ମାଟ୍ରିକ ପରୀକ୍ଷାରେ କମୁନି ଡ୍ରପଆଉଟ୍‌ ସଂଖ୍ୟା । ବାଲେଶ୍ୱର ଜିଲ୍ଲାରେ ଚଳିତ ବର୍ଷ ୭୦୦ ରୁ ଅଧିକ ପିଲା ଫର୍ମ ଫିଲାପ କରିଛନ୍ତି ହେଲେ ଦେଇନାହାନ୍ତି ପରୀକ୍ଷା । ଶିକ୍ଷାବିତଙ୍କ ମତରେ ଅଭିଭାବକ ଓ ଛାତ୍ରଛାତ୍ରୀଙ୍କ ଭିତରେ ସମନ୍ୱୟ ଅଭାବରୁ ଦୂର ହେଉନି ପିଲାଙ୍କ ପରୀକ୍ଷା ଭୟ।

ଚଳିତ ବର୍ଷର ମାଟ୍ରିକ ପରୀକ୍ଷା ଗତ ଫେବୃଆରୀ ୨୧ ତାରିଖରୁ ଆରମ୍ଭ ହୋଇ ମାର୍ଚ୍ଚ ୬ ତାରିଖରେ ଶେଷ ହୋଇଥିଲା । ଚଳିତ ପରୀକ୍ଷାରେ ପୂର୍ବଥର ଭଳି ଡ୍ରପ୍ ଆଉଟ ସଂଖ୍ୟା ଚିନ୍ତା ବଢାଇଛି । ପ୍ରତି ବିଷୟରେ ୭୦୦ରୁ ଅଧିକ ଛାତ୍ରଛାତ୍ରୀ ପରୀକ୍ଷା ଦେଇନାହାନ୍ତି । ଯାହା ଶିକ୍ଷା ବିଭାଗ ପାଇଁ ଉଦବେଗର ବିଷୟ ହୋଇଛି । ପ୍ରଶ୍ନ ଉଠୁଛି, ପରୀକ୍ଷା ପ୍ରତି ପିଲାମାନଙ୍କର ଏପରି ମନୋଭାବ କହିଁକି । ଏଥିପାଇଁ କିଏ ଦାୟୀ ।

ବାଲେଶ୍ୱର ଜିଲ୍ଲାରେ ଚଳିତ ବର୍ଷ ରେଗୁଲାର ପରୀକ୍ଷାର୍ଥୀ ଭାବେ ୨୯ ହଜାର ୯୬୮ ଜଣ ଛାତ୍ରଛାତ୍ରୀ ପରୀକ୍ଷା ଦେବା ପାଇଁ ପଞ୍ଜିକୃତ କରିଥିଲେ । ଏମାନଙ୍କ ମଧ୍ୟରୁ ମାତୃଭାଷା ପରୀକ୍ଷାରେ ୭୩୫ ଜଣ ପରୀକ୍ଷାର୍ଥୀ ପରୀକ୍ଷା ଦେଇନାହାନ୍ତି । ଇଂରାଜୀରେ ୭୬୧, ଗଣିତରେ ୭୭୮, ବିଜ୍ଞାନରେ ୭୭୯, ସାମାଜିକ ବିଜ୍ଞାନରେ ୭୯୧ ଏବଂ ହିନ୍ଦୀ ଓ ସଂସ୍କୃତ ପରୀକ୍ଷାରେ ୭୮୪ଜଣ ପରୀକ୍ଷାର୍ଥୀ ପରୀକ୍ଷା ଦେଇନାହାନ୍ତି।

ସେହିପରି ମଧ୍ୟମା ପରୀକ୍ଷାରେ ୬୪୭ ଜଣ ପଞ୍ଜିକୃତ ଛାତ୍ରଛାତ୍ରୀଙ୍କ ମଧ୍ୟରୁ ୧୪୭ ଜଣ ପରୀକ୍ଷା ଦେଇନାହାନ୍ତି । ରାଜ୍ୟ ମୁକ୍ତ ବିଦ୍ୟାଳୟ ପରୀକ୍ଷାରେ ୪୨୯ ଜଣ ପଞ୍ଜିକୃତଙ୍କ ମଧ୍ୟରୁ ୪୯ ଜଣ ଅନୁପସ୍ଥିତ ରହିଛନ୍ତି । ଏବେ ଜିଲ୍ଲା ଶିକ୍ଷା ବିଭାଗ ଏମାନେ ଅନୁପସ୍ଥିତ ରହିବାର କାରଣ ଖୋଜୁଛି । ପ୍ରଧାନଶିକ୍ଷକ ମାନଙ୍କୁ ପ୍ରତି ପିଲା ଅନୁପସ୍ଥିତିର କାରଣ ଖୋଜି ରିପୋର୍ଟ ଦେବାକୁ କୁହାଯାଇଥିବା DEO କହିଛନ୍ତି ।

ବିଦ୍ୟାଳୟର ଭିତିଭୂମି ସଠିକ ଥିବା ବେଳେ ପାଠ ପଢ଼ା ମଧ୍ୟ ହେଉଛି । ହେଲେ ଛାତ୍ରଛାତ୍ରୀମାନେ ପରୀକ୍ଷା ପାଇଁ ପଞ୍ଜିକୃତ କରିଥିଲେ ମଧ୍ୟ ପରୀକ୍ଷାକୁ କାହିଁକି ଆସୁ ନାହାନ୍ତି । ଏହାର କଣ କାରଣ ଖୋଜି ବାହାର କରୁଛି ଜିଲ୍ଲା ଶିକ୍ଷା ବିଭାଗ ଏବେ ତା ଉପରେ ନଜର ।