ରାଜଧାନୀରେ ଅପରାଧୀଙ୍କୁ ସାବାଡ୍ ପାଇଁ ଆକ୍ସନ୍ ମୋଡରେ କମିଶନରେଟ୍ ପୋଲିସ୍ । ଖଣ୍ଡଗିରି ଅଞ୍ଚଳରେ ନିଶା ମାଫିଆ ଶେଖ ଜାମସେଦକୁ ଏନକାଉଣ୍ଟର କରିଛି କମିଶନରେଟ ପୋଲିସର ସ୍ପେଶାଲ କ୍ରାଇମ ୟୁନିଟ୍ । ଜାମସେଦର ବାମଗୋଡ଼ରେ ବାଜିଛି ଗୁଳି । ଗୁରୁତର ଅବସ୍ଥାରେ ତାକୁ ମେଡିକାଲରେ ଭର୍ତ୍ତି କରାଯାଇଛି । ଜାମସେଦ ନିକଟରୁ ଏକ ବନ୍ଧୁକ ସହ 20 ଲକ୍ଷ ଟଙ୍କାର ବ୍ରାଉନ ସୁଗାର ଜବତ କରିଛି ପୋଲିସ। ଜାମସେଦ୍ ଘର ଝାରପଡା ଅଞ୍ଚଳରେ । ତା ନାଁରେ ପୂର୍ବରୁ 4 ଟି କେସ ରହିଛି। ଯେଉଁଥିରୁ 3 ଟି ଡ୍ରଗ୍ସ କେସ୍‌। ନେପାଳ ଏବଂ ପଶ୍ଚିମବଙ୍ଗରେ ବେପାରୀଙ୍କ ଲିଙ୍କରେ ରହି ବ୍ରାଉନ ସୁଗାର ଆଣୁଥିଲା ମାଫିଆ ଶେଖ ଜାମସେଦ। ଜାମସେଦକୁ ଧରିବାକୁ ଯାଇଥିବା ବେଳେ ପୋଲିସକୁ ଦେଖି ସେ ପ୍ରଥମେ ଗୁଳି ଚଳାଇଥିଲା । ଏହାପରେ ପାଲଟା ଜବାବ ଦେଇଥିଲା ପୋଲିସ ।

ରାଜଧାନୀରେ ଅପାରଧୀଙ୍କୁ ସାବାଡ଼ ପାଇଁ ପୋଲିସ କରୁଛି ଏନକାଉଣ୍ଟର। ଗତ ୨ ମାସରେ ୫ ଜଣ ଅପରାଧୀଙ୍କୁ ଏନକାଉଣ୍ଟର କଲାଣି ପୋଲିସ । ଫେବୃଆରୀ ୧୬, ପୁରୀ କେନାଲ ରୋଡ଼ ଆପାର୍ଟମେଣ୍ଟ ଲୁଟେରା ଅର୍ଜୁନ ଅନାରେକୁ ଏନକାଉଣ୍ଟର କରିଥିଲା ପୋଲିସ । ମାର୍ଚ୍ଚ 3, ବାଙ୍କୁଆଳ ନଦୀପଠା ବିହାରର ଦୁଇ କୁଖ୍ୟାତ ଲୁଟେରା ସୋନୁ ଯାଦବ, ମନୀଷ ଯାଦବକୁ ଏନକାଉଣ୍ଟର କରିଥିଲା ପୋଲିସ। ବିହାରର ଏହି ଦୁଇ ଲୁଟେରାଙ୍କ ନାଁରେ ୧୫ରୁ ଅଧିକ ଛିନତାଇ ମାମଲା ରହିଥିଲା । ଏମାନେ ବିହାରରୁ ଆସି ଭୁବନେଶ୍ବରରେ ଖେଳାଇଥିଲେ ବ୍ଲାକ୍ ପଲସର୍ ଆତଙ୍କ । କଳା ପଲସରରେ ଯାଇ କରୁଥିଲେ ଛିନତାଇ । ମାର୍ଚ୍ଚ 8,ପୁରୀ ବାଇପାସ ସାଇମନ୍ଦିର ପାଖ ATM ଲୁଟେରା ଦୀପକ କୁମାରକୁ ପୁରୀ ବାଇପାସ ସାଇମନ୍ଦିର ପାଖରେ ପୋଲିସ କରିଥିଲା ଏନକାଉଣ୍ଟର।