ଅବ୍ୟବସ୍ଥା ଘେରରେ ନୂଆପଡା ଜିଲ୍ଲା କୋମନା ବ୍ଲକ ଶୁଆବାହାଲ ଉଚ୍ଚ ପ୍ରାଥମିକ ବିଦ୍ୟାଳୟ । ସ୍କୁଲରେ ମାତ୍ର ତିନୋଟି ଶ୍ରେଣୀଗୃହ, ଯାହା ଭିତରେ ଦୁଇଟି ସମ୍ପୂର୍ଣ୍ଣ ଅଯୋଗ୍ୟ । ଛାତ ଫାଟି ଆଁ କଲାଣି, ସାମାନ୍ୟ ବର୍ଷା ହେଲେ ପାଣି ଗଳିବା ସହ ସିମେଣ୍ଟ ମୁଣ୍ଡା ଛାତରୁ ପଡୁଛି । ଫଳରେ ଗୋଟିଏ ଶ୍ରେଣୀଗୃହରେ ଚାଲିଛି ଶିକ୍ଷାଦାନ । ଆଉ ଯେଉଁଠି ଶିକ୍ଷକଙ୍କୁ ଠିଆ ହେବା ପାଇଁ ଯାଗା ନାହିଁ, ପାଠ ପଢାଇବେ ବା କେମିତି । ଗୋଟିଏ କୋଠରୀରେ ତିନୋଟି ଶ୍ରେଣୀ ବସୁଥିବା ବେଳେ ବାରଣ୍ଠାରେ ଚାରିଟି ଶ୍ରେଣୀ ବସି ପାଠ ପଢୁଛନ୍ତି । ତେଣୁ ଅନେକ ଅଭିଭାବକ ନିଜ ପିଲାଙ୍କୁ ବିଦ୍ୟାଳୟକୁ ଛାଡୁ ନାହାନ୍ତି । ସେପଟେ ବିପଦ ସଙ୍କୁଳ ଶ୍ରେଣୀଗୃହ ବଦଳରେ ନୂତନ ଶ୍ରେଣୀଗୃହ ପାଇଁ ଦାବି କରିଛନ୍ତି ଗ୍ରାମବାସୀ l

ଦୁଇ ବର୍ଷରେ ୨୩ ଲକ୍ଷ ଅଟକଳ ବ୍ୟୟରେ ଦୁଇଟି କୋଠରୀ ପାଇଁ କାର୍ଯ୍ୟାଦେଶ ଆସିଥିଲା । ହେଲେ ଠିକାଦାର ହେଉ କି ବିଭାଗୀୟ ଅଧିକାରୀ, ଏମାନଙ୍କ ଖାମ ଖିଆଲି ମନୋଭାବ ପାଇଁ ଅସମ୍ପୂର୍ଣ୍ଣ ଅବସ୍ଥାରେ ପଡି ରହିଛି ବିଲଡିଂ କାମ । ସମସ୍ୟାକୁ ନେଇ ଗ୍ରାମବାସୀ ଜିଲ୍ଲାପାଳଙ୍କ ଦ୍ବାରସ୍ଥ ହେବା ସହ ସ୍ଥିତି ପରଖିବାକୁ ଜିଦ ଧରିଥିଲେ । ସେହିଦିନ ହିଁ ସବୁ କାମ ସାରିବା ପରେ ରାତିରେ ଜିଲ୍ଲାପାଳ ସୁଆବାହାଲ ଗାଁରେ ପହଞ୍ଚି ସ୍କୁଲ ବୁଲି ଦେଖିବା ସହ ତୁରନ୍ତ କାମ ସାରିବା ପାଇଁ ଫୋନ ଯୋଗେ ଠିକାଦାରକୁ ତାଗିଦ କରିଥିଲେ । ତେବେ କେବେ ସ୍କୁଲ ସମସ୍ୟା କେବେ ସୁଧୁରୁଛି, ତାକୁ ହିଁ ଅପେକ୍ଷା ।