କେନ୍ଦୁଝର ଜିଲ୍ଲାରେ ସମସ୍ତଙ୍କୁ ଘରେ ଘରେ ପାନୀୟ ଜଳ ଯୋଗାଇ ଦେବାକୁ ଥିଲା ଲକ୍ଷ୍ୟ । ଏଥିପାଇଁ ଘସିପୁରା, ଆନନ୍ଦପୁର ଓ ସାହାରପଡ଼ା ବ୍ଲକରେ ପାଞ୍ଚ ବର୍ଷ ତଳୁ ନିର୍ମାଣ କରାଯାଉଥିଲା ବଡ଼ ବଡ଼ ପାନୀୟ ଜଳ ପ୍ରକଳ୍ପ। ଏ ପର୍ଯ୍ୟନ୍ତ ଗୋଟିଏ ବି ଗାଁ ଭଲରେ ପାଣି ମୁନ୍ଦାଏ ପାଇପାରୁନି । ୨୦୧୯ ମସିହାରେ କୋଟି କୋଟି ଟଙ୍କା ବ୍ୟୟରେ ଆରମ୍ଭ କରାଯାଇଥିଲା ପାନୀୟ ଜଳ ପ୍ରକଳ୍ପ। ଶୁଦ୍ଧ ପାନୀୟ ଜଳ ପହଞ୍ଚାଇବା ପାଇଁ ନିର୍ମାଣ ହୋଇଥଲା ବଡ ବଡ଼ ତିନୋଟି ପ୍ରକଳ୍ପ । ପୂର୍ବ ବିଜେଡି ସରକାର ସମୟରେ ଅଣ ଓଡିଆ ଠିକା ସଂସ୍ଥା ଏହି କାମ କରୁଥିଲେ। ବିତିଗଲାଣି ୫ ବର୍ଷ। ପ୍ରକଳ୍ପ ଶେଷ ହେଉନି କି ଲୋକେ ପାଣି ପାଇ ପାରୁ ନାହାନ୍ତି । ବାରମ୍ବାର ସମୟ ଗଡ଼ାଇ ଚାଲିଛନ୍ତି ଠିକାଦାର ।

କେନ୍ଦୁଝର ଜିଲ୍ଲା ଖଣିଜ ପାଣ୍ଠିରୁ ଏହି ପ୍ରକଳ୍ପ ପାଇଁ ଟଙ୍କା ଖର୍ଚ୍ଚ କରାଯାଇଛି । ସୂଚନା ଅନୁଯାୟୀ ଆନନ୍ଦପୁର ବ୍ଲକରେ ୮୧ ଟି ଗାଁ ପାଇଁ ଡି ଏମ ଏଫ ରୁ ବ୍ୟୟ ଅଟକଳ ହୋଇଛି ୧୩୫ କୋଟି ୬୨ ଲକ୍ଷ ଟଙ୍କା , ଘଷିପୁରା ବ୍ଲକରେ ୨୦୦ ଟି ଗାଁ ପାଇଁ ବ୍ୟୟ ଅଟକଳ ହୋଇଛି ୧୫୫କୋଟି ୨୧ ଲକ୍ଷ ଟଙ୍କା । ବଡ଼ କଥା ହେଉଛି ପ୍ରକଳ୍ପ କାର୍ଯ୍ୟ ରାଜ୍ୟ ବାହାରର ଠିକାଦାର କରୁଛନ୍ତି ।

କାମ ସରିନଥିବା ବେଳେ ଠିକା ସଂସ୍ଥା କୁ ଅନୁକମ୍ପା ଦେଖାଇ ୮୯ ପ୍ରତିଶତ ଅନୁଦାନ ରାଶି ଦିଆ ଯାଇଥିଲା। ୨୦୨୧ରେ ଶେଷ ହେବାକୁ ଥିବା ଏହି ପ୍ରକଳ୍ପ ଏବେ ଅଧା ପନ୍ତରିଆ ଅବସ୍ଥାରେ। ଗ୍ରାମ୍ୟ ଜଳ ଯୋଗାଣ ବିଭାଗ ଗତ ବର୍ଷ ମେଘା ଇଂଜିନିୟରିଂ ଠିକାସଂସ୍ଥା ଉପରେ ଜୋରିମନା କରିଥିଲା । ଚଳିତ ବର୍ଷ ମଧ୍ୟ ଜୋରିମନା କରିଥିବା ବିଭାଗୀୟ ନିର୍ବାହୀ ଯନ୍ତ୍ରୀ ସୂଚନା ଦେଇଛନ୍ତି। ଠିକା ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ଦାବି ହୋଇଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more