବିଜେଡି ସରକାର ସମୟରେ ଶିକ୍ଷାଦାନ ପାଲଟିଥିଲା ପ୍ରହସନ । କେତେକ ସ୍ଥାନରେ ଅଙ୍ଗନବାଡି ପାଇଁ ଜାଗା ନଥିବାରୁ ଗୃହ ନିର୍ମାଣ ହୋଇନାହିଁ । ପ୍ରଶାସନର ଅବହେଳା ଯୋଗୁ ବର୍ତ୍ତମାନ ପର୍ଯ୍ୟନ୍ତ ଜାଗା ନିରୂପଣ ହୋଇ ପାରିନାହିଁ । ଏହା ଛଡା ଅନେକ ସ୍ଥାନରେ ଅଙ୍ଗନବାଡି କେନ୍ଦ୍ର ପାଇଁ ଟଙ୍କା ଆସିଥିଲେ ସୁଦ୍ଧା ଗୃହ କାର୍ଯ୍ୟ ହୋଇ ପାରିନଥିବା ଅଭିଯୋଗ ହୋଇଛି । ସେପଟେ ଯଥାଶୀଘ୍ର ସମସ୍ୟାର ସମାଧାନ କରାଯିବ ବୋଲି ପ୍ରତିଶୃତି ଦେଇଛନ୍ତି ବିଡିଓ l

ଯଥାଶୀଘ୍ର ଅସମ୍ପୂର୍ଣ ଥିବା ଅଙ୍ଗନୱାଡି କେନ୍ଦ୍ରଗୁଡିକୁ ସମ୍ପୂର୍ଣ କରିବା ସହ ବାକି ଥିବା ଗୃହଗୁଡିକ ପାଇଁ ଉପଯୁକ୍ତ ଜାଗା ନିରୂପଣ କରି ଗୃହ ନିର୍ମାଣ କରିବାକୁ ସ୍ଥାନୀୟ ବାସିନ୍ଦା ସରକାରଙ୍କ ନିକଟରେ ନିବେଦନ କରିଛନ୍ତି ।