ସକ୍ଷମ ଅଙ୍ଗନୱାଡିରେ ପରିଣତ ହେବ ରାଜ୍ୟର ସମସ୍ତ ୭୪ ହଜାର ଅଙ୍ଗନୱାଡି କେନ୍ଦ୍ର । ଅପପୁଷ୍ଟି ମୁକ୍ତ ଓଡିଶା ପାଇଁ ମିଶନ ଆରମ୍ଭ କରିବ ମହିଳା ଓ ଶିଶୁ କଲ୍ୟାଣ ବିଭାଗ । ଏହାକୁ ତୃଣମୂଳ ସ୍ତରେ କାମ କରୁଥିବା ଅଧିକାରୀ ମାନେ ମନିଟରିଂ କରିବେ । ବହୁତ ଶୀଘ୍ର ବିକଶିତ ଏବଂ କୁପୋଷଣ ମୁକ୍ତ ଓଡିଶା ଗଠନ ହେବ । ରାଜ୍ୟ ସ୍ତରୀୟ ପୋଷଣ ପକ୍ଷ ସମାରୋହରେ ବଡ ଘୋଷଣା କରିଛନ୍ତି ସରକାର । ସୁସ୍ଥ ଶିଶୁ ସୁସ୍ଥ ଭବିଷ୍ୟତର ପ୍ରତୀକ । ପୂର୍ବ ସରକାରରେ ପୋଷଣ କେବଳ ସ୍ଲୋଗାନ ବାଜିରେ ସୀମିତ ଥିଲା । ପିଲାଙ୍କ ପାଖରେ ପୋଷଣ ଯୁକ୍ତ ଖାଦ୍ୟ ପହଞ୍ଚି ପାରୁନଥିଲା ବୋଲି କହିଛନ୍ତି ମୁଖ୍ୟମନ୍ତ୍ରୀ ।

ଓଡ଼ିଶାକୁ କୁପୋଷଣ ମୁକ୍ତ କରିବା ପାଇଁ ମିଶନ ମୋଡରେ କାମ କରୁଛି ବିଜେପି ସରକାର । ସୁଦୃଢ ହେବ ଅଙ୍ଗନୱାଡି ଭିତ୍ତିଭୂମି । ଆସନ୍ତା ୩ ବର୍ଷ ଭିତରେ ରାଜ୍ୟର ସମସ୍ତ ୭୪ ହଜାର ଅଙ୍ଗନୱାଡି କେନ୍ଦ୍ର ହେବ ସକ୍ଷମ ଅଙ୍ଗନୱାଡି । କିଶୋରୀ ମାନଙ୍କ ମଧ୍ୟରେ କୁପୋଷଣ ଦୂର କରିବା ପାଇଁ ନବମ ଓ ଦଶମ ଶ୍ରେଣୀ ଛାତ୍ରଛାତ୍ରୀଙ୍କୁ ମଧ୍ୟାହ୍ନ ଭୋଜନରେ ସାମିଲ କରିଛନ୍ତି ରାଜ୍ୟ ସରକାର । ମାଆ ଓ ଶିଶୁଙ୍କ ପାଇଁ ପୋଷଣ ଯୁକ୍ତ ଖାଦ୍ୟ କେତେ ଜରୁରୀ ଜଣାଇବା ପାଇଁ ଅଙ୍ଗନବାଡି ଠାରୁ ଆରମ୍ଭ କରି ସାରା ରାଜ୍ୟରେ ଚାଲିଛି ସଚେତନାତା କାର୍ଯ୍ୟକ୍ରମ । ଉତ୍ତମ ସ୍ୱାସ୍ଥ୍ୟ ପାଇଁ ସୁସ୍ଥ ଜୀବନ ଶୈଳୀ ଆପଣେଇବା ପାଇଁ ରାଜ୍ୟବାସୀଙ୍କୁ ଅପିଲ କରିଛନ୍ତି ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀ ।

ବିଜେପି ସରକାରକୁ ପୂର୍ବ ସରକାର ଦେଇଯାଇଛନ୍ତି ଅପପୁଷ୍ଟିର କଳଙ୍କ...ବିଧାନସଭା ତଥ୍ୟ କହୁଛି ୨୦୨୪ ଅଗଷ୍ଟ ସୁଦ୍ଧା ରାଜ୍ୟର ୯୮ ହଜାର ୬୨୦ ଶିଶୁ ଅପପୁଷ୍ଟିର ଶିକାର । ଏପରିକି ପୂର୍ବରୁ ନ୍ୟାସନାଲ ଫ୍ୟାମିଲି ହେଲ୍ଥ ସର୍ଭେ ରିପୋର୍ଟ ବିଜେଡି ସରକାର ଅମଳରେ ଅପପୁଷ୍ଟିର ଅସଲ ଚିତ୍ରକୁ ଉଜାଗର କରିଥିଲା । ରାଜ୍ୟରେ ୧୦.୭ ଲକ୍ଷ ପିଲା ବୟସ ତୁଳନାରେ ଗେଡା ହୋଇଥିବା ବେଳେ ୫.୧୩ ଲକ୍ଷ ପିଲା ଉଚ୍ଚତା ତୁଳନାରେ ଅଧିକ ପତଳା । ୧୦.୮ ଲକ୍ଷ ଶିଶୁ ବୟସ ତୁଳନାରେ ବହୁତ କମ୍ ଓଜନର ହୋଇଥିବା ବେଳେ ୬୪ ପ୍ରତିଶତ ଶିଶୁ ରକ୍ତହୀନତାର ଶିକାର ହେଉଥିବା ରିପୋର୍ଟରେ କୁହାଯାଇଥିଲା । ହେଲେ ବିକାଶର ମିଛ ଦମ୍ଭୋକ୍ତି ବାଢୁଥିଲେ ବିଜେଡି ସରକାର ।